Read lumasaaba She Lukyeendo 36 Bible Online

She Lukyeendo 36 - lumasaaba bible

She Lukyeendo 36

¹Bezaleli, ni Oholiabu, ni naabo boosi beesi Umukasya aweele kamakhula ke khuunyalisa khuukhola ni khuumiliisa i Tabenakulo, kane baraambe khuuloondekhana ni byeesi Umukasya alakiile.

²Nashiryo Musa waalaanga Bezaleli ni Oholiabu, ni naabo beesi Umukasya aawa kamakhula khuukhola bibiindu, khuurakikha kumulimo ukwo.

³Musa waabawa ibyo abe bibikanibwa byeesi babaandu bawaanayo, mu khumaliilisa shiifwo shikhosefu isho. Abe buli kumutikhinyi babaandu beloosela khu bwaabwe busa khuureera biwaanwa bibiindi.

⁴Shino shaakila abo boosi abe babaali ni kamakhula mu buraambi bwa buli saambo nabo beetsa, nga buli mutweela ali ni likatala lyeesi akhola.

⁵Kila balomela Musa bari, “Babaandu baareerire bibiindu bibifuurisawo ibyo bibikanibwa khuukhola kumulimo kweesi Umukasya alakiile ari khukhole.”

⁶Lwanyuma Musa waarusa likaambila mu burume bubuloma buri, “Mukhareera biwaanwa bibiindi bye khukhwoombakha shiifwo shikhosefu ta.” Babaandu baakamisila awo khuureera bibiindu.

⁷Byeesi baareera abe bituumisakho buukali bweebyo abe bibikanibwa khuukhola kumulimo.

⁸Nashiryo babaandu bano baanyoowa baakhola i Tabenakulo ni tsingubo tsitsikikhiisa likhumi, ni tsingubo tsimiliyu naabi nga tsilimo iraangi imbuusi, inandaafu ni mbesemu, nga waakirukhilemo shifwaani sha kerubi.

⁹Tsingubo tsitsikhiisa abe tsilekhaana, nga buli ndweela buuleeyi ili tsifuuti kane na tsibili, ne buubalaayi tsifuuti tsisesaba.

¹⁰Baawaamba tsingubo tsiraano baatubaasa atweela yaamamo indweela, ni tsitsiindi natsyo baryo.

¹¹Baara khu ngubo iseembayo biŋoli bye raangi imbuusi kamakhumi karaano.

¹²Biŋoli bino byeesi baara khu ndulo khwe tsingubo tseesi baanyoowa khuubowa atweela, byaalekhaana ni n'ebyo bye khu ngubo iye khaabili.

¹³Waakholayo bububowa atweela biŋoli bye tsingubo khuutsitubaasa atweela. Nashiryo i Tabenakulo yoosi baakibowa yaaba shishiindu shitweela.

¹⁴Angaaki we Tabenakulo, waakhola shiilama shishibiimbakho, khukhwaama mu ngubo likhumi n'andweela tseesi bakhola mu bwooya bwe tsimbusi.

¹⁵Nga tsoosi tsilekhaana busa buuleeyi bwa fuuti kamakhumi kane na tsiraano, ni buubalaayi bwa fuuti tsisesaba.

¹⁶Bawaamba tsiraano baatsitubaasa atweela khukhwaamisamo indweela, ni tsitsiindi tsisesaba natsyo baamisamo ikiindi.

¹⁷Khu ngubo tsino tsyoombi, khu buli shisiintsa shishaseemba khu ndulo, baarakho biŋoli kamakhumi karaano.

¹⁸Baakholayo bubuwaambisa atweela biŋoli ibyo, bubwoola kamakhumi karaano, nio baabowa tsingubo itsyo atweela. Musaambo yino, shishibiimba khu ngaaki shaaba nga shili she ingubo imbuufu.

¹⁹Baakholayo bibibiimba khu ngaaki bibiindi bibili, nga shitweela khukhwaama mu mahafu ke kamamiiku, ni shishiindi khukhwaama mu mahafu ke tsimbusi.

²⁰Lwanyuma baasimikha bisiindi bye tsifuremu khulwe Tabenakulo, nga bye kuusaala ku akasiya.

²¹Buli kuusaala abe kwoola tsifuuti likhumi na tsiraano buuleeyi, naluundi tsibili ni shisiintsa buubalaayi.

²²Buli kusiindi kwabakho bitsaangi bibili bye khuubowela khu kuundi kukukwoongelakho.

²³Baakhola bisiindi kamakhumi kabili khuutseeta luwaande lw'emwaalo,

²⁴nga khulikho ni kamalowo kamakhumi kabili k'efeetsa mweesi basimikha, nga buli kusiindi kamalowo kabili.

²⁵Lwanyuma baakhola kimisiindi kikiindi kye Tabenakulo kamakhumi kabili, kye luwaande lw'engaaki,

²⁶nga khulikho ni kamalowo kamakhumi kabili k'efeetsa mweesi basimikha, nga buli kusiindi kamalowo kabili.

²⁷Khu luwaande lw'ebukwanyaanga nga niyo iyaba imukoongo we Tabenakulo, waarayo bisiindi bisesaba.

²⁸Mu buli isoonda iy'enyuma, baalooselamo kuusiindi kutweela.

²⁹Abe aasi buli kusiindi kuli khubwakwo, ne imurwe baakhola ipore indweela, yaakiwaambisa atweela, waakila imurwe kyaba shishiindu shitweela. Tsipore baakhola tsibili, nga tsisoonda tsy'enyuma tsoombi, buli ndweela ilikho indweela.

³⁰Nashiryo luwaande lw'ebukwanyaanga, kimisiindi kyaba shinaane, nga kilikho ni kamalowo k'efeetsa likhumi na kasesaba, nga buli kusiindi kabili.

³¹Lwanyuma baakhola kikikhiikha khu ngaaki kiraano nga kimi akasiya, khubowa atweela kimisiindi ky'emwaalo.

³²Baakhola kikiindi kiraano kye luwaande lw'engaaki, ni kikiindi kiraano ky'ebukwanyaanga.

³³Waakhola lwe akari khu tsikhiikha, khuuba shinakari she kimisiindi, nga kwaama khu ndulo khukhwoolisa khu ndulo.

³⁴Kimisiindi ni kikikhiikha kyoosi khu ngaaki baarakho izaabu. Tsipore tseesi baraambisa khuubowa atweela kikikhiikha baakhola tsy'ezaabu inyene busa.

³⁵Ingubo ikhiisa mukari baakikhola nga imiliwu naabi, nga barukhilakho kerubi, naluundi nga ilimo iraangi imbuusi, inandaafu n'imbesemu.

³⁶Ingubo yino baakibowa khu bihanikha bine, nga bye zaabu naluundi nga babiyabila mu bisiindi bya akasiya. Bisiindi bino baabiwakha izaabu khu ngaaki, naluundi baabisimikha mu malowo kane k'efeetsa.

³⁷Lwanyuma baakhola ingubo ikiindi ikhiisa imulyaango kwe Lisari Likhosefu. Baakikhola khukhwaama mu ngubo imiliyu, nga ilimo iraangi imbuusi, inandaafu n'imbesemu.

³⁸Bihanikha biraano nibyo bibyawaambila ingubo yino khu bisiindi. Bisiindi bino n'imurwe wabyo ni khu ndulo abe bilikho izaabu. Ne biifwo biraano mweesi baabisimikha abe bya buroonzi.