Read lumasaaba She Lukyeendo 37 Bible Online

She Lukyeendo 37 - lumasaaba bible

She Lukyeendo 37

¹Lwanyuma Bezaleli waabukula kimisaala kimi akasiya wombekhamo Isanduuku. Buuleeyi abe tsifuuti tsitaru ni busiintsa butaru, buubalaayi tsifuuti tsibili ni khasiintsa khatweela khe khaane, khu fuuti tsibili ni khasiintsa khatweela khe khaane khuuniina mu ngaaki.

²Ibulafu ni mukari mwoosi waahakhamo izaabu, ni khuukibotookhelesa yoosi.

³Khu bikele byayo bine, baarakho tsipore tsy'ezaabu, nga buli luwaande lulikho tsibili.

⁴Waakhootsa kimisaala kimileeyi khukhwaama mu kusaala ku akasiya, waahakhakho izaabu.

⁵Weengisa kimisaala kimileeyi kino mu pore tsye khu ndulo khwe Indakaano, kye khuwaamba nga bakisuta.

⁶Wawaamba izaabu yonyene busa, waakhola she khu ngaaki khwe Isanduuku, nga shino shili shitsoloŋo she khukhwiyakhilakho bibyoonako.

⁷Waabukula izaabu, waabasamo bakeruubi babili, waabara khu buli luwaande lwe shitsoloŋo shatsana.

⁸Baakhola bikerubi bino byewaamba khu shitsoloŋo byaabeela ilala nga she khu bweene.

⁹Ba kerubi bano baaba nga buli mutweela waalolile isi uwashe, ne nga tsimoni tsyaloleele aasi khu shitsoloŋo. Tsindaha tsyaabwe ngatsyekukhile tsyaabiimbile khu shitsoloŋo, khuushitseeta.

¹⁰Lwanyuma baakhola i imeetsa khukhwaama mu kuusaala ku akasiya, nga ili buuleeyi tsifuuti tsitaru, buubalaayi ifuuti indweela ni shisiintsa ni khuuniina mu ngaaki tsifuuti tsibili ni khasiintsa khatweela khe khaane.

¹¹Yoosi baakiwakha izaabu inyene busa, naluundi bakibuumbilakho izaabu.

¹²Khu minwa ky'emeetsa, baarakho izaabu iyoola tsi milimita kamakhumi musaafu na tsiraano buubalaayi, naluundi baabuumbilakho izaabu khukhwibotokhelesa.

¹³Baabasa tsipore tsine tsy'ezaabu, baatsira khu bikele by'emeetsa,

¹⁴aambi ni kiminwa ky'emeetsa. Tsipore tsino abe tsili tsye khuuhandalasila kimisaala kye khuusuta mu shifwo shitweela.

¹⁵Baakhola kimisaala kimi akasiya kye khuusuta imeetsa, baakiwakha kyoosi n'izaabu.

¹⁶Lwanyuma nga baraambisa izaabu yonyene busa, baakhola tsisowaani, bipwakhuli, tsingalaaya, ni tsisaatsi. Bino abe bili ni khuuraambisibwa mu khwitsoloola biwaanwa bye khuunywa.

¹⁷Bezaleli weelakho waaraambisa izaabu yonyene busa, waabasa kumukhoondi kwe taala. Kuukyele kwayo, kumukhoondi, bipwakhuli byakhwo, ni bimuli byakhwo, byoosi abe bili shishiindu shitweela.

¹⁸Itaala yabakho tsisakya tsisesaba, nga buli luwaande lulikho tsisakya tsitaru.

¹⁹Buli lutweela khu sakya itsyo, abe lulikho shikoombe, sheesi baakhoora nga shimuli, nga shilikho ni kumukhoondi ni busaafu.

²⁰Akari we shisiindi sh'etaala yino abe basaahawo ni bimuli bine.

²¹Abe aasi a buli tsisakya tsibili isi tsyaamila khu mukhoondi tsyaasakalala, iliwo shimuli shitweela.

²²Tsisakya ni bibisaaha itaala, abe byoosi byaayiwaamba atweela, nga babikhola khukhwaama mu zaabu inyene busa.

²³Weloosela waakholayo tsitaala tsyayo musaafu, bibiwaambisa tsitaala tseene, ni bibitaatilisa likoshe, nga bino byoosi bili by'ezaabu yonyene busa.

²⁴Itaala yoosi ni bikitsiilakho byamalawo izaabu iyoola tsikilo kamakhumi kataru na tsine.

²⁵Shisheeso she bubaani baashoombakha khukhwaama mu kuusaala ku akasiya. Buuleeyi ni buubalaayi abe ilekhaana busa nga buli lubeka tsi sentimita kamakhumi kane na tsiraano, ne khuuniina mu ngaaki tsi sentimita kamakhumi syeenda. Ikhaba tsiintsika tsye mu soonda baatsikhola tsyawaambanila atweela ni shisheeso shisheene.

²⁶Khu ngaaki, khu ndulo, ni tsiintsika bye shisheeso waabiwakhakho izaabu yonyene busa, naluundi waabuumba izaabu waakilaandisa khu ndulo.

²⁷Khu maande tsibili tsitsilolelanile, ne nga aasi e zaabu isi babuumbila khu ndulo, waarawo tsipore tsibili tsy'ezaabu, tsye khuuramo kimisaala nga bakisuta.

²⁸Kimisaala kye khuusuta baakikhola mu kimi akasiya naluundi baakihakha izaabu.

²⁹Lwanyuma waakhola kamafura kamakhosefu, ke khuubiita basaayi, waakhola ni bubaani bubuwunya bulaayi, bweesi be kamakhula batubaasa ni khukhwitsiliilisa.