Read lumasaaba She Lukyeendo 39 Bible Online

She Lukyeendo 39 - lumasaaba bible

She Lukyeendo 39

¹Babaamanya khuukhola bikwaaro, baakhola biilayi bibyeene, nga bilimo iraangi imbuusi, inandaafu n'imbesemu. Bino abe babikwaara nga bakaanisa mu shifwo shikhosefu. Aroni naye bamukholela bikwaaro nga Umukasya n'alomela Musa.

²She khu ngaaki baashikhola mu ngubo tsiimiliwu naabi nga khulikho buwutsi bw'ezaabu, iraangi imbuusi, inandaafu n'imbesemu.

³Umubasi uwamanya buulayi akhola tsiwutsi tsye zaabu nga akhalamo bubuundu bukyeekhe naabi. Lwanyuma waatsirukhila atweela mu ngubo ilimo iraangi imbuusi, inandaafu n'imbesemu.

⁴She khu ngaaki shino baakholamo bisiintsa bibili, nga baabiwaambilisiile atweela khu mayi.

⁵Baakholelakho ni kumusipi nga nakwo kuli kwe ngubo indayi, nga mulimo bwe raangi imbuusi, buurandaafu ni buubesemu, byaaba nga Umukasya n'alakila Musa.

⁶Baabukula kamabaale ka onikisi baakarakho izaabu, lwanyuma baakhoorakho kamasina ke bikuuka bya Isiraeli likhumi na bibili.

⁷Kano baakara khu mayi ke she khu ngaaki shino, khuubawo mu lisiina lye bikuuka bye ba Isiraeli, shaaba busa nga Umukasya n'alakila Musa khuukhola.

⁸She khu shifuba baashikhola mu ngubo n'ikhola niyo indweela nga she khu ngaaki.

⁹Abe shilekhaana eyi ni n'eyi, nga baashifuumbilemo khabili. Buuleeyi ni buubalaayi abe shili tsi sentimita kamakhumi kabili na tsibili buli lubeka.

¹⁰Baaruungakho kiminyele kine kye kamabaale ke buukusi bwe angaaki naabi. Kumunyele kukuunyoowa abe kulimo kamabaale ka rubi, topazi, ni ganeti.

¹¹Kukuukhola khabili abe kulimo emeralidi, safaya, ni dayamondi.

¹²Kukuukhola khataru abe kulimo tukoyisi, agate ni amesisiti.

¹³Kukuukhola khane abe kulimo berili, onikisi ni yasipa. Kano koosi baakakhwiikha mu zaabu.

¹⁴Kamabaale kaaba likhumi na kabili nga kalikho kamasina ke bikuuka bya Isiraeli. Kano abe kakhebusa bikuuka bye ba Isiraeli, naluundi nga bakakhoora nga shangumu.

¹⁵Khu ngubo iye khu shifuba, baarukhilakho kimikosi nga ky'ezaabu yonyene busa.

¹⁶Lwanyuma baakhola tsipore tsibili tsy'efeetsa, baatsira khu soonda tsye khu ngaaki tseeyo iye khu shifuba.

¹⁷Baabirisila kimikosi kili ky'ezaabu mu pore tsino,

¹⁸baatsibowela atweela ni bibyaba khu ngubo, baryo baabowa ingubo yino khu mayi ke she khu ngaaki.

¹⁹Baakhola tsipore tsibili tsy'ezaabu, baatsibowa khu soonda tsy'ebikele we she khu shifuba, khuukobolela khu ndulo khwe she khu ngaaki.

²⁰Baakhola tsipore tsitsiindi tsibili baatsibowa ibweeni we kimikosi kye bweeni kye she khu ngaaki, aambi ni likemo, ne angaakikho e kumusipi.

²¹Baabowa tsipore tsye she khu ngaaki khu pore tsye she khu shifuba, shaaba nga Umukasya n'alomela Musa. Shino shaanyalisa she khu shifuba khuusungwaatsila angaaki e kumusipi, ne shaaba nga shewaambile.

²²Shikwaaro she mukari baakhola she raangi imbuusi, nga shoosi shili she bubwooya bwe kamasheese.

²³Isi kumurwe kubirira, baanabawo boomiisila ilala bari nio alekhe khuutyenuukha ta.

²⁴Khu likemo lye aasi wayo, baarayo buuyeeye bwe ngubo imiliyu naabi nga ilimo iraangi imbuusi, ni burandaafu, ni buubesemu, nga baabirisiilemo ni buubeya. Byaba nga Umukasya n'alomela Musa khuukhola.

²⁵Naluundi baakhola kamayiimba khukhwaama mu zaabu yonyene busa, baakara akari e buubeya, baabotokhelesa liikemo lyoosi.

²⁶Bino byaatsya nga biloondekhana khu shikwaaro she bubwakaanisi, shaaba busa nga Umukasya n'alakila Musa.

²⁷Lwanyuma baakholela Aroni ni babaana beewe tsisaati,

²⁸tsingubo tsye khuubowa imurwe, tsingofwiila, ni bikwaaro bye mukari,

²⁹ni kumusipi kwe khukhwibowa, nga kwe ngubo indayi naabi, ilimo iraangi imbuusi, inandaafu, n'imbesemu, nga baakisaayile buulayi, bino byaba nga Umukasya n'alomela Musa.

³⁰Baakhola shipwakhuli sh'ekuutwa ikhosefu, khukhwaama mu zaabu yonyene busa, kila bakhoorakho buurone nga babaakhoora khu shangumu, bari, “Shawaanibwileyo nga shikwalaafu isi Umukasya.”

³¹Baaraambisa kumukosi kwe raangi imbuusi khuushibowa iburaangisi w'engubo iye khu murwe, nga Umukasya n'aboolela Musa.

³²Nashiryo kumulimo kwe khukhwoombakha i Tabenakulo ni weema iye khuubuusanilamo kwaaba nga kwaaweele. Ba Isiraeli baaba nga baakholile khuuloondekhana ni byeesi Umukasya aalakila Musa khuukhola.

³³Kila bayila isi Musa i Tabenakulo, iweema ni bibiraambisibwamo byoosi, ni bye khuusuungakho bibiindu, ni bisaala byayo, ni kimikhiikha, ni kimisiindi, ni bye khuukhwiikhamo,

³⁴ni lihaafu lye limiiku lye khuubiimba khu ngaaki, nga baaliwakhile iraangi imbesemu, ni ngubo ikhiisa.

³⁵Nga khulikho n'isanduuku iy'endakaano ni kimisaala kyakhwo, ni shitsoloŋo she khukhwiyakhila bibyoonako,

³⁶n'imeetsa ni bibikitsiilakho byoosi, ni kimikaati kyeesi bawaanileyo isi Wele.

³⁷Baareera n'itaala ni bibikitsiilakho nga byoosi bye zaabu, ni kamafura k'etaala,

³⁸shisheeso sh'ezaabu, kamafura ke khuubita, bubaani bubuwunya buulayi, n'ingubo ikhiisa imulyaango w'eweema,

³⁹shisheeso sha buroonzi ni shitiindilo shakhwo, kimisaala kye khusuta, ni bibitsiilakho, lukalaaya ni sheesi lwikhalakho,

⁴⁰tsingubo tsitsikhiisa lulwaanyi ni bisiindi byakhwo ni mweesi babisimikha, ingubo ibiimba imulyaango we lulwaanyi, bitsaangi by'eweema, ni neebyo byoosi bibikanibwa khuuraambisibwa mu weema.

⁴¹Khwabakho bikwaaro bye shiriifwa bye basaayi babaakaanisa mu shifwo shikhosefu, bikwaaro bikhosefu bya Aroni umusaayi, ni bye babaana beewe, banyalise khukhwakaanisa nga basaayi.

⁴²Ba Isiraeli baaba nga baakholile buli shitweela sheesi Umukasya aalakila Musa khuukhola.

⁴³Musa weemenielesa bibiindu byoosi, waabona ari baakholile nga Umukasya n'alakila. Nashiryo, Musa waabawa tsikhabi.