Read lumasaaba She Lukyeendo 4 Bible Online

She Lukyeendo 4 - lumasaaba bible

She Lukyeendo 4

¹Nio Musa weelamo Wele nga aloma ari, “Ise naamanyile ndi singene barekeerese byeesi ise inoma, namwe baloondelele byeesi ise mbaboolela ta. Khulwekhuuba banaloma bari, ‘Iwe Umukasya siwakhubonekheelekho ta.’ ”

²Kila Umukasya amureeba ari, “Shiina sheesi uwaambile mukhono mwoowo?” Musa weelamo ari, “Naawaambile imiimbo iye bubwaayi.”

³Umukasya waamulakila ari, “Kituume aasi khwiloba.” Musa waakituuma aasi khwiloba, lubaluba yeekelamo indemu, waakila Musa waatima wesyeenda.

⁴Ne Umukasya waalomela Musa ari, “Kiwaambe imushiinga, ukisute angaaki.” Musa n'ayila kumukhono waakiwaamba, iyatsana yeekela imiimbo.

⁵Kila Umukasya amulomela ari, “Nga waakholele shino, kane ba Isiraeli bafukiilise bari Wele we bakuuka baabwe, naluundi Wele wa Iburayimu, naluundi Wele wa Yakobo, waakhubonekheele iwe.”

⁶Indi luundi Umukasya waalomela Musa ari, “N'ure kumukhono kwoowo mu saati mukari.” Aryo waaramo kumukhono, ne n'akurusamo, abe kwoosi kwaashuukhile kwekyelile kumuwaanga nga umuundu uuli ni buulwaale bwe lihaafu.

⁷Lwanyuma Wele waamuloma ari, “Niwise kumukhono kwoowo mu saati.” Kila ara kumukhono mu saati, ne n'akurusamo, kwaaba nga kweelileyo kuli kumulayi nga ni kwaba amataayi.

⁸Kila Wele aloma ari, “Noola sibaafukiiliile byeesi iwe uloma, namwe she kamakaanga shishinyoowa ta, kane bafukiilise shishiilakho isho.

⁹Ne noola sibafukiilisile bye kamakaanga bibili bino ta, namwe sibarekeeresile byeesi iwe uloma ta, kane iwe utahe kameetsi mu luutsi Nayilo, ukatsukhe khu liloba lilyoomu. Kameetsi keesi kane utahe utsukhe ako, kane nga waakatsukhile khwiloba lilyoomu, lubaluba keekyele kamafuki.”

¹⁰Ne Musa waalomela Umukasya ari, “O Mukasya, ise s'indi umukanikhi umulayi ta, ikhaba nga abe ushiili khuunganikhayo ta, namwe ikhaba nga iwe n'umalile khuukanikha ni nase. Ise nikhoyoola mu nganikha ikhaba mu khwambaasa.”

¹¹Kila Umukasya amureeba ari, “Naanu niye uwabuumba kumunwa kw'omuundu? Naanu niye ukila umuundu waaba wawuma, namwe waaminyaala mu maru, namwe waaba ni tsimoni nga abona, namwe waaba umubofu? S'ali ise niye, Umukasya, ukhola ibyo ta?

¹²Ni nashiryo ari n'utsye, ni nase kane imbe ni nawe, ise samweene ikhuleekele byeesi kane ukanikhe.”

¹³Ne Musa wekoontselela nga aloma ari, “O Umukasya wase, ise naakhwikoontseleele, n'urumane umuundu ukuundi.”

¹⁴Kila Wele lirima limuwaamba khulwa Musa, kila aloma ari, “Ne Aroni waandaayo, uraamba kwe bu Levi, s'aliwo ta? Naamanya indi niye ali umukanikhi umulayi. Bona uyoshiina ali khu ntsila alikho eetsa ano khuukhubona iwe. Nga niye waakhuboone iwe, anaba musangaafu naabi.

¹⁵Iwe kane uboolele Aroni byeesi aloma, ni nase kane imbewo khuubaleekela mweembitsana byeesi mukanikha.

¹⁶Iwe kane ube nga Wele, n'uboolela Aroni bye khuukanikha, nio niye n'akanikha isi babaandu.

¹⁷Kane usute imiimbo yino utsye ni nayo, niyo yeesi kane wiyeetise khuukhola bye kamakaanga.”

¹⁸Musa weelayo isi Yesero paapawe w'omukhasi weewe, waamulomela ari, “N'ufukiilise ingoboleyo i Misiri, isi baalebe baase, imbone oba bashiili balamu.” Yesero weelamo Musa ari, “Lukyeendo lukhubeele luulayi.”

¹⁹Nga Musa ashiili i Midiani, abe Wele waamulomeele ari, “Lekha shibala she ba Midiani, ukoboleyo i Misiri. Khulwekhuuba abo babaakana khuukhwiira iwe baamala khaale khuufwa.”

²⁰Nashiryo Musa wahaamba umukhasi weewe ni babaana beewe, waabekhasa khu sikilya tsyeewe, baalola kwe Misiri. Musa waasuta imiimbo iyabamo kamaani ka Wele, waatsya ni nayo.

²¹Nga Musa ali khu ntsila alikho atsya, Wele waamulomela ari, “Nga woolile i Misiri, uli ni khuutsya isi Faraawo, ukhole bye kamakaanga byoosi byeesi ise indeere mu bunyala bwoowo. Ne kane ise ikhole Faraawo abe ni shikyili shikali, aryo alekhe khulekhuula babaandu baase khuutsya ta.

²²Kane uboolele Faraawo uri, ‘Umukasya aloma ari, ba Isiraeli nibo umwaana wase umukiboole,

²³indikho ikhulakila iwe indi lekhuula umwaana wase atsye, nio naye anyalise khukhuuntsisaaya ise. Ne n'uloba khuumulekhuula waatsya ta, kane ise niire umwaana woowo umukiboole.’”

²⁴Mu shilo shitweela, Musa n'aba abe ashiili mu lukyeendo, nga waafunilekho e khuukona, Umukasya weetsa nga akana khumwiira.

²⁵Ne Zipora umukhasi wa Musa, waasheba umwaana weewe imbalu, kila abukula likhoba alitiila khu bikele byeewe, nga aloma ari, “Khuubirira mu mafuki kakaaronyele aasi kano, iwe ari uli umwaana wase umalile khukhwingila imbalu.”

²⁶Aryo Umukasya waalekha khukhwiira Musa ta. Kila Zipora aloma ari, “Iwe uwonile khulwe khuusheba khwe imbalu khuno.”

²⁷Umukasya waalomela Aroni ari, “N'utsye imubiimbi, utsye waakanane Musa.” Naye n'atsya, waamwaakanana a lukiingi Sinaayi, kila amukwa mu shifuba waamukheesa.

²⁸Kila Musa aboolela Aroni bibiindu byoosi byeesi Umukasya aamuboolela nga n'amurumana, ni bye kamakaanga byoosi byeesi abe Wele amulakiile khuukhola.

²⁹Lwanyuma Musa ni Aroni baatsya baabusaasa atweela baaraangilisi be ba Isiraeli boosi.

³⁰Aroni waababoolela bilomo byoosi byeesi Umukasya aaboolela Musa, naluundi waakhola bye kamakaanga mu moni tsye babaandu babaabawo.

³¹Babaandu boosi baabifukiililamo. Ni baawulila bari Umukasya waakyeniyiile babaandu beewe ba Isiraeli, naluundi bari waawuliile kamalilo kaabwe, beenamisa kimirwe kyaabwe baamwisaaya.