Read lumasaaba She Lukyeendo 40 Bible Online

She Lukyeendo 40 - lumasaaba bible

She Lukyeendo 40

¹Umukasya waalomela Musa ari,

²“Khu shifukhu shishinyoowa she kumweesi uli ni khukhwiimisa i Iweema iye Khuubuusanilamo.

³Mubweene umwo uremo Isanduuku iye Indakaano, lwanyuma mukari uremo ingubo ikikhiisa.

⁴Lwanyuma ureere imeetsa, upaangekho bibiindu bibyaakhila khuukibakho. Ureere shisiindi sheesi itaala yiimakho, urekho tsitaala.

⁵Shisheeso she bubaani shire ibulafu we ngubo ikhiisa mukari, nga shaaloleleela Isanduuku iye Indakaano. Bowawo ingubo ikhiisa imulyaango kukwiingila isi i Tabenakulo.

⁶Shisheeso she biwaanwa bye khukhwoosha, shiimise ibweeni we kumulyaango kwe Tabenakulo.

⁷Lukalaaya lwe khuusaabilamo lure akari e Tabenakulo ni shisheeso, ulwiitsusemo ni kameetsi.

⁸Lwanyuma ibulafu we weema, urewo lulwaanyi, ubowekho ingubo ikhiisa imulyaango kukwiingila mu lwaanyi.

⁹“Bukula kamafura ke khuubita, usalaase khu Tabenakulo ni bibikiilikho byoosi, nio byoosi biikyele bikwalaafu.

¹⁰Salaasa kamafura ke khuubita khu sheeso she khukhwookhelakho biwaanwa, ni bipwakhuli byakhwo, ubikyelise bikwalaafu. Shisheeso shino kane shikyele nisho shishiiminyisa buukwalaafu.

¹¹Biita tsikhabi khu lukalaaya lwe khuusaabilamo lwiikyele lukwalaafu.

¹²“Lwanyuma ureere Aroni ni babaana beewe amulyaango kwe Tabenakulo, ubasiinge ni kameetsi.

¹³Bukula bikwaaro bikwalaafu ibyo, ubikwaarise Aroni, umubiite ni kamafura, umwaawule khu baandi, akaanise nga umusaayi.

¹⁴Aamba babaana beewe nabo, ubarekho bikwaaro bibyaabwe.

¹⁵Nabo ubabiite tsikhabi, nga n'ubiitile paapa waabwe, nio nabo bantsakaanise ise nga basaayi. Khuubabiita khuno khukhaabekelise basaayi biilo ni biilo, khuumala kimiboolo kyoosi.”

¹⁶Nashiryo Musa waakhola ibyo byoosi byeesi Umukasya aamulakila khuukhola.

¹⁷Khu shifukhu shishinyoowa mu mweesi kwe kumwiiko kukuukhola khabili, beemisa i Tabenakulo.

¹⁸Musa waakiimisa mu bisiindi byayo nga asimikhamo tsifuremu, naluundi waarakho kimisaala kikikhiikha.

¹⁹Waakirakho shishikibiimbakho khu ngaaki, nga Umukasya n'amulakila khuushikhola.

²⁰Waabukula kamabaale kakaaronebwakho indakaano, waakara mukari mwe Isanduuku iye Indakaano, waarakho ni kimisaala kye khuuwaamba nga basuta. Khu ngaaki waarakho shitsoloŋo shishireera shishiyakhilo.

²¹Lwanyuma wengisa Isanduuku iye Indakaano mu Tabenakulo, waarawo ni ingubo iye mukari, ikhiisa khukhwaama ibulafu, nga Umukasya n'aloma.

²²Wengisa imeetsa mu weema iye khuubuusanilamo, luubeka lwangaaki lwe i Tabenakulo, ne nga ili ibulafu we ngubo ikhiisa.

²³Waarawo kimikaati khu meetsa mu moni tsy'Omukasya, nga Umukasya n'amulakila.

²⁴Wengisamo ni she khuurakho tsitaala, waashira lubeka lwe mwaalo we Tabenakulo, nga shaaloleleele imeetsa.

²⁵Waarakho tsitaala, nga Umukasya n'amulomela.

²⁶Wengisa shisheeso she bubaani mu Tabenakulo mukari, mu shifwo shikhosefu ibweeni we ngubo ikhiisa mukari.

²⁷Khu sheeso isho, wookhelakho bubaani bubuwunya buulayi naabi, nga Umukasya n'alakila.

²⁸Mu mulyaango kwe Tabenakulo waarayo ingubo ikhiisayo.

²⁹Imulyaango kwe Tabenakulo iye weema iye khuubuusanilamwo, waarayo shisheeso she biwaanwa bibyooshe. Khu bweenekhwo wawaanayo biwaanwa bibyooshe ni bye biilimwa, nga Umukasya n'alakila.

³⁰Lwanyuma waabukula lukalaaya luboofu lwe khusaabilamo, waalura akari e Tabenakulo ni shisheeso. Waatsukhamo kameetsi ke khusaaba.

³¹Mu bweene umwo nimwo mweesi Musa ni Aroni ni babaana ba Aroni baasaabatsakila kamakhono ni bikele.

³²Abe nga batsya mu weema iye khukhwakaananilamwo, namwe aambi ni shisheeso, abe bali ni khuusaaba, nga Umukasya n'alakila Musa.

³³Waabowa tsingubo tsitsikhiisa lulwaanyi lwe Tabenakulo ni shisheeso. Mu mulyaango kwe lulwaanyi, waaramo ingubo ikhiisamo. Nashiryo Musa waaba nga waamalile kumulimo.

³⁴Lwanyuma lifuumbi lyaabiimbilila iweema iye khukhwakaananilamwo, nio shiriifwa sh'Omukasya sheetsusa i Tabenakulo.

³⁵Musa waalekha khunyalisa khukhwiingila mu weema ta, khulwekhuuba abe lifuumbi lyaakibiimbiliile naluundi abe shiriifwa sh'Omukasya sheetsusile i Tabenakulo.

³⁶Mu ŋeendo tsye ba Isiraeli tsyoosi, abe nga lifuumbi lyaarurire khu Tabenakulo, lyaaniinile mu ngaaki, abe belooselayo khuukyeenda.

³⁷Ne abe nga lyaaramirekho, baliinda khukhwoolisa ni litsya.

³⁸Mu khukyeenda khwaabwe khwoosi, abe lifuumbi ly'Omukasya kumuusi liba khu Tabenakulo, ne mu shilo abe kumulilo kubonekhela mwifuumbi nio akile babaandu banyalise khuubona.