Read lumasaaba She Lukyeendo 6 Bible Online

She Lukyeendo 6 - lumasaaba bible

She Lukyeendo 6

¹Ne Umukasya waalomela Musa ari, “Ari kane ubone sheesi ise inakhola khu Faraawo. Khulwe bunyala bwase, kane Faraawo alekhuule babaandu baase batsye, khaba kane oole ni khuubatimisa busa khuurura mu shibala sheewe.”

²Ise niye Umukasya.

³Ise ni nabonekhela Iburayimu, nabonekhela Isaaka, naluundi naabonekhela ni Yakobo, ise nababonekhela nga n'indi Wele Umunyali uwa byoosi. Ne ise samweene sinabuula lisiina lyase isi nibo ta.

⁴Ise nakhola ikwangwaani ni nabo, nga imbalomela indi kane imbawe shibala sha Kanani, isi abe nibo bamenya nga babeetswa.

⁵Ni khuuminyisilakho ilala, ise naawuliile khukhwilootsa khwe ba Isiraeli, beesi ba Misiri balikho bakholisa buukulwa, nashiryo ise naashebuliile indakaano iyo.

⁶Ni nashiryo, lomela ba Isiraeli uri, “Ise ndi niye Umukasya, kane imbaruse mu khutaambisibwa khweesi balimo mu Misiri, imbaruse mu bukulwa bwaabwe. Kane nookesanise kamaani kamakali mu khubawonesa nga imba ba Misiri shitaambiso.

⁷Kane inywe mube babaandu baase, ni nase kane imbe niye Wele weenywe. Awo nio munyalise khuushimanya muri ise Umukasya Wele weenywe, niye ubarusile mu khutaambisibwa khwe ba Misiri.

⁸Kane imbayile inywe, imbawe shibala sheesi ise namala khaale khukhwitsuba ndi ikhaashiwe Iburayimu, Isaaka, ni Yakobo. Kane ise ishibawe shibe shisheenywe. Ise ndi niye Umukasya.”

⁹Musa waatsya waaboolela ba Isiraeli bibiindu bino byeesi Wele aamuboolela, ne baalekha khufukiilisa byeesi aloma ta, khulwekhuuba abe baweelemo khaale kamaani naluundi abe balikho babirisibwa buubi naabi.

¹⁰Kila Umukasya alomela Musa ari,

¹¹“Tsya isi Faraawo umuyiinga wa Misiri, umulomele alekhuule ba Isiraeli batsye, barure mu shibala sheewe.”

¹²Ne Musa weelamo Umukasya nga aloma ari, “Ise ndi umuundu ukhamanya khuuwayo inganikha mu baandu ta! Ne waaboone uri ba Isiraeli baalobile khuurekeeresa bibyase, wambaasa uri umuyiinga wa Misiri, anyala waarekeeresa byeesi ise inoma?”

¹³Ne Umukasya waakanikha isi Musa ni Aroni, waabawa buurume khuuyilila ba Isiraeli ni Faraawo, naluundi waabalakila boombi khuumusa ba Isiraeli khukhwaama i Misiri.

¹⁴Baaraangilisi be bikuuka baaba nibo bano: Rewubeni umusooleli wa Yakobo umukiboole, aaba ni babaana bano: Hanoko, Palu, Hesiloni ni Karimi.

¹⁵Simeoni umusooleli wa Yakobo aaba ni babaana bano: Yemweli, Yamini, Ohadi, Yakini, Zohari ni Shaulo, uwaba uw'omukhasi umu Kanani.

¹⁶Levi umusooleli wa Yakobo aaba ni babaana bano: Gereshoni, Kohasi ni Merari. Levi umweene aamenya woolisa kye buukhulu shitoondo shitweela ni kamakhumi kataru na musaafu (137).

¹⁷Basoleeli ba Gereshoni baaba nibo Libuni ni Shimeyi.

¹⁸Kohasi aaba ni basooleli bano: Amuramu, Isari, Heburoni ni Useli. Kohasi umweene aamenya woolisa kye buukhulu shitoondo shitweela ni kamakhumi kataru na kitaru (133).

¹⁹Basoleeli ba Merari baaba nibo: Mahali ni Mushi. Abo nibo be nda ya Levi, khuuloondekhana ni kimiboolo kyaabwe.

²⁰Amurani aayila seenge weewe ulaangibwa Yosebedi, waamusaalamo babaana babili nga nibo, Aroni ni Musa. Amurani aamenya woolisa kye buukhulu shitoondo shitweela ni kamakhumi kataru na musaafu (137).

²¹Basooleli ba Isari baaba nibo: Kora, Nefeki ni Zikuri.

²²Basooleli ba Useli baaba: Mishayeli, Elisafani ni Sitiri.

²³Aroni aayila umukhasi isi balaanga bari Eliseba, umukhaana wa Aminadabu. Eliseba aasaala Nadabu, Abihu, Elieza ni Isamari. Eliseba aaba umukooko wa Nashoni.

²⁴Basooleli ba Kora baaba: Asiri, Elukana ni Abiyasafu.

²⁵Elieza umusooleli uwa Aroni, aayila mutweela khu bakhaana ba Putyeli, waamusaalamo Fenekasi. Ulwo nilwo luruungo lw'abo babaaba baaraangilisi be bikuuka be muunda iya Levi.

²⁶Aroni ni Musa beene bano nibo beesi Umukasya aalomela ari, “Ni mutsye muruseyo ba Isiraeli khukhwaama i Misiri.”

²⁷Nibo babaatsya baakanikha isi Faraawo umuyiinga uwa Misiri, bibiwaamba khu khurusayo ba Isiraeli mu Misiri.

²⁸Khu shifukhu sheesi Umukasya aakanikha isi Musa nga ali mu Misiri,

²⁹Umukasya aamulomela ari, “Ise niye Umukasya, boolela Faraawo umuyiinga uwa Misiri ibyo byoosi byeesi ise ikhuboolela iwe.”

³⁰Ne Musa waakobolamo Umukasya nga aloma ari, “Iwe waamanya nga ise s'indi umukanikhi umulayi ta, kane Faraawo arekeerese byeesi ise inooma?”