Read lumasaaba She Lukyeendo 7 Bible Online

She Lukyeendo 7 - lumasaaba bible

She Lukyeendo 7

¹Umukasya waakobolamo Musa ari, “Iwe nga waatsiile isi Faraawo, kane ube ni buunyala nga bwa Wele, ne Aroni kane abe nga umuŋoosi woowo, asontsoole byeesi iwe uba waakanikhile.

²Iwe uli ni khuukanikha buli shitweela sheesi ise mba naakhubooleele, nio waandaayo Aroni aboolele Faraawo khuulekhuula ba Isiraeli barure mu shibala sheewe batsye.

³Ne kane ise ikhole Faraawo abe ni shikili shikali, nio abe ise naakhalooselakho bye kamakaanga byeesi ikhola mu Misiri,

⁴Faraawo singane awuliilise byeesi mumuloma ta. Nio abweene awo ise samweene nookesanise Misiri kamaani kaase, khuubirira mu bikholwa bye kamaani, shishikane shikile umuyiinga alekhuule ba Isiraeli khukhwaama mu Misiri.

⁵Nga ise nookesanisile kamaani kaase, naarusile babaandu baase mu Misiri, kane ba Misiri bamanye bari ise ndi Umukasya.”

⁶Ari Musa ni Aroni baakhola nga Umukasya n'abalakila khuukhola,

⁷baatsya baakanikha isi umuyiinga. Khu mbuka iyo abe Musa ali ni kimiiko kamakhumi shinaane kye buukhulu, ne Aroni abe oolisa kamakhumi shinaane na kitaru.

⁸Umukasya waalomela Musa ni Aroni ari,

⁹“Nga Faraawo waabalomeele ari, ‘Kholawo she kamakaanga khuuŋaŋasa byeesi mulikho muloma,’ iwe ulomela busa Aroni khuutuuma imiimbo yeewe aasi ibweeni w'omuyiinga, nayo kane yikele indemu.”

¹⁰Nashiryo Musa ni Aroni baatsya isi Faraawo, baakhola nga Umukasya n'abalakila. Aroni waatuuma imiimbo yeewe ibweeni w'omuyiinga ni babaakaanisi beewe, yeekyela indemu.

¹¹Lwanyuma Faraawo walaanga babaandu beewe babaamuwa kamakhula ni naabo babaalakula. Nabo baraambisa kamaani kaabwe ke khuulakula baakhola shishiindu nisho shitweela busa.

¹²Buli mutweela khu nibo waatuuma aasi imiimbo yeewe, tsyoosi tsyeekelamo tsindemu. Ne indemu iya Aroni yaamilaka tsitsaabwe tsyoositsana.

¹³Ne shitweela busa Faraawo waarama nga waaminyaliile Wele, waalekha khuuloondelela byeesi amulakila ta.

¹⁴Umukasya waalomela Musa ari, “Khulwe shikili, Faraawo waalobile khuulekhuula babaandu khuutsya.

¹⁵N'ubukule imiimbo yoowo iyekelamo indemu, utsye isi Faraawo kumukaamba kumutikhinyi, umuliinde nga eekha iluutsi. Muliindile khu ndulo khwe luluutsi.

¹⁶Boolela Faraawo uri, Umukasya Wele uwe ba Heburaniya, waasiindikhile ise isi uli nga aloma ari, ‘Lekhuula babaandu baase batsye, nio banyalise khukhuuntsisaayila ise mu mubiimbi.’ Ne bona khukhwoolisa khu mbuka iyi, iwe s'ulikho urekeeresa byeesi ise inoma ta.

¹⁷Umukasya ali khuutsya khuukhola she kamaani shishookesanisa shiri niye ali Umukasya. Kane ise ikhupe imiimbo yino ili mu mukhono kwase khu meetsi kano ka Nayilo, nako kane keekyelemo kamafuki.

¹⁸Kane tsinyeeni tsoosi tsifwe, ni kameetsi kane kawunye buubi. Mbaawo na mutweela khu ba Misiri ukane anyalise khuunywa kameetsi ako ta.”

¹⁹Umukasya weloosela waalomela Musa ari, “Lomela Aroni awaambe imiimbo yeewe mu mukhono, akyokeselele khu meetsi ke mu Misiri koosi, nio akile buli kameetsi koosi kashuukhe kekyele kamafuki.”

²⁰Musa ni Aroni baakhola nga Umukasya n'abalomela. Aroni wenyusa imiimbo yeewe waakikhupa khu meetsi ka Nayilo, nga umuyiinga ni babaakaanisi beewe baaboone. Luluutsi lwoosi lwaashuukha lweekyela kamafuki.

²¹Tsinyeeni tsyoosi tsyaafwa, ni kameetsi kaawunya buubi naabi. Ba Misiri baalekha khunyalisa khuukanywa ta, naluundi aabawo kamafuki buli aandu oosi mu Misiri.

²²Ne balakusi be mu Misiri baraambisa kamaani kaabwe ke khuulakula, nabo baakhola shishiindu shitweela busa. Nashiryo Faraawo waalekha khuuloondelela byeesi Umukasya aamulakila ta, waarama busa nga okesanisa shikili.

²³Faraawo waafuumbilamo waakobolayo mu lubili lweewe, ne khaba waalekha khwambaasakho ari ashuusekho ta.

²⁴Ba Misiri baalima kamalowo khu ndulo khwe luluutsi Nayilo, nga baweentsa kameetsi ke khuunywa, khulwekhuuba abe kameetsi ke mu luutsi sikanyweekha ta.

²⁵Biifukhu musaafu byaabirawo khukhwaama nga Umukasya n'ashuusa kameetsi ke mu Nayilo khukhwikyela kamafuki.