Read lumasaaba Yobu 10 Bible Online

Yobu 10 - lumasaaba bible

Yobu 10

¹Ise noolile ni khuubiiyila buulamu bwase. Ari khayo ise inganikhe khu shiindu shisheene sheesi ise ndikho nilootsa; khayo ise inganikhe ni liirima liikali liliili mu mwooyo kwase.

²Ise naalomela Wele ndi, iwe ukhaakhalila ise kumusaango ta. Iwe n'umbooleele ise kumusaango kweesi ulikho umbaabila.

³Iwe sishikhwaakhila khukhuumiinikhilisa ise ta, naluundi iwe wamweene walekelesa shishiindu sheesi wamweene wabuumba, nio ndi iwe waaba musangaafu khulwe tsimbomelo tsyeesi baboonaki bakhola ta.

⁴Iwe uli ni tsiimoni nga tsye babaandu? Iwe ubona bibiindu nga babaandu ni babibona?

⁵Iwe buulamu bwoowo buli nga bwe babaandu, namwe nawe umenya kimiiko mikyeekhe nga babaandu ni bamenya?

⁶Shiina kila iwe uweentselesa buubi bweesi ise ikhola, naluundi uweentselesa bibiwaamba khu bwoonaki bwase?

⁷Iwe ukhola ibyo, ikhaba nga iwe waamanyile uri ise s'indikho ni kumusaango ta, naluundi iwe waamanyile uri mbaawo umuundu unyala wambonesa ise khukhwaama khu maani koowo ta.

⁸Kamakhono koowo niko kakaakhootsa ise naluundi kaamuumba, ne bona ari iwe waashuukhilekho ukana khukhuuntsira ise.

⁹Iwe uli ni khuushebulila uri waamuumba ise khukhwaama mu liloba lye khuubuumbamo; ari ukana khukhuuminiangulaka ise niileyo nikyele lifukhuulu luundi?

¹⁰Iwe niye uwawa paapa wase kamaani, waakila niye wasaala ise; iwe niye uwaakila nio ise naatsowela muunda mwa maayi wase.

¹¹Iwe niye uwamuumba ise tsiinyama tsye kumubili kwase ni shikhoba; iwe niye uwaruunga kumubili kwase atweela nga uraambisa kamakuumba ni kimikotyo.

¹²Lwanyuma iwe waamba ise buulamu ni khuukana khukhuukhawawo ta, naluundi buliindi bwoowo nibwo bubukilile ise naabawo nga ndi umulamu.

¹³Ne khana abe iwe wabiikha bibiindu bino byoosi mu mwooyo kwoowo; khana abe iwe uli ni shitsiilililwa she khukhuukhola ise buubi.

¹⁴Abe iwe waliindiilila busa khuubona uri ise ikhola shishoonako umaambilise, nio akile iwe ulekhe khukhuuntsiyakhila ise ta.

¹⁵Ise naamala naakholakho she bubwoonaki ndi, imba nafunile buhangafu ni nawe! Abe nakhaba nga naakholile byeesi iwe ukana, shitweela busa ise sifuna kumwikhoyo ta. Khulwekhuuba ise netsuule kumutaambo, naluundi ise ndi ni khuswaala khuukali naabi.

¹⁶Ise n'imba bari naafunilekho kumwikhoyo, iwe umeentsa ise nga italanyi indafu niweentsa sha khulya; iwe ukhola bye kamakaanga uri nio khuubirira mu bweene umwo, ise ifunilemo khutsiinisibwa.

¹⁷Iwe busheele ureera abo babaantsuntsumilisa ise mu misaango; naluundi weloosela khukhuumaambila ise liirima; nga iwe uweentsa kumukhoosi kumushaakha kwe khukhuuntsibwaakala ise.

¹⁸Shiina kila iwe wandekha nasaalikha khukhwaama muunda ya maayi wase? Ise imba uwafwa busa nga umuundu yeesi ashiili khumbonakho taawe, khali shaminyisa.

¹⁹Ise imba uwaama busa muunda iya maayi ifwa intsya busa mu ŋani, khali shaba busa shitweela nga uyo ukhaamenyakho khu shibala ta.

²⁰Buulamu bwase sibuli aambi bukana khuwawo? Nashiryo indekhe ise imbe! Indekhe ise imbe, nio manya nase naafunakho lukoneele.

²¹Ise naamanyile ndi indi aambi khuutsya iyo isi ikhanyalisa khukhwaamayo naakobola ta, mu shibala shishiilimo ingunyi ni shishiilima,

²²shiibala shishiikhalimo buwaanga ta, she bibiniini ni khutumbuukhana, nga buli aandu iliwo shishiilima she kamaani shonyene.