Read lumasaaba Yobu 12 Bible Online

Yobu 12 - lumasaaba bible

Yobu 12

¹Lwanyuma Yobu weelamo nga aloma ari:

²Mu ŋali, inywe muli nibo liikono lye babaandu, nga inywe mweetsile khuufwa, ni bye kamakhula nabyo bikhaabe byafwiile.

³Ne nase ndi ni khuumanya khukhuuli nga khukhweenywe. Ise s'iindi uwe aasi khus'iinywe ta. Naanu ukhaamanya bibiindu byeesi mukanikhile ibyo byoosi?

⁴Ari ikhaaba basaale baase babeene balikho bantsekhelela ise; bantsekhelela ise, abe uloomba Wele waantsilamo, ise ukhalikho kumusaango namwe shishoonako ta, ari ise niye isi balikho batsekhelela.

⁵Abo babaali buulayi batsekhelela abo babaakwa mu bihangafu; buhangafu busheele bukwa khu baandu babaali mu bihangafu khaale.

⁶Tsiingo tsye babaandu babaanuula bibiindu bye babaandi tsimenya mu lukoosi, ni naabo babaali baboonaki sibalikho ni buhangafu bwoositsana ta. Kamaani kaabwe kali niko wele waabwe isi beyikina.

⁷Ikhaba biisolo bye mwiiswa bili na biikali byeesi binyala byaabaleekela inywe; ikhaba binywiinywi bye mu ngaaki binyala byaabaleekela inywe.

⁸Namwe abe mwakhareeba bibiindu bibiitsowa khu shibala, binyala byaabaleekela inywe bibiindu biikali; ikhaba tsinyeeni tsitsiili mu meetsi tsinyala khuubaleekela inywe.

⁹Mu bibuumbe ibyo byoosi, iliwo shisihikhamanyile shiri Wele niye ukilile bibiindu bino byoosi byakholikha?

¹⁰Buulamu bwe shibuumbe shoosi, ikhaba bwe babaandu boosi, buli mu makhono keewe.

¹¹Shili busa nga kamaru ni kawulila tsilomo tsyeesi baloma, ne lulimi lwamanya nga bibiindu ni bibyanula namwe ni bibyaluluwa.

¹²Abo babaali ni kimiiko kye bukhulu kimikali, bali ni kamakhula; kimiiko kyaabwe kibanyalisa khuumanya bibiindu biikali.

¹³Ne Wele ali niye kamakhula ni kamaani; niye ambaasa bibiindu biikali naluundi ali ni khuumanya.

¹⁴Nga Wele waakhalilewo khukhwoonakisa shishiindu, mbaawo umuundu unyala khushoombakha sheelawo bushaakha ta. Nga niye waaboyile umuundu mwipuusu, mbaawo unyala waamurusamo ta.

¹⁵Nga niye wahaambiliile ifula, iba singene ikhupe ta; ne nga waakilekhuulile, kameetsi kasalasala khu shibala shoosi.

¹⁶Wele ali ni kamaani naluundi ali ni kamakhula; uyo uwoombesa basheewe, ni nooyo isi bawoombesa, boosi bali aasi e bunyala bwa bweewe.

¹⁷Niye urusa khu bawuli kamakhula waakila baarama nga bali busa, naluundi waakila baakayi bekela baasilu.

¹⁸Abo babaali bayiinga, Wele abarusakho buunyala bwaabwe, waakila bekela busa khuuba baakulwa.

¹⁹Niye arusa khu basaayi kamakhula waakila baarama nga bali busa, naluundi be kamaani niye abarusakho bunyala bwaabwe.

²⁰Niye akila babaandu babeyikinwa baalekha khubakho ni sheesi bakanikha ta; naluundi abo babaali ni kimiiko kye buukhulu kimikali, niye abarusakho kamakhula ke khuunyalisa khuukhalawo shiilayi ni shiibi.

²¹Wele alekelesa abo babaali baawuli, abo babaali be kamaani niye abarusakho buunyala bwoosi.

²²Niye ubiimbula shishiilima shishiili imakoombe, naluundi waashuusa shishiilima sheekela buwaanga.

²³Wele niye ukila kamanaambo kaabalaaha, naluundi niye ukila kaawetsekhelela kekyela kamakyeekhe. Niye ukila kamanaambo kaaba ni kamaani, naluundi niye ukila babaandi baakafuura mu busoolo.

²⁴Niye arusa kamakhula mu baraangirisi be babaandu khu shibala, waakila bayiiyana busa nga sibamanya sheesi balikho ta.

²⁵Baraangirisi abo batsya babuukabuuka busa nga umuundu uuli mu shiilima; baatsya bataalataala busa nga umuundu umumeesi.