Read lumasaaba Yobu 13 Bible Online

Yobu 13 - lumasaaba bible

Yobu 13

¹Khayo ise imbaboolele: byeesi mulikho muloma ibyo ise naabibona naluundi naabimanya byoosi.

²Byeesi inywe mwamanya, ise nase naabimanya; ise s'iindi uwe aasi khus'iinywe ta.

³Ne ise ndikho inganikha isi Wele, akhuba isiinywe ta; ise ingana niwotsekho kumusaango kwase isi Wele.

⁴Ne ari inywe mukanikha bye bubeeyi khuubimbilila bya ŋali. Inywe muli bakaangi babaakhanyala bakaanga bawonesa umutsiina ta.

⁵Iba nga shishinyalikha khali musilile busa, nio manya mufwaana nga babaandu babaalimo kamakhula.

⁶Ari inywe rekeeresa bitsiilililwa byaase, murekeerese buulayi nga ise ni nilootsa mu musaango kwase.

⁷Shiina kila inywe mukanikha bye bubeeyi mu lisina lya Wele? Shiina kila inywe muwombesa busa mu lisina lyeewe?

⁸Ari inywe mulikho mukhakakho khuumubeela niye? Inywe mulikho mukana muwotsele Wele kumusaango?

⁹Ne niye nikane abemenielese inywe kane anyoolemo shiilayi shoosi? Namwe naye kane mumuwombese nga ni muwombesa babaandu basheenywe?

¹⁰Ilala, ilala, n'iiba bari mulikho mumuseemba niye mu shimoonyo busa, kane niye abekiitse inywe.

¹¹Singene shiriifwa sheewe she angaaki shikile inywe munikine? Naluundi singene buuri bubawaambe inywe khulweewe?

¹²Byeesi inywe mukanikha khuubirira muundikha tsyeenywe imbaamo itsamu ta, bili busa nga kumukhaambiitsi. Ni tsilomo tsyeesi inywe muraambisa khukhwitseeta mwabeene, sitsitsya ni mukhuru ta.

¹³Ni musile busa muumbe ise ikhabi inganikhe, ise siniinaanayo oba shiina shishinaakholikhakho ta.

¹⁴Ise ndi umwirekefu khuwaanayo buulamu bwase; khuukhola nga samweene n'iingana.

¹⁵Abe ikhaba nga waakanile, anyala waantsira na khuuntsira; ise ari naweelemo kumwiyikino kwoosi. Ne shitweela busa kane ise niwotsekho mu moni tsyeewe.

¹⁶Manya winyoola bunyindaalifu ubwo bunyala bwaakila ise nawonesa buulamu bwase. Khulwekhuuba mbaawo umwoonaki unyala wesungula khukhwiima mu moni tsya Wele ta.

¹⁷Ari rekeeresa buulayi bubweene byeesi ise ndikho inoma; ni mwimenielese byeesi ise ndikho isontsoola.

¹⁸Bona, ari ise naamalile khaale khurengekharengekha kumusaango kwase; naamanyile ndi kumusaango singene kufuure ise ta.

¹⁹Naanu uli khuutsya khukhaandisana ni nase mu moni tsy'omukayi? Abe noola kumusaango kwafuurire, ise ndi mwirekefu khukhwakamisa khuukhaandisana, isile busa naluundi indi mwirekefu khuufwa.

²⁰Ise ndi khuukhuloomba indi iwe ukholele ise bibiindu bibili byonyene; nga iwe waafukiilisile bibyeene ibyo, ise singene nibise khukhwaama isi iwe ta.

²¹Iwe ni waakamise khukhuumba ise shitaambiso, naluundi iwe ni waakamise khukhuundeerera ise khukhwiyembeelela.

²²Nio lwanyuma kane uri iwe ukanikha, nase ikhwiilemo. Namwe kane uri ise inganikha, nawe untsilemo.

²³Tsifuunda tsiinga tsyeesi ise ikholele bibyoonako, namwe bibiindu byeesi iwe ukhakana ta? Iwe n'untsokesanise ise mu byeesi ikhaasikhanile, ni bibyoonako byase.

²⁴Shiina kila iwe ukhalalila ise? Shiina kila iwe umbirisa ise nga umusiku woowo?

²⁵Shiina kila iwe ukila ise naaba ni khuurya khuukali, nataamukha busa nga imbewo n'iyila lisaafu lilyoomu? Iwe uli busa nga uuli khuuloondelela likhuutsi lyeesi imbewo ilikho iwuutsa.

²⁶Khulwekhubeela iwe wamboyilekho ise kimisaango kye kamaani naabi, naluundi iwe waakiwandikhile mu shitabo. Iwe waakilile ise ndikho ishebulila bibyoonako byeesi isi nakhola nga ni naaba umusoleeli.

²⁷Iwe wambowelesile biikele byase siinyala nakyeenda ta, naluundi iwe wimenielesa buli sheesi ise ikhola. Iwe unoondakho nga wimenielesa buli aandu isi ise ikhaandakile shikhaandakilo shase.

²⁸Ikhumaliilisa ise nawetsekhelela busa nga kuusaala kukwabola, naaba busa nga shikwaaro sheesi kamake kaamala khaale khuulya.