Read lumasaaba Yobu 14 Bible Online

Yobu 14 - lumasaaba bible

Yobu 14

¹Umuundu usaalikha mu mukhasi ali uwe bifukhu bikyeekhe biri, naluundi waayitsula kumutaambo kumukali naabi.

²Atsowaka waabalaaha nga shimuli, ne lwanyuma waaniaala, wooma. Lwanyuma akoranawo nga shishiniini ni shikoraanawo, waalekha khubonekhakho luundi taawe.

³Iwe unyala uryeena woomiisila tsimoni tsyoowo khu muundu nga uyo aryo, naluundi waamuyila mu baakayi khuumuwotsisa?

⁴Naanu unyala waarusa shishiindu shishiili shimiliwu khukhwaama mwiisho shishiili she mbikho? Mbaawo unyala waashikhola ta.

⁵Iwe waakhalawo bukali bwe kimiiko kyeesi umuundu ali ni khuumenya khu shibala; iwe wamanya kimyeesi kyeesi ali ni khuumala khu shibala; iwe waakhalawo khaale, mbaawo unyala waatuumisawo ta.

⁶Iwe muwekho naye imbuka, nio naye anyalise khuuba mu lukoosi, nio angoloobe naye anyalise khuwolakho nga waamaliilisile buraambi bweewe.

⁷Khulwekhuuba baakharema kuusaala kwaakwa aasi ne iliyo kumwiyikino, uri kunyala kwaarubura luundi, naluundi tsiindi tsyakwo sitsifwa ta.

⁸Abe tsiindi tsyakwo tsyakhamenya mu liloba aasi, ni kutsikhi kwakwo kwabola,

⁹ne nga kameetsi kakuronyirekho, kurakho kamasaafu kwaaba busa nga shisaala shishaanakhe.

¹⁰Ne umuundu afwa, waalekha khubakho ni kamaani koositsana ta; ari shiina shishikholikha nga waamalile khuufwa?

¹¹Nga inyaantsa iyomelela, namwe luluutsi lulwomelela kameetsi kaakama khuutima,

¹²nisho shitweela busa nga umuundu ufwiile, s'enyukha luundi taawe. Umuundu uyo arama nga umufu khukhwaama liikulu ni liba lishiiliwo, namwe wenyukha khukhwaama awo isi ali ta.

¹³Shinyalikha khali iwe umbisile ise mu shibala she imakoombe; ni umbisile ilala ise ibweene iyo khukhwoolisa nga liirima lyoowo lyaweele, nio ukelewo urewo imbuka iye khukhushebulililamo ise!

¹⁴Umuundu nga waafwiile, anyala wekela umulamu luundi? Ise kane iniinde abe yakhaba khukhwoolisa liina, khukhwoolisa nga umuundu weetsile wasikuule ise.

¹⁵Abe noola iwe waakanile khukhuumbona ise, shibuumbe shoowo; iwe nga wanaangile, kane nase ikhwiilemo.

¹⁶Khulwekhuuba nio lwanyuma lwayo kane iwe ube umuliindi wase, nio ulekhe khukhwimenielesa bibyoonako byase ta.

¹⁷Iwe kane untsiyakhile bibyoonako byase, ubiibilile; iwe ubiimbilile naluundi ubise bibyoonako byase.

¹⁸Ne tsingiingi tsikwa lwanyuma tsyawumbukhaka, ni lulwaanda nalwo lunyala lwaarura mu shifwo shalwo;

¹⁹kameetsi kalya libaale lyaweelela; ifula iye kamaani ikhuya liiloba yaatsya ni nalyo; ni musaambo niyo ndweela, iwe urusawo kumwiyikino kw'omuundu.

²⁰Liina na liina iwe uminya babaandu kamaani waakila baakoraanawo; bafwa bashuusakho mu moni, uryo waabarusawo baatsya.

²¹Babaana beewe baakhakelawo baafuna biriifwa, niye s'anyala waashimanya ta; abe bakhaamenya mu khuswaala, niye s'anyala waashimanya ta.

²²Niye awulila butsiina bwe kumubili kweewe kumweene yenyene, waalila khulwe kumutaambo kweewe yeenyene.