Read lumasaaba Yobu 15 Bible Online

Yobu 15 - lumasaaba bible

Yobu 15

¹Lwanyuma kila Elifasi abe uwaama i Tema, elamo nga aloma ari:

²Yobu, sishiba shilayi umuundu uwe kamakhula nga iwe, khuukanikha tsiinganikha tsitsikhalimo itsamu nga tsino ta.

³Shiina kila iwe utsya nga ukhaandisana mu biindu bibikhalimo itsamu, namwe mu bilomo bibikhakhuyeeta iwe ta?

⁴Ilala, iwe khufukiilila khwoowo mu Wele, khwaakhuweelemo; iwe ulikho ushikhola khuuba shihangafu isi umuundu yeesi, khuloomba isi Wele.

⁵Khulwekhuuba isaambo isi iwe ukanikhamo, yookesanisa bubwoonaki bweesi iwe ukhola; khulwekhuuba inganikha yoowo yokesanisa iri luulimi lwoowo lukhupila eyi ni neeyi.

⁶Isaambo isi ukanikhamo inyene niyo iyokesanisa iri iwe uli ni kumusaango, akhuba ise niye ulikho uloma ta. Tsilomo tsyoowo tsinyene nitsyo tsitsikhukhaliile kumusaango.

⁷Yobu, iwe wambaasa uri iwe niye umuundu umukiboole uwanyoowa khuusaalikha khu shibala? Namwe wambaasa uri iwe wasaalikha nga Wele ashiili khubuumba ni tsingiingi ta?

⁸Nga Wele ni baarume beewe baaba mu lubuusano lwaabwe mwikulu, nawe wabamo warekeeresa byeesi bakanikha? Iwe wambaasa uri iwe wenyene niye uli uwe kamakhula?

⁹Shiina sheesi iwe wamanya, sheesi ifwe khukhaamanya ta? Iliwo sheesi iwe utekeela khukhufuura ifwe?

¹⁰Bona iliwo baasakhulu be tsiifwi ni naabo babaali be kimiiko kimikali musiifwe, ni khuuminyisakho kya paapa woowo.

¹¹Iwe sishikhumala Wele umweene khuukhuwoleelesa iwe, namwe isaambo indaayi iy'ambola busa isi ifwe khukhukanikhileyo ta?

¹²Shiina kila liirima likhuuniinaniina, naluundi shiina kila tsiimoni tsyoowo tsirandaarire?

¹³Shiina kila iwe ukhalaliile Wele, waakila iwe waakanikha biilomo bibiifwaana nga ibyo?

¹⁴Iliwo umuundu unyala khuuloma ari baamala khaale khumupyeluusa, namwe ari s'aalikho ni kumusaango isi Wele ta?

¹⁵Bona, Wele s'eyikina ikhaba baarume beewe baakhosefu ta; mu moni tsyeewe ikhaba liikulu shilili lipyeluuse ta.

¹⁶Kumwiyikino kwa Wele isi umuundu kuli mukyeekhe naabi ni khuuminyisakho, khulwekhuuba umuundu s'aalimo kumukaso ta, naluundi akhola bye bubwoonaki.

¹⁷Yobu, iwe rekeeresa byeesi ise inoma, khayo ise ikhwookesanise iwe byeesi ise imboone; ise ingana khuubira byoosi mu moni tsyoowo.

¹⁸Ise ingana ikhuboolele iwe byeesi babaandu be kamakhula bamboolela ise, naluundi bye kamakhula byeesi bakuuka baabwe baamala khaale khurumbura.

¹⁹Nibo bonyene babaaweebwa liiloba lye khuumenyamo, alekha khubawo umwiitswa na mutweela khuukhalisamo ta.

²⁰Wele awa babaandu baboonaki shitaambiso mu bulamu bwaabwe bwoosi nga bashiili baalamu. Babaandu bano bakhaataambisibwe mu buulamu bwaabwe bwoosi, khulwekhuuba bamiinikhilisa bashaabwe.

²¹Mu maru kaabwe bawulila kamakono kakaabareerera kamariisyo; naluundi isi bambaasila bari bali mu lukoosi, awo niwo isi umunuuli abakwakho waabebwakala.

²²Sibalikho ni kumwiyikino kwe khuumanya oba balikobola khukhwaama mu shiilima namwe ta; khulwekhuuba iliwo ubebuuliile ubaliindiliile khuubeera.

²³Tsiingosya kane tsimulye niye nga wafwiile; weyembeleele ari iliwo umuundu ukana khumwiira.

²⁴Kumutaambo n'ingunyi byaayikhala bimwiyembelesa, ali busa nga umuyiinga isi bali khuutsya khukhwiibwakala.

²⁵Ilomo ikila bino byaamukholikhakho ili indi, niye aba wesunguule khuukhaandisa Wele; naluundi niye eyila nga umunyindaalifu mu moni tsya Wele, umunyali uwa byoosi.

²⁶Okesanisa shikili she angaaki naabi nga n'akhaandisa Wele, akhakakho khukhwiitseeta umweene, nga n'atima khuutsya khukhwibwakala Wele.

²⁷Khulwekhuubela ali umuyiindifu waalya waawamo ni kumukaso; naluundi kumubili kweewe kuyelayela busa.

²⁸Amenya mu biriimba byeesi buli mutweela amanyile ari bikhekele kamakubili. Amenya mu ntsu tsyeesi ikhaalekhe khubawo umuundu utsimenyamo ta, tsyeesi buli muundu amanyile ari tsikhekele kamakubili.

²⁹Umuundu uyo s'akhaabe umuyiindifu taawe; buyiindifu bweewe sibukhaabewo khuumala imbuka indeeyi ta; ikhaba buyiindifu bweewe sibukhamalaatane shiibala shoosi ta.

³⁰Alobile, akanile, akhaafwe; akhaabe busa nga kuusaala kweesi kumulilo kwoosha tsisakya tsyakwo; ni kumuukha kweesi Wele akhaaheele kukhaamuwuutse niye atamuukhe.

³¹Niye ewombesa umweene, nga eyikina bye bubwoonaki bweewe; nio lwanyuma bye bubwoonaki ibyo bibe nibyo kumukheemba kweewe.

³²Nga imbuka yeewe ishiili ni khukhwoola ta, akhaniaale busa nga kuusaala; kweesi ni tsisakya tsikhanyala tsyeelamo tsyarakho kamasaafu ta.

³³Akhaabe busa nga kumuzabibu kukulakasa bibyaamo byakwo nga bishiili khuroba ta; nga kuusaala ku olivu ni kulakasa kamasaafu kaakwo.

³⁴Abo babaakhesaaya Wele ta sibakhaabekho ni lisaaye ta; ni kumulilo kukhooshe tsiingo tsyaabwe tsyeesi boombakha, khuubirira mu bulyakhani.

³⁵Babeene bano bakhola tsinengarengekha tsye khuukhola bibiindu biibi, waakila mwaamilamo bubwoonaki; naluundi kimyooyo kyaabwe kyayitsula khuwombesa.