Read lumasaaba Yobu 16 Bible Online

Yobu 16 - lumasaaba bible

Yobu 16

¹Lwanyuma Yobu weelamo nga aloma ari:

²Ise naamalile khuuwulila khu biindu bibifwaana nga ibyo; mu shifwo she khukhuuntsisamo ise kamaani, inywe mulikho mundeerera busa kumutaambo.

³Kane inywe mwoolise liina ni tsinganikha tsyeenywe tsitsikhalimo kumukaso itsyo? Shiina shishibaakalisa inywe kila munganikhayo musaambo iyo?

⁴Muba nga inywe nibo babaali nga ise n'iindi ana ari, khali nase inganikhile nga inywe ni mulikho mukanikha muryo, khali nase inganikhile bibiindu nibyo bitweela bibibawaamba khus'iinywe; naluundi mu khubatsekhelela, khali nase imeseele luulimi.

⁵Khali nase imbakanikhiile inywe biilomo bibibeesamo inywe kamaani; naluundi niilosela khuukanikha nga imbesaamo kamaani.

⁶Abe ise naakhakanikha, butsiina bwase singane bushendeele ta; abe naakhasila busa, mbaawo shishishuukhakho ta.

⁷Ilala, ari ise Wele iwe waamalilemo kamaani koosi; iwe weerire babaandu be intsu yase boosi.

⁸Iwe wamaambile waangumisiile ilala; khuuniaala khwe shikhoba she khu mubili kwase, shookesanisa shili ise ndi ni kumusaango.

⁹Wele angubyeenga ise naluundi wandyenuulakamo nga isolo n'ityenuulakamo isaanyi yayo; waambiyiila ise luukali naabi. Andoleelela waantsomiisilakho tsiimoni tsyeewe, ise nafwaana busa nga umusiku weewe.

¹⁰Babaandu nga bamboone ise beyaanga baasamilila busa; baakhomyaasa ise naluundi baakhupa tsiimbi khu saya tsyase, boosi baantsibuusanakho baantsibwakala.

¹¹Wele ambaanayo ise mu makhono ke babaandu baboonaki, akholowa ise mu meeno ke babaandu baabi.

¹²Ise abeele imenya mu lukoosi, ne Wele waaminiaangulakamo; waangumiile ise mwikosi waangolowa aasi khu liloba, wanaambisa ise nga she khukhwiyikilakho khuulasa buyiingo.

¹³Babaandu beewe babaalasa buyiingo baantsibotokhelela ise. Niye alasa buyiingo bweewe bwantsingila muumbiko tsyase mukari, waakila indulwe khukhwaama mwibili mwase yatsutsukha aasi khwiiloba.

¹⁴Niye antsinisa ise nga elaŋanamo busa; antsibwakala nga umusilikhale uwe kamaani ukhalimo shiisa ta.

¹⁵Ise nakwaara bikwaaro bye babaalila baafu bimenya khu mubili kwase;[1] Wele waaminakiile ise aasi mu lifukhuulu.

¹⁶Tsiimoni tsyase tsyabiimbile khulwe khuulila, khukhwoolisa bona ari ise ndikho imbona bibiilima busa.

¹⁷Bibiindu bino byaakholikhile khus'iise ikhaba nga mbaawo sheesi ise noonakile ta; ikhaba nga mu khuuloomba khwase isi Wele, ise imuwa niye shiriifwa.

¹⁸Ise ndi busa nga umuundu isi bakhoonyele nga s'aalikho ni kumusaango; ikhabawo ubiimbilila kumusaango kwe khukhukhoonya ise ukwo ta. Ikhabawo umuundu yeesi unyala khukhuusilisa ise mu khukuukuula nga imeentsa bwa ŋali ta.

¹⁹Bona, ikhaba ana ari, umujulisi wase ali mwikulu mu ngaaki, uyo ukane ambotsele ise kumusaango ali angaaki naabi.

²⁰Basaale babeene baaba nibo babaantsekhelela ise; ne Wele niye isi ise ndilila kamasika kaase.

²¹Ise nikoomba ndi khali ibeelewo umuundu uwikoontselela Wele khu lweefwe; nga umuundu n'ekoontselela khulw'omusaale weewe.

²²Khulwekhuuba lwaanyuma lwe kimiiko mikyeekhe kiri, ise ikhaafwe intsye, indekhe khubawo luundi ta.