Read lumasaaba Yobu 18 Bible Online

Yobu 18 - lumasaaba bible

Yobu 18

¹Lwaanyuma Bilidaadi abe uwaama i Shuwa, weelamo Yobu, nga amulomela ari:

²Kane iwe ukanikhe bibiindu bino nga siwaakamisa ta, khukhwoolisa liina? Byambaasekho usile busa, nio nafwe khuukanikhe.

³Shiina kila iwe wambaasa uri ifwe khuli busa nga tsiisolo tsye mwiirome, tsitsikhanyala tsyaakanikha ta? Shiina kila iwe ukhuloleelela ifwe wambaasa uri khuli baasilu?

⁴Yobu, iwe liirima lyoowo lilyeene nilyo lilikhureerera iwe butsiina. Iwe wambaasa uri babaandu kane batitukhe baantsukhe shiibala bari khulwekhuuba iwe wakhalaale? Iwe wambaasa uri Wele kane asheende kamabaale khukhwaama mu bifwo byako, bari akhusangaase iwe?

⁵Abe iwe waakhaloma tsiinga nga wiikholisa busa, ne umuundu umwoonaki afwa mu saambo imbi naabi. Buuwaanga bwe kumulilo kweewe sibwiilamo bwaakhosa luundi ta.

⁶Buwaanga bubuuli mu liweema lyeewe bwiikela shishiilima; naluundi itaala imumulikhila niye isima, yaalekha khukhwaburukha luundi ta.

⁷Umwoonaki akeenda nga s'aali ni kamaani ta; naluundi afuna biihangafu khulwe khukhwiyikaana kamakhula keewe umweene.

⁸Khulwekhuuba niye umweene akeenda weengila mu mureko; aryo akeenda umweene waakwa mu lilowo.

⁹Kumureko kumuwaamba tsiikhukunyu tsyeewe, kuwaamba kwoomisila ilala.

¹⁰Ikhaba aasi khu liloba iliyo kumureko kweesi baaba baamurekire, kumureko kweesi baaba baarekire khuuntsila yeewe.

¹¹Kamariiso kamwibotokhelela khu buli lubeka, naluundi kamulondelela buli oosi isi niye atsya.

¹²Amataayi yaba ali ni buyiindifu, ne ari ali busa intsala; buhangafu bwamuliindiliile khu buli lubeka khumura aasi.

¹³Bulwaale buubi naabi bwamalaatana lihaafu lye kumubili kweewe; bwaakila kamakhono keewe ni biikele byeewe byarakikha khuubola.

¹⁴Baamukhweesa baamurusa muuntsu isi amataayi aamenyatsakamo mu lukoosi; kamariiso kaamukhweesa kaamuyila khuutsya khumwoolisa isi khuufwa khumenya.

¹⁵Ari uyo unyoolile yeesi anyala khuumenya muuntsu y'omwoonaki; khulwekhuuba muungo mweewe basalanisamo buunoro.

¹⁶Kimili kyeesi niye amala khaale khukhwikhisa mu liloba kyooma; ni tsiisakya tsitsiili khu ngaaki tsyaniaala.

¹⁷Mbaawo umuundu na mutweela khu shibala ushebulila umwoonaki taawe; khuumanyikhana khweewe khukoraanawo buli aandu oositsana.

¹⁸Bamwaamisa mu buwaanga baamukholowa mu shiilima; baamutimisa khukhwaama mu shibala waatsya imakoombe.

¹⁹S'aalikho n'umwaana namwe lisaaye lyoositsana taawe; namwe umuundu yeesi uwaramawo iyo yeesi amenyaatsaka taawe.

²⁰Ibyo bibyamukwakho niye bikheyangise busa kimiboolo kikiili khukhwiitsa muumoni; ni kamariiso kawaambe abo babaama ibukwanyaanga.

²¹Ilala iyo niyo intsakamo iy'omwoonaki; iyo niyo intsakamo iy'abo babaakhenaanayo khu Wele ta.