Read lumasaaba Yobu 19 Bible Online

Yobu 19 - lumasaaba bible

Yobu 19

¹Nio lwanyuma Yobu weelamo nga aloma ari:

²Inywe kane mwoolise liina nga mundeerera ise kumutaambo, ni khukhuumboolela biilomo bibiimalamo ise kamaani?

³Buli imbuka ni muba mukanikha, mulikho mukhomyaasa ise, naluundi inywe kamaŋaanyu sikabawaamba mu khukhomyaasa ise ta.

⁴Abe ikhaba bari shili shituufu shiri ise naakhola bye bubwoonaki, ne bubwoonaki ubwo burama ni nase samweene.

⁵Abe mwakhaba nga mulikho muntsiyiingilakho, naluundi mwaabona kumutaambo khuuba nga kwamiile mu bwoonaki bwase,

⁶inywe simubona muri Wele niye ukholele shino ta? Niye waarekire kumureko khukhuumaambilisa ise.

⁷Bona abe ise naakhelootsa nga indila khulwe shisaayuumba sheesi ise ndi khuubiramo, mbaawo urekeeresa ta; ise naakhalila indi balikho baamiinikhilisa, mbaawo urekeeresa ta.

⁸Niye wakhingiliile khu ntsila yase ibweeni, ise mbaawo isi inyala naabirira ta; naluundi wawaambile kumukhoosi kwase waakubisile mu shiilima.

⁹Niye waandusilekho ise shiirifwa sheesi abe indi ni nasho; woonakisile ni lisina lyase.

¹⁰Niye abeelelela nga akhuupa ise khukhwaamila khu buli luwaande; naluundi wakhuula kumwiyikino kwase waakurusawo, nga umuundu n'akhuula kuusaala.

¹¹Wele wamaambiile ise liirima lye angaaki naabi, naluundi niye ambila ise khuuba nga umusiku weewe.

¹²Liiye lyeewe liitsila atweela; lyoombakha kumukhoosi nga lilola isi ise ndi, lyebotokhelela shiifwo sheesi ise ingonamo.

¹³Wele waakila baalebe baase babeene bantsibebeya ise; ni basaale baase babeene baambila ise nga umuundu isi bakhaamanya ta.

¹⁴Baalebe baase boosi baatsya khaale; ni basaale baase baayintsibilila ise.

¹⁵Abo beesi ise imenyisa muuntsu yase baayintsibilila ise; ikhaba baraambi be muntsu yase bambona ise nga isi bakhaamanya ta; ari ise naayikela umwiitswa muumoni tsyaabwe.

¹⁶Abe nakhalaanga mutweela khu baraambi baase, sibaantsilamo ta; abe nakhamwikoontselela indi eetse anjeete.

¹⁷Ikhaba n'umukelema wase s'aanyala weekhaliilikha ta, khulwekhuuba ise imbunya mukhanwa; ikhaba bayaaya baase babeene sibanyala bantsisyeenda aambi ta.

¹⁸Ikhaba babaana bakyeekhe bandekelesa ise; nga nenyukhile khu ngaaki, baanganikho tsilomo tsiimbi.

¹⁹Basaale baase boosi batataya khukhuuntsitsayo; ni naabo abe beesi ise ingana naabi ari sibangana ise ta.

²⁰Ise ari nateenya naarama kamakuumba busa; naluundi nawoneele akyeekhe naabi khuufwa.

²¹Basaale baase, inywe ni mumaambile ise shiisa, ni mumaambile shiisa; khulwekhuuba kamaani ka Wele kaakhupile naakwiile aasi.

²²Shiina kila nanywe mulikho muumba ise shitaambiso, musaambo niyo indweela nga Wele n'aalikho akhola? Inywe simwambeele ise shitaambiso shishiimala ta?

²³Ise nekoomba indi abe yabawo umuundu unyala khurona biilomo byase; khali ibeelewo uyo ubirona biba mu shitabo.

²⁴Namwe ibawo ubibeetsela khu libaale; babibeetsa ni shishiindu shishooki, nio akila bibawo biilo ni biilo.

²⁵Khulwekhuuba ise naamanyile indi umuwonesi wase aliwo mwikulu, ali umulamu; ikhumaliilisa akhenyukhe khu ngaaki abe umujulisi wase mu musaango.

²⁶Ikhaba nga buulwaale buubi naabi bwaamalile khuulya shiikhoba she khu mubili kwase, ne nga ishili umulamu, ise samweene ikhaabone Wele ni tsimoni tsase.

²⁷Ise samweene, akhuba umuundu ukuundi ta, samweene niye ukhaamubone; imubone ni tsiimoni tsyase. Kamaani kaase kawetsekhelela, nga iwe waalomile uri:

²⁸“Ifwe kane khumukubyeenge niye mu saambo shiina? Khulwekhuuba kumusaango kuli khu niye.”

²⁹Ne ari, uli ni khuuba ni khuurya khuukali khulwe luurima; luurima lulureera liirima lya Wele isi baboonaki; nio akile iwe umanye uri iliwo khuukhala kimisaango.