Read lumasaaba Yobu 20 Bible Online

Yobu 20 - lumasaaba bible

Yobu 20

¹Nio lwanyuma lwe biilomo ibyo, Zofari abe uwaama i Namasi weelamo nga aloma ari:

²Khulwekhubeela bibiindu byeesi iwe ukanikhile byaantsiinisile naabi kumwooyo, ise ingana khukhwiilamo.

³Byeesi iwe ulomile bili busa biilomo bibikhomyaasa, ne ise naamanyile isaambo iye khukhwiilamo.

⁴Ilala, ilala, iwe washimanya buulayi bubweene uri, khukhwaama nga umuundu n'abuumbibwa wareebwa khu shibala,

⁵umwoonaki aba ni kumwikhoyo mukyeekhe kuri, naluundi khusangaala khw'omwoonaki sikhumala imbuka indeeyi ta.

⁶Abe umwoonaki akhaleeha woola mu ngaaki, naluundi kumurwe kweewe kwaatsya kwoola mu mafuumbi,

⁷ne naye akhaakoraanewo busa nga lufuumbi, abo abe babaamubona bakheyaange busa nga bereeba bari, “Waatsya waahena?”

⁸Umwoonaki akoranawo busa nga kamarooro ke mu shilo, waalekha khubonekhakho luundi ta; bamutimisa waakoraanawo nga kamarooro ni kakoraanawo.

⁹Abo abe babaamubonatsakakho sibeelamo khuumubona luundi taawe; namwe s'elakho waamenya mu shifwo sheesi abe amenyatsakamo ta.

¹⁰Babaana b'omwoonaaki balitimaka isi abo babaali bataambi bari nio bafune buyeeti; naluundi balikhakakho balihe ibyo byeesi baanuula khukhwaama khu bataambi.

¹¹Kimibili kye bataambi abe kyaayitsulamo kamaani, ne aambi ari kili aambi khukhwikela lifukhuulu.

¹²Ikhaba nga niye shimuŋaayila khuukhola bye bubwoonaki, weloosela khuubikhola nga umuundu uulya shishiindu shishimunuliile,

¹³ikhaba nga enonesa waalekha khukana ari shiwewo ta, waarama nga waashikukhuliile mukhanwa mweewe,

¹⁴ne shitweela busa uri biilyo ibyo byoola muunda mweewe, byeekela bibiiluluwile; byaaluluwa byaaba busa nga indulwe inyene.

¹⁵Umwoonaki ali ni khuukhaasa bye buyiindifu byeesi amala khaale khunuula; Wele abibukula ikhaba khukhwaama muunda tsyaabwe, waabiisilayo babeene baabyo.

¹⁶Byeesi umwoonaki elolopa bili busa nga buutwa bubweene; khulwekhuuba bimwiira khaangu busa nga butsiba bwe indemu.

¹⁷S'aamenyawo buulamu buuleeyi khukhwoolisa waabona biilayi bibyaama mu mikuunda, namwe waabona liikesa liikali lyeesi bafuna ta.

¹⁸Ali ni khuulekhuulila babaandi bibiindu byeesi niye umweene aamala khaale khuutitikhanila, niye umweene alekhe khubilyakho ta; naluundi niye mbaawo sheesi akhalyeekho khukhwaama mu mafuurisa ke bibiindu byeesi akulaanamo ta.

¹⁹Shino shili khulwe khumwiikhilisa naluundi khuulekha khukhwiinaanayo isi bataambi ta, nga yaaba akulukhila busa tsiintsu tsyeesi babaandu babaandi boombashile, waatsimenyamo.

²⁰Umwoonaki singane anyalise khuuwonesawo ikhaba shishiindu na shitweela mu byeesi ali ni nabyo ta, khulwekhuuba ali ni kumukhabyo kwe kamaani.

²¹Nga umwoonaki waaliile shishiindu, mbaawo sheesi aramisakho ta; ni nashiryo buyiindifu bweewe bwaakamayo.

²²Nga woolile mu mbuka isi ambaasa ari ali na buli shitweela, awo niwo isi kumutaambo kwiitsila; bihangafu bya buli shikuuka bimwiibwakala byaamwibotookhelela.

²³Lekha umwoonaki alye isho shoosi sheesi niye akana! Ne khulwe liirima liikali, Wele akhaamuwe shitaambiso.

²⁴Ni kane akhakekho ari atitukhe khukhwaama khu basilikhale babaali ni bye busoolo nga kamafumo; kane abo babaali ni buyiingo bamulase.

²⁵Buuyiingo bwingila mu mubili kweewe; bisiintsa bye buyiingo bibimelamela byaroonya busa ni kamafuki, waakila kamariiso kaamuwaamba niye.

²⁶Buli shishiindu sheesi niye ebiikhisila umweene shonakisibwa; naluundi kumulilo kukuukhamanyikhaane isi kwaama ta, kumwoosha niye umweene atweela ni be muungo mweewe.

²⁷Liikulu lyokesana abulafu bubwoonaki bweewe ni shiibala shiwaanayo bujulisi bubumutsuntsumilisa.

²⁸Khu shifukhu khweesi Wele akhokesanilekho liirima lyeewe, bakhaasute buyiindifu bwe muntsu yeewe batsye ni nabwo.

²⁹Ukwo kuli nikwo kumukabo kw'omwoonaki khukhwaama isi Wele, kuli kumukabo kweesi Wele aamala khaale khuumubiikhila niye.