Read lumasaaba Yobu 21 Bible Online

Yobu 21 - lumasaaba bible

Yobu 21

¹Nio lwaanyuma lwayo Yobu weelamo nga aloma ari:

²Rekeeresa buulayi bubweene tsilomo tsyeesi ise ndi khuutsya khukanikha, khayo tsibe nitsyo tsitsibeesamo inywe kamaani.

³Intsikhaliilikhe ise inganikhe, nio lwanyuma lwayo nga mwaakanile mufwotsole byeesi ise inomile.

⁴Inywe mwambaasa muri khukhwilootsa khweesi ise ndikho niilotsa, indikho niilootsela umuundu busa uuli nga ise? Ise ndi ni shitsiilililwa shishikila ise naalekha khuuba ni khukhwikhaliilikha ta.

⁵Nga mwandoleeleele ise, inywe seshibeyaangisa, mwarama nga mwaasamiliile busa ta?

⁶Ise nga nambaasile khu biindu bibyaakholikhakho, kamariiso kamaamba, neyembeelela naluundi naaterema busa.

⁷Shiina kila Wele alekha baboonaki khuubawo, baamala kimiiko kimikali, naluundi baaba ni buyiindifu buukali?

⁸Baba ni lisaaye liikali, litsowa lyaabalaaha nga baaboone.

⁹Tsiingo tsyaabwe tsimenya mu lukoosi, akhali khuurya khwoositsana taawe, nga sibeyembeelelakho shitaambiso khukhwaama isi Wele ta.

¹⁰Ate shitweela busa, bibyaayo bisaala byaabalaaha, yaalekha khubawo ikhaafu yoosi ikamaya taawe.

¹¹Babaana baabwe bakyeenda busa nga bibyaayo byeesi balekhuulile, benyaha akhali bihangafu ta.

¹²Beemba kimyeenya kikitsiilakho kimilele ni bye khuusakayisa, naluundi beekhoya nga bashina khulwe kamakono kakaama khu bye kimyeenya byeesi bafuura busa.

¹³Babaana baabwe bamenya buulamu bwaabwe mu bye buyiindifu, naluundi bafwa baatsya imakoombe nga imbakhutaambisibwakho ta.

¹⁴Baboonaki balomela Wele bari, “Ifwe khulekhe khube! Ifwe sikhwikoomba khuumanya byeesi iwe uleekela ta.

¹⁵Umunyali uwa byoosi ali niye naanu, n'eefwe khube babaakaanisi beewe? Namwe mafuurisa shiina keesi ifwe khufuna mu khumwisaaya niye?”

¹⁶Nibo beyiinga bari bye buyiindifu byeesi bali ni nabyo byaama mu maani kaabwe kameene; ne ise s'iinyala naafukiilisa khuuloondelela kamakhula ke baboonaki ta.

¹⁷Tsifuunda tsiinga tsyeesi buwaanga bw'omwoonaki busima, bwaalekha khumulikha ta? Buhangafu bweesi bandyaakhiile khuufuna, buboolakho namwe ta? Namwe Wele nga liirima lyaamuwaambile, abawakho nibo shitaambiso?

¹⁸Khayo beekele busa nga kamakhalaamba keesi imbewo iwuutsa, babe busa nga likhuutsi lyeesi ikhuungu iwuutsa yaayila.

¹⁹Iwe uloma uri, “Wele waabiikhila babaana b'omwoonaki shiitaambiso, shishaandibeele sha paapa waabwe”; Taawe, khayo Wele awe umwoonaki umweene shitaambiso sheewe, amwokesanise ari afuna shitaambiso khulwe bubwoonaki bweewe.

²⁰Khayo umwoonaki umweene etwiikhe shitaambiso sheewe; khayo umweene ekhaliliikhe liirima lya Wele, Umunyali uwa byoosi.

²¹Khulwekhuuba naanu uwinaanayo khu biikholikha khu baandu beesi alekhawo nga wafwiile, nga biifukhu byeewe khu shibala byaaramire bikyeekhe biri?

²²Wele niye ukhalila ikhaba babaali angaaki kimisaango; manya iliwo umuundu unyala waleekela Wele bye kamakhula?

²³Babaandu baalala bafwiila mu buyiindifu bwe kamaani, nga bali buulayi, mbaawo shishibataambisa ta.

²⁴Baba nga bali baakhomefu, naluundi kimibili kyaabwe kyayitsula kamafura.

²⁵Yabawo babaandi babafwiila mu mutaambo, nga sibabatsakakho ni kumwikhoyo kwoositsana ta.

²⁶Ne boosi bafwa baabasiikha mwiiloba; tsinyeende tsyabalya baabola.

²⁷Bona, ise naamanyile bibyambaaso byeenywe, ni tsimbomelo tsyeesi inywe mulikho muukhalila ise.

²⁸Khulwekhuuba inywe mureeba muri, “Shikuuka sh'omuundu uwe angaaki ari shili ali eena? Intsu iyaabo babaakhola bubwoonaki ili ali eena?”

²⁹Inywe simwareebirekho abo babaakyeenda tsiŋeendo ta? Inywe simwaamanya kamakhuuwa keesi bareera khukhwaama ibweene iyo ta?

³⁰Khulwekhuuba khu shifukhu khweesi Wele aweelakho babaandu shitaambiso, umwoonaki niye busheele urama nga s'aalikho ni buwaangafu ta.

³¹Mbaawo umuundu utsuntsumilisa umwoonaki, namwe waamwilihaasa ibyo byoosi byeesi aamala khaale khuukhola ta.

³²Nga baamalile khuusiikha umwoonaki, babaandu baarama nga bebuulila khu ŋani yeewe buulayi.

³³Liiloba lye mu ŋani limukwakho niye mbola busa; babaandu babuusana mu bukali khuutsya khuumusiikha, batweela bamwinyoowa ibweeni babaandi baama inyuma.

³⁴Ne ari inywe mwiitsa muryeena khukhuusaasila ise ni tsilomo tsitsikhalimo itsyo ta? Byeesi mulikho mukanikha byoosi bili bye bubeeyi byoonyene.