Read lumasaaba Yobu 22 Bible Online

Yobu 22 - lumasaaba bible

Yobu 22

¹Kila lwanyuma Elifazi abe uwaama i Tema, elamo nga aloma ari:

²Umuundu anyala waaba uwe kumukaso isi Wele? Ilala, uyo uuli umukesi aba uwe kumukaso isi niye umweene.

³Iwe n'uuba nga uli umukhosefu, Wele ashifunamo shiina? Namwe iwe nga webirisire buulayi, Wele afunamwo shiina?

⁴Iwe wambaasa uri bari khulwekhuuba wisaaya Wele kila niye akhwikiitsa, naluundi kila niye akhukhalila kumusaango?

⁵Seshili shiryo ta. Akhali ndi bubwoonaki bwoowo bukali nibwo bubukila; khulwekhubeela bubwoonaki bwoowo bwiloosela busa akhali intsakamo ta.

⁶Khulwekhuuba iwe wamiinikhilisa balebe boowo baakhuliya abe byeesi ukhababaantsa ta, naluundi iwe waabarusakho bikwaaro byaabwe waabalekha nga bali bukhuna busa.

⁷Abo babaali buulesa iwe siwayinaanayo khubawa kameetsi ta, ni n'aabo babaali intsala iwe siwayinaanayo khubawa she khuulya ta.

⁸Iwe waayila liloba lyoosi bari khulwekhubeela uli uwe kamaani; iwe ulimenyamo lyoosi khulwekhubeela uli uwe shiriifwa.

⁹Nga banamulekhwa bakhwiitsileyo isi uli iwe s'uukana waabayeeta ta; naluundi iwe wanuula bibiindu bye baafuubi.

¹⁰Ni nashiryo ari iwe kimireko kyaakhwibotokheleele, naluundi lubaluba, bona iwe kamariisyo kaakhuwaambile.

¹¹Shishiilima shaakhubiimbiliile iwe ari s'uunyala ni khuubona ta; ni kameetsi kakaasalasala kaakhubiimbiliile iwe.

¹²Wele amenya mwiikulu mu ngaaki; ne ikhaba nga tsinieniesi tsili mu ngaaki, ne niye atsiloleelela nga shishiindu shishiili aasi eewe.

¹³Ni nashiryo iwe wireeba uri, “Wele naye waamanya shiina? Niye waayibisa angaaki e kimifuumbi kimimali, akhukhalila musaango shiina?”

¹⁴Mwambaasa muri kimifuumbi kimimali kimukhiisa waalekha khubona ta; naluundi akeenda nga ebotokhelela busa mwikulu mu ngaaki.

¹⁵Iwe waakhaliilewo ilala uri kane uloondelele intsibirisa yeesi babaandu baboonaki beebirisamo?

¹⁶Ikhaba nga abe imbuka yaabwe ishiili khukhwoola ta; babeeya baabarusilawo ilala ni tsiindi tsyaabwe tsyoosi.

¹⁷Baalomela Wele bari, “Ifwe khulekhe khube,” naluundi bari, “Shiina sheesi umunyali wa byoosi anyala khuukhukholakho?”

¹⁸Ne shitweela busa Wele niye uwabawa nibo bye buyiindifu; ise s'iinyala naamanya intsambaasa iye baboonaki ta.

¹⁹Babaandu baalayi babona shino nga ni shili batsekha busa; abo babaakhalikho kumusaango ta, batsekhelela baboonaki nga baweebwa shitaambiso.

²⁰Nga baloma bari, “Ilala, baasiku beefwe ari boonakisibwile, ni kumulilo kwoshele bibiindu byaabwe abe bibiraamiirekho.”

²¹Ni nashiryo ari Yobu, iwe fukiilisana ni Wele nio umenye mu lukoosi, nio lwanyuma iwe ufune tsiikhabi tsye khuuba ni bibiindu biilayi.

²²Iwe fukiilisa indeekela iyaama mukhanwa mweewe; ushebulilatsake biilomo byeewe mu mwooyo kwoowo.

²³Iwe siinga wiisamo buusaale ni Wele umunyali uwa byoosi luundi, naluundi iwe wewosa mu moni tseewe; Iwe siinga waakamisa bye bubwoonaki bibiili mu be muntsu yoowo,

²⁴siinga iwe uyila bye buyiindifu nga shishiindu shishikhalimo kumukaso ta, utsye umwaate izaabu yoowo mu mukhuururo mweesi kameetsi kaabiratsakira amataayi,

²⁵Umukasya, Umunyali uwa byoosi ekele niye she buyiindifu shoowo, niye abe she ifeetsa yoowo isi iwe uli ni nayo;

²⁶Nio kane iwe unyoole kumwikhoyo kwoowo mu Wele Umunyali uwa byoosi, naluundi nawe kane ukholakane ni naye mu mwooyo kumulayi.

²⁷Kane uri iwe umuloomba, akhuwe iwe sheesi uloombile; naluundi kane iwe woolelese ibyo byeesi iwe wasubisa khuukhola.

²⁸Buli sheesi iwe ukhola kane shikhutsiile buulayi, naluundi ni buulamu bwoowo kane bube buulayi.

²⁹Khulwekhuuba abo babeyiinga, Wele abakhweesa waabeesa aasi naabi; ne niye awonesa abo babewombeekha.

³⁰Wele ayeeta abo babaakhalikho kumusaango ta; abayeeta khulwekhubeela bakhola bibiindu bibiili biilayi.