Read lumasaaba Yobu 23 Bible Online

Yobu 23 - lumasaaba bible

Yobu 23

¹Kila Yobu eelamo nga aloma ari:

²Shitweela busa ise ishilootsa naabi khulwa Wele, khulwekhuuba ise nakhelootsa ne niye ashiimba busa ise shitaambiso.

³Shinyalikha ise imanya shiifwo sheesi inyala naamunyoolamo, namwe ise inyalisa khukhwoola isi niye ekhala!

⁴Khali ise samweene niwotsilekho mu musaango kwase muumoni tsyeewe, naluundi khali samweene niikanikhilekho mu musaango kuno nga nitseeta.

⁵Khali nase ifunile ikhabi iye khuumanya isaambo yeesi niye akana khukhuuntsilamo; nio nase inyalise khuumanya niye sheesi abe akana khukhuumboolelela ise.

⁶Wambaasa uri ni kamaani keewe ako koosi niye anyala khuukhabisana ni nase? Ilala, ise senambaasa ta; akhali indi kane arekeerese bibyase.

⁷Abweene awo, ise nga n'iindi ukhali ni kumusaango ta, nase nio inyalise khuukanikha ni Wele; naluundi abweene awo nio umukayi wase andusekho ise kumusaango kweesi indi ni nakwo.

⁸Bona ise natsiile ibwaamanyaanga, ne Wele s'aaliyo ta; naluundi ise naweentsile ikhaba ibwaamanyaanga, nenga ise s'iimunyoola ta.

⁹Ikhaba ingaaki, ise naweentsileyo, ne Wele webisile, ise sinyala naamubona taawe; ikhaba khu luwaande lwe mwaalo, ise namuweentsile nga s'iimunyoola ta.

¹⁰Ne shitweela busa Wele niye waamanya isi buli ise isaamba shikele shase; siinga niye ameentselesakho, kane anyoole ari ise s'iindikho ni kumusaango kwoosi ta.

¹¹Ise naanyikhila khuuloondelela kumukhoosi kweesi niye aarobora, nga mbaawo khuulolakho khu luwaande luluundi ta.

¹²Ise sinayakamisakho khuukhola byeesi niye andakila ise khuukhola ta; ise inoondelela byeesi niye akana, akhuba byeesi ise ingana khuukhola ta.

¹³Wele s'aashukhakho ta. Mbaawo umuundu unyala waamukhaandisa ta; buli sheesi akana khuukhola; ashikhola.

¹⁴Khulwekhuuba niye kane akhole ibyo byeesi anengekharengekhela ise, khukhwoolisa ni biwayo; naluundi niye ali ni bibiindu biikali bibifwaana biryo mu byambaaso byeewe.

¹⁵Ninashiryo nga ise noolile isi niye ali ise imba ni khuurya khuukali naabi; nga ise naashambaasilekho, ise imuterema niye naabi.

¹⁶Wele waakilile ise naafunile khurya khuukali naabi; Umunyali uwa byoosi waakilile ise nabeele ni khukhwiyembeelela khuukali naabi.

¹⁷Ne ikhaba nga shishiilima shaamiimbiliile, ise sinaakamisile khuulila ta; ikhaba nga imbaawo sheesi inyala naabona khu lwe shishiilima shino ta.