Read lumasaaba Yobu 24 Bible Online

Yobu 24 - lumasaaba bible

Yobu 24

¹Shiina kila Umunyali uwa byoosi akharawo imbuka iya buraawa, iye khuukhalilakho kimisaango? Naluundi shiina kila abo babaali babaakanisi beewe, bakhanyala baamanya byeesi niye ali khuutsya khuukhalawo ta?

²Babaandu bakhuula basyeenda kamasiintsi bari nio bafune liiswa liikali; naluundi banuula kamasheese khukhwaama mu mataala ke bashaabwe, baakayila mu mataala kakaabwe.

³Batsya banuula tsisikilya tsye baafuubi, naluundi bawaambiliila iyeeyi iya namulekhwa khukhwoolisa nga waasasuule liikobi.

⁴Bamiinikhilisa bataambi; waakila bataambi boolisa khuutima khuutsya khukhwiibisa.

⁵Ni nashiryo bataambi bamenya busa nga tsiisolo tsye mwiiswa; khulwekhuuba batsya khukhwiheentsela bye khuulya khukhwaama busa mu mubiimbi; iyo niyo isi bawentselesela bye khuulya bari nio baliise babaana baabwe.

⁶Bawentselesa busa bye khuulya khukhwaama mu mikuunda kye babaandu babaandi; naluundi baangalisa busa kimizabibu khukhwaama mu mikuunda kye baboonaki.

⁷Mu shilo umutaambi akona bukhuna nga mbaawo sheesi ebiimba taawe; mbaawo sheesi bebiimba khuukhiisa imbewo ta.

⁸Ifula iyiipa khukhwaama mu bikiingi yoosi ibaweelakho, naluundi khulwe khuutaamba tsiingo, beekama khu lwaanda.

⁹Baboonaki banuula baafuubi batsweenge nga bashinuuna; baayila babaana be bataambi khuubawaambiilila khulwe liikobi.

¹⁰Bataambi bakyeenda bukhuna akhali shikwaaro ta; ikhaba nga balikho bakyeesa iŋaano, ne nibo baaba nga bali n'iintsala.

¹¹Baasuura kamafura khukhwaama mu misaala kimi oliva, n'iindali khukhwaama mu mizabibu, ne shitweela busa nibo babeene baarama nga bali intsala.

¹²Abo babaamenya mu shiriimba belootsa khulwe kumutaambo kumukali, buulamu bw'aabo babaali khuufwa bwilootsa nga buweentsa buyeeti; ne Wele s'enaanayo isi khuuloomba khwaabwe ukhwo taawe.

¹³Iliwo abo babaaminyaalila khuuloondelela buwaanga nga sibenaanayo khuuloondelela byeesi Wele akana ta, naluundi sibatsiila khu byeesi niye aloma ta.

¹⁴Abo babeera bashaabwe beenyukha baatsya kumuusi, baatsya beera bataambi; uri mu shilo baatsya beeba bya beene.

¹⁵Abo babaakhola bye buyeyani bawuuna mu mamilimili, nga bambaasa bari mbaawo ukane ababone ta; ni nashiryo bebiimbilila mu moni bari ilekhe khubayo unyala waabamanya ta.

¹⁶Mu shilo baba balikho bafuna tsiintsu tsyabeene bari nio beebe bibiilimo; uri antsye busha baatsya beebisa, baalekha khumanyakho bye kumuusi nga ni bifwaana ta.

¹⁷Khulwekhuuba khu nibo shishiilima shili busa nga kumutishinyi; khulwekhuuba nibo sibarya ikhaba shishiilima namukoto ta.

¹⁸Kameetsi kaketsuule kasalasala keekhisa baboonaki; ni Wele waamala khaale khuutsuba liiloba lyeesi bamenyamo; sibasiitsya mu mikuunda kyaabwe khuulima mu mizabibu taawe.

¹⁹Musaambo yeesi buukhafu ni siimiyu bikila bunyifu bwaakorawo, niyo isaambo nyene indweela isi baboonaki bafwa baakorawo khukhwaama khu shibala.

²⁰Ari ikhaba ni ba maayi baabwe babeene sibashibashebulila ta; biiwukha byaabalya naluundi baayonakisibwa bali busa nga kimisaala kikyabola kyaakwa aasi.

²¹Shino shikholikha khulwekhuuba babirisa buubi bakhasi bakuumba, nga mbaawo shilayi shoosi sheesi bakholela namulekhwa ta.

²²Nga Wele waakhalilewo khulwe kamaani keewe, umwoonaki ali ni khuufwa.

²³Wele abawa nibo khuumenya mu lukoosi, naluundi waabayeeta; ne nga abemenielesa mu buli byeesi bakhola imbuka yoosi.

²⁴Baboonaki baniinisibwakho angaaki baafuna shiriifwa mu mbuka ingeekhe iri; ne khaangu akho baniaala busa nga kumusiru, baniaala busa nga shiilimwa sheesi baremire khukhwaama khu shisina.

²⁵Noola seshili shiryo ta, naanu unyala wakhaandisa byeesi ise inoma? Naanu unyala waaloma ari byeesi ise inomile bili bye bubeeyi?