Read lumasaaba Yobu 26 Bible Online

Yobu 26 - lumasaaba bible

Yobu 26

¹Kila Yobu amwiilamo nga aloma ari:

²Ne ari ise ukhali ni bunyala, iwe wambaasa uri byeesi ulomile byanjeetile? Ne ari ise ukhali ni kamaani, iwe wanjeetile musaambo shiina?

³Nga iwe waakhakilekho khukhuumba ise kamakesi koowo! Nga iwe waakhakilekho khukhuumba ise umusilu kamakesi ke angaaki!

⁴Iwe wambaasa uri byeesi ulomile, ubilomeele naanu? Namwe byeesi ukanikhile, ubikanikhile mu lisiina lya naanu?

⁵Kamaani ka Wele kakila abo babaafwa khaale baatsya imakoombe baanikina khulwe khuurya khuukali; kameetsi ni n'eebyo bibikamenyamo byoosi, binikina khulwe khuurya khuukali.

⁶Mu moni tsya Wele, shiibala she makoombe shili abulafu busa, shili khwaasye busa; mbaawo shishimukhingilila niye khuubona bibiilimo taawe.

⁷Wele niye uwabayuula likulu mu ngaaki, naluundi wasuunga shibala mu libaanga busa.

⁸Wele umweene niye uwabusaasila ifula mu mafuumbi, yalekha khubawo kamafuumbi kakaafwiilila khulwe buusiro ubwo ta.

⁹Wele umweene niye uraambisa kamafuumbi, wabiimba khu mweesi kwalekha khubonekha ta.

¹⁰Umweene niye uwarawo lulwaakha khu meetsi khu ngaaki, naluundi waarawo lulwaakha akari we buwaanga ni shishiilima.

¹¹Nga niye wakhookheele kimisiindi kikiitikiya liikulu, kiterema naluundi kyaanikina khulwe khuurya khuukali.

¹²Khulwe bunyala bweewe, alakila waakila inyaantsa yaayuna busa; naluundi khulwe kamakhula keewe, anyalisa khukhwiira kuusolo Rahabu.

¹³Khulwe khuheela kumuuya kweewe waakila liikulu lyaayuna busa; ni khuuraambisa kamaani keewe waakila niye weera kuusolo abe kukwaba kutitukha ate nga kukukheerikha ta.

¹⁴Ne nga walekhaasile khu maani keesi niye ali ni nako, bino bili bibiindu bifwiiti naabi; bili busa bikyeekhe nga umuundu n'aali khuumoonya! Ne naanu unyala wofwaasila ilala bunyala bwe kamaani ka Wele?