Read lumasaaba Yobu 28 Bible Online

Yobu 28 - lumasaaba bible

Yobu 28

¹Ilala, iliwo liiruumbi ly'eesi baamisamo ifeetsa; naluundi shiifwo mweesi bapyeelusila izaabu.

²Shiibya ayoni bashilima khukhwaama aasi mu liloba, ni kopa bamuŋoonela mu mukuba kwe mwiruumbi.

³Babaandu beekha aasi mwiruumbi ni buwaanga, baatsya bawuunyilisa buli aandu oosi mu liloba aasi, baalima kuuloba kukuulimo bye kumukaso khukhwaama aleeyi busa.

⁴Buurwi bubwingila mu liloba babuyaba aleeyi khukhwaama isi babaandu bamenya; babuyaba mu bifwo isi babaandu bakhatsyayo ta, babuyaba aleeyi mu shifwo shishikhalimo babaandu ta, nio beekha naluundi baniina nga baraambisa kimikosi.

⁵Biilyo bitsowa khu liloba khu ngaaki, ne aasi we liiloba tsana ilyo, bakaasuusya busa bibiindu byafwaana nga byeesi kumulilo kwoosha.

⁶Mu lwaanda luluuli aasi mu liloba, babaandu banyoolamo kamabaale ke buukusi bwe angaaki; naluundi liifukhuulu lye mwiloba umwo, lilimo izaabu.

⁷Ikhaba ikhosi ipaamburukha mu ngaaki, siyaamanya isi kumukhoosi ukwo kuli ta; ikhaba khaanywiinywi khe moni indeeyi iryeena, sikhakibonatsakho ta.

⁸Ikhaba tsiisolo tsiindafu tsitsikeenda nga tsiihaasa busa, sitsyatsyatsakayo ta; ikhaba italanyi siyatsyatsakayo ta.

⁹Babaandu beebwakala libaale liliminyisayo khuukhuna baalilima; baakeyula isi tsiindi tsye tsingoongo tsyaama.

¹⁰Balima baakhola kimyaanda aasi mu lwaanda, baryo baafumbula kamabaale ke buukusi bwa angaaki naabi.

¹¹Bayaba khuunyoola tsiimoni tsye kameetsi, nio waakila baarera abulafu mu buwaanga bibiindu ibyo abe bibyeebisa aasi.

¹²Ne kane kamakhula kanyoolikhaane waahena? Bye kamakhula kane khubiiyike khukhwaama waahena?

¹³Kamakhula sikanyoolikhana mu baandu ta; naluundi mbaawo umanyile buukusi bweesi kakula ta.

¹⁴Inyaantsa ni buuleeyi bwe aasi mu nyaantsa biloma biri, kamakhula sikanyoolikhana mu nibyo ta.

¹⁵Mbaawo unyala waakula kamakhula nga araambisa ikhaaba izaabu, namwe abe akhaareera ifweeza iyoola buusiro buryeena ta.

¹⁶Abe waakhapima izaabu ifuurisa buulayi iyaama mu Ofiri, namwe abe waakhapima kamabaale ke buukusi bwe angaaki kakoola karyeena, sebinyala byoola buukusi bwe khuukula kamakhula ta.

¹⁷Ikhaba izaabu namwe i gilasi indaayi iryeena, sibyoolela khu makhula ta; niko kali ke kumukaso naabi khuubiminyisakho.

¹⁸Kamakhula kali ke kumukaso kwe angaaki naabi; kafuurisa ni kamabaale kakaali ke buukusi bwe angaaki naabi.

¹⁹Ikhaaba libaale lye buukusi bwe angaaki bari topasi khukhwaama mu Esiyopiya sikoola khu makhula ta; namwe sikanyala kalekhaasibwa khu zaabu indaayi iryeena ta.

²⁰Ne ari, aba kamakhula kaama waheena? Naluundi kamakhula kamenya waheena?

²¹Mbaawo shibuumbe na shitweela shishinyala shaabona kamakhula ta; naluundi kaayibisa khukhwaama khuumoni tsye binywiinywi.

²²Ikhaba isho shishoonakisa bibiindu ni kamakoombe nabyo, bifukiilisa biri byaawulilakho busa lukaambo luluwaamba khu makhula.

²³Wele yeenyene niye umanyile isi kamakhula kali, naluundi niye yenyene umanyile isi kamakhula kaama.

²⁴Khulwekhuuba Wele niye abona khukhwaama khundulo khwe shiibala, khukhwoolisa khuundulo khukhuundi; naluundi niye abona shiindu shishiili aasi we likulu.

²⁵Mu mbuka isi Wele aweelamo ikhuungu kamaani kaayo; naluundi isi aakhalilawo buubalaayi bwe inyaantsa.

²⁶Mu mbuka isi aakhalilawo mu bifwo byeesi ifula ili ni khukhuupa; naluundi isi luuheni ni khukuula khwe ifula bili ni khuuba;

²⁷ni nashiryo nga Wele n'aashibona waakhalawo; waashiweentsa naluundi waashiirawo mu shifwo shasho.

²⁸Nio lwanyuma Wele waalomela umuundu ari, “Bona, khuurya Umukasya, ako niko kamakhula; n'umuundu uwaakamisa khuukhola bye bubwoonaki, aba uyo niye uuli ni khuumanya.”