Read lumasaaba Yobu 3 Bible Online

Yobu 3 - lumasaaba bible

Yobu 3

¹Lwanyuma lwe bibiindu bino byoosi, Yobu wenyusa mukhanwa, waakanikha tsilomo tsiimbi tsitsiwaamba khu shifukhu khweesi aasaalikhilakho.

³O Wele, khali ureere shiitsubo khu shifukhu khweesi ise nasaalikhilakho, ni khu shifukhu khweesi ise nakwiila muunda mwa maayi wase.

⁴O Wele, khali shiifukhu isho shibeele she shishiilima! Khali iwe sewiilileyo khuushebulila shiifukhu isho luundi ta, namwe khali buwaanga sebushimulikhilekho luundi ta.

⁵Khali shishiilima ni ngunyi bifuusilisile shiifukhu isho, Khali kamafuumbi kashibiimbiliile, Ni nyaanga ilekha khushimulikhakho ta.

⁶Khali shishiilima namukoto shiwaambile shiilo isho! Khali seshibalikhiile atweela ni biifukhu bibiindi taawe! Khali seshibalikhile nga shitweela khu bifukhu bye kumweesi ukwo ta!

⁷Khali shiilo isho shibeele busa nga mbaawo ukuundi usaalikhilakho ta, ilekha khubawo kumwikhoyo kw'omwaana khuusaalikha ta.

⁸Khayo abo babaakhola kwe khuutsuba, naluundi nga bali ni kamaani ke khusyukhuulula kuusolo Lefiyasani, batsube shiifukhu isho.

⁹Khali tsinieniesi tsye kumutikhinyi kwe shifukhu isho setsimulikhile ta. Khali shiilo isho seshibeelekho ni khukhwiyikina khwe khuufuna buwaanga, namwe shibonakho ikhaba buwaanga bwe kumutikhinyi ta.

¹⁰Khulwekhuuba shilo isho seshandobela ise khuusaalikha ta, ni khuulekha khukhuuntsokesa ise kumutaambo ta.

¹¹Shiina kila ise ikhaafwiila muunda ya maayi wase? Namwe khulwashiina kila ise ikhaafwiila awo abweene, nga nio naamalile khuusaalikha?

¹²Shiina kila maayi wase aamaamba ise khu bikele byeewe? Namwe shiina kila ise nanuuna libeele lya maayi?

¹³Khulwekhuuba khali nafwa intsya busa mu lukoosi, khali ari ise ndi mu khuwola mu lukoosi.

¹⁴Khali indi imakoombe atweela ni bayiinga ni baawuli, abo babeyombakhila babeene bushaakha kamakubili ke lubili.

¹⁵Namwe khali indi atweela ni naabo babaaba n'izaabu, abo abe babetsusa tsiintsu tsyaabwe ni feetsa.

¹⁶Namwe shiina kila ise ikhaaba busa nga umwaana isi batuumisa busa, waafwa nga waakhubonakho buwaanga ta?

¹⁷Nga babaandu babaali mu ŋani, sibakhola bye bubwoonaki ta, naluundi ibweene iyo, baraambi babaaluyile banyoolayo khuuwola.

¹⁸Ibweene iyo ikhaba baabowe banyoolayo lukoosi, khulwekhuuba mbaawo ubarafwiila, namwe waabawa kamakaambila ta.

¹⁹Ibweene iyo inyoolikhayo bayiinda ni bataambi, ikhaba umukulwa aba ali umulekhuule khukhwaama isi umukoosi weewe.

²⁰Shiina kila abo babaali mu mutaambo barama nga bashiili baalamu? Shiina kila abo babaali ni butsiina mu myooyo barama nga bashiili baalamu?

²¹Nga bekoomba naabi khuufwa, ne sibafwa ta! Nga baweentselesa naabi khuufwa khuuminyisakho ni babaaweentsa bye buyiindifu!

²²Baaba nga sibalikho ni kumwiikhoyo kwoositsana ta, naluundi bali mu mutaambo khukhwoolisa nga baafwiile baabasiikhile.

²³Wele s'ababoolela buulamu bwaabwe nga ni butsya khuba ta, naluundi aba waabariiyire waabebotokheleele.

²⁴Khulwekhuuba mu shifwo she khuulya biilyo, ise ndi mu khulila kamasika busa khulwe kumutaambo, naluundi ise sinaakamisa khukhwilootsa ta.

²⁵Khulwekhuuba ibyo byeesi ise iminyisa khukhwiyembeelela, byeesi iminyisa khuurya, nibyo bibintsolakho.

²⁶Ise s'indi bulaayi namwe ni lukoosi ta, naluundi bihangafu byase sibyakama ta.