Read lumasaaba Yobu 30 Bible Online

Yobu 30 - lumasaaba bible

Yobu 30

¹Ne ari abo babaashiili basoleeli khukhuuminyisakho ise, bantsekhelela ise busa nga baandekelesa. Ba paapa baabwe baaba nga sibalimo ni kumukaso ta, nga abe ise s'iinyala naabarawo khuuyeeta tsiimbwa tsyase mu khuliinda kamasheese ta.

²Abe bali bisaanisaani busa bibikhali ni kamaani ta, nga sibinyala byaakhola ni kumulimo kwoositsana taawe.

³Abe bali bataambi naluundi abe bamenya muuntsala, beyaangala busa, nga mbaawo khoosi kheesi bewaambakho taawe. Ikhaba mu shilo abe intsala ibaliila ibulafu, mwiirome.

⁴Abe bakhuula bisaala bye mu mubiimbi baabilya, abe baalya ikhaba tsiindi tsye kimisaala kikikhaŋaaha ta!

⁵Abe buli isi batsya babaandu babatimisa nga babawotselela, baaba busa nga babaawotselela babiifwi.

⁶Abe kamatila mweesi kameetsi keekhila mwaayikela tsiingo tsyaabwe, ni mu malowo ke mwiiloba ni mu mabaale.

⁷Abe basamila mwiirome nga tsiisolo, nga bebuunga atweela mu bifwokonyo bari nio bafune buukhafu.

⁸Nga bali bisaanisaani busa bibiikhalimo itsamu ta, nga baabitimisa khukhwaama isi babaandu bamenya.

⁹Ari babaana be babeene abo nibo babaantsekhelela ise, baryo baantsikesa ise kumweenya; mu moni tsyaabwe ise neekela sheesi batsekhelela busa.

¹⁰Baantsibebeeha ise, naluundi sibakana bantsitsa aambi ta; nga bamboonekho baafuutsila ni kamare.

¹¹Khulwekhuuba Wele waakholile ise khuulekha khuuba ni kamaani ta, naluundi khuulekha khuba ni buyeeti bwoositsana ta, bashuukhila ise nga bantsokesana liirima lye angaaki.

¹²Liipupu lye babaandu bano liintsibwakala ise ni kamaani; lyaakila ise naatima ni kamaani; baantsibwakala ise nga bakhakakho bari baantsire.

¹³Batsya bebuulila khu ntsila yase nga bakana bari bantsire ise, yalekha khuubawo ikhaba na mutweela khuubakhaangabisa ta.

¹⁴Beetsa mu bukali nga babahaatuniile mu lumako; baangwakho mu bukali baamaamiile ise.

¹⁵Shino shikila kamariiso kamaamba ise; shiriifwa shase shakoorawo busa nga sheesi imbewo iwuutsile, ni buyiindifu bwase nabwo bwaakoraanawo busa nga kamafuumbi.

¹⁶Ari ise buulamu bwambweelemo ingana khuufwa; imbuka iye ingunyi yaantsibotokheleele.

¹⁷Mu shilo kamakuumba kaase koosi kataanyaka busa khulwe butsiina; ni butsiina bubuuli mwibili mwase sibuumba ise luukoneele ta.

¹⁸Wele waangulukhile ise, waakumiile biikwaaro byase ni kamaani, wamaamba wantsomiisa nga shikwaaro ni shikhwomiisa muumilo.

¹⁹Wele wamwaatile ise mu lutuumbi; ise naweelemo kumukaso indi busa nga lifukhuulu ni likoshe.

²⁰O Wele, ise ingukuula isi iwe, ne iwe s'uuntsilamo ta; naluundi ise naakhaloomba, iwe s'untsinaanakho taawe.

²¹Iwe wantsikaangilekho ulikho umbirisa ise buubi; iwe ulikho uraambisa kamaani koowo khukhuungubyeenga ise.

²²Iwe usuta ise angaaki waakila ikhuungu yambuutsa yaambila; naluundi iwe ukila ikhuungu yambuutsa ise, nga ikhuupa iyi ni n'eyi.

²³Ise naamanyile indi iwe ulikho umbile ise mu khufwa, mu shifwo mweesi baalamu ni baafu babuusanila.

²⁴Ne shiina kila iwe wibwaakala umuundu nga ise uweelemo kamaani, ukhanyala wakhola shishiindu shoositsana ta, akhali khuloomba ari umuwaambile shiisa?

²⁵Ise yaba imaambila shiisa abo babataambisibwa, naluundi abe imbaanayo buyeeti isi abo babaali bataambi.

²⁶Ne ise ni nasuubila biilayi khukhwiitsa, naafuna bibiindu biibi; ni naliinda khuufuna buwaanga, naafuna shishiilima.

²⁷Kumwooyo kwase kuli mu butsiina ni khukhwiyembeelela khuukali; biifukhu bye kumutaaambo kwase byaatsiile biilondekhana busa.

²⁸Ise ingeendela mu shiilima namukoto, nga mbaawo buwaanga ta; ise niima khu ngaaki mu lituuli lye babaandu nekoontselela, nga inoomba buyeeti.

²⁹Liikono lyase lili lye kumutaambo, naluundi likuukuula lyonyene busa mwiirome, nga lye ikhiipwe n'inyoofwe.

³⁰Shiikhoba shase shashuukha shaamaliha busa, naluundi shilikho shoobukha, ni kamakuumba kaase koshelela busa ni buukhafu.

³¹Mu shiifwo she khuwulila kimyeenya kye kumwikhoyo nga abe amataayi, ari imbulila kimyeenya kye kumutaambo ni kamasika kyoonyene.