Read lumasaaba Yobu 31 Bible Online

Yobu 31 - lumasaaba bible

Yobu 31

¹Ise naamalile khaale khukhwikaambila samweene mu mwooyo kwase, nga tsimoni tsyase setsinyala tsyaalola khu mukhasi, abe ikhaba nga ali indungubaasi ta.

²Khulwekhuuba nga waloleleele, mbaawo kumusheemba kweesi Wele aasiindikha aasi khukhwaama mu ngaaki ta. Shiina she buusikha sheesi Umunyali uwa byoosi asiindikhila umuundu?

³Baboonaki abasiindiikhila khuuhela, naluundi asiindikha ni kumutaambo isi abo babaakhola bibiindu biibi.

⁴Ilala, Wele niye abona isaambo isi ise niibirisamo, naluundi niye waamanya bibiindu byoosi byeesi ise khola.

⁵Ise nitsuba ndi naakhukholatsakakho buubi bwoosi ta, naluundi naakhuwoombisatsakakho umuundu yeesi ta.

⁶Khayo Wele niye antsofwaase ise buulayi mu bwa ŋali, kane isho shimuyeete niye khuumanya ari ise siindikho ni kumusaango ta.

⁷Kane niye abone oba nga ise naayantsukhakho kamakaambila keewe; namwe ise naakholakho byeesi kumwooyo kwase kwikoomba, namwe oba nga ise naakholakho shishiindu shiibi shoositsana.

⁸Nga abe shili shiryo, khayo umuundu ukuundi akese byeesi ise namiitsa; namwe khayo batitulake biilyo byase byoosi babimalile aasi.

⁹Noola kumwooyo kwase kwaayikoombakho umukhasi yeesi, namwe noola ise naamolamolakho mu shiilima naatsya khu mulyaango kw'omusaani uwashaase.

¹⁰Nga abe shili shiryo, khayo aba umukhasi wase atsye ateekhele umusaani ukuundi busa biilyo; khayo aba atsye amenye n'umusaani ukuundi busa.

¹¹Khulwekhuuba ubwo buba bubwoonaki, ilala, isho shiba shishiindu nga shiikoombesa khuukhalila umuundu kumusaango.

¹²Khulwekhuuba ukwo kuba kumulilo kukwoosha khukhwoolisa shishiindu ni shiweelawo ilala; khukhwoolisa ni kumalilawo ilala buli shitweela sheesi ise imba indi ni nasho.

¹³Noola umwakaanisi wase umusaani namwe umukhasi, waayimbaabilakho ise kumusaango ne ise naalekha khumukholela bya ŋali ta;

¹⁴aba kane ise ikhole indyeena nga Wele wenyukhile khu ngaaki? Nga niye wambeele ise shitaambiso, aba kane ise imwiilemo niye indishiina?

¹⁵Wele uwamuumba ise, s'aali niye uwababuumba nibo taawe? S'aali Wele niye mutweela uyo niye uwakhubuumba fweesi muunda tsye ba maayi ta?

¹⁶Ise sinalobatsakakho khuuyeeta umutaambi mu saambo yoositsana ta; namwe ise sinareererakho banamulekhwa kumutaambo ta.

¹⁷Namwe ise sinalyaatsakakho biilyo senyene, naalekha baafuubi nga bali intsala ta.

¹⁸Khulwekhubeela khukhwaama mu bwaana bwase, ise niinanayo khu bafuubi, nabatsowesa buulayi nafwaana busa nga paapa waabwe.

¹⁹Ise abe ni nabona umuundu umutaambi nga s'ali ni bikwaaro ta, namwe umuundu ukhanyala waakula bikwaaro ta;

²⁰abe ise imuwa bikwaaro bibyabila buulayi, byeesi bakhola khukhwaama mu bwooya bwe kamasheese kaase kameene.

²¹Noola ise nariisariisakho khuukhola buubi khu mu mufuubi yeesi, khulwekhuuba bari abe inyala namufuura kumusaango mu kooti;

²²abe khali bafuniakile kamakhono kaase, oba khali bakamenyuule khukhwaamila mu mayi mu ngaaki.

²³Khulwekhuuba ise naarya shiitaambiso khukhwaama isi Wele, abe ise siinyala nakhola shishiindu nga isho ta.

²⁴Noola ise naarakho kumwiyikino kwase mu bye buyiindifu, namwe noola ise naalomakho indi bye buyiindifu nibyo bibindeerera ise lukoosi;

²⁵noola ise nayikhoyatsakakho bari khulwekhuuba buyiindifu bwase buli bwe kamaani naabi, namwe bari khulwekhuuba ise nabufuna khuubirira mu maani kaase samweene;

²⁶noola ise nayisaayakho inyaanga ikhaba nga yaatsasile, namwe nayisaayakho kumweesi ikhaba nga kubonekha kwe shiriifwa;

²⁷naluundi abe noola kumwooyo kwakhongelesebwa khuubisaaya nibyo, namwe nekoomba khuubikhoombakho bari khulwekhuuba imbikana naabi;

²⁸isho nasho shiba shishoonako she angaaki nga bakhukhaliile kwe khuufwa, khulwekhuuba ukhwo khuba khukhwaantsukha Wele, umunyali uwa byoosi.

²⁹Ise sinayokesatsakakho kumwiikhoyo bari khulwekhuuba umusiku wase abe mu bihangafu ta, namwe bari khulwekhuuba bali mu mutaambo ta;

³⁰ise sinaakholakho she bubwoonaki she khuuloombela shitsubo indi khali afwiile ta.

³¹Iliwo khu baraambi be muuntsu yase ukhaaloma ari, naanu ukhalya khu nyama tsyeewe khukhwoolisa ni tsimusina?

³²Ise abe naakaanila abo babaali baakeendaani mu ntsu mwase, nga ise simbalekha baakona ibulafu khu mikhoosi ta.

³³Ise senabisakho bibyoonako byase khukhwaama khu baandu, nga babaandu babaabisa bibiindu mu sawu tsye bikwaaro byaabwe ta.

³⁴Khulwekhubeela abe ise naarya lituuli lye babaandu liliikhola bye kamatsi, naluundi khulwekhubeela abeele ise naarya khukhwiikholisa busa khwe babaandu, ni nashiryo ise naarama nga naasilile busa, naalekha ni khuurura muuntsu mwase ta.

³⁵Mbaawo umuundu ukane arekeerese byeesi ise ndikho inoma ta? Khayo Umukasya asontsoole kumusaango kweesi alikho ambaabila ise! Ise nikoomba ndi abe uri naafuna mu burone kumusaango kweesi balikho bambaabila!

³⁶Mu ŋali khali ise imaambile buurone ubwo ingeenda nga nabureere khu mayi kaase; khali imbukwaarire busa khu murwe nga ikuutwa.

³⁷Khali ise imusontsoolile bibiindu byoosi byeesi ise nakhola; khali ise niimikhile mu moni tsyeewe nga indi umunyindaalifu, akhali khuurya khwoosi taawe.

³⁸Noola abe ise naanuula liiloba lyeesi inimamo khukhwaama khu baandu babaandi;

³⁹noola naalyakho biilimwa bibitsowamo akhali khusasula ta, waakila naalekha babeene babaalilimamo khuufwa intsala;

⁴⁰nashiryo mu shifwo she iŋaano, khayo luuwa lutsowe mu kuunda kwase, naluundi mu shifwo sha seyiri, khayo kumusiru kumubi kumweene kutsowe mu mukuunda kwase. Inganikha iya Yobu yaakamile awo.