Read lumasaaba Yobu 32 Bible Online

Yobu 32 - lumasaaba bible

Yobu 32

¹Ni nashiryo, basaani bataru bano baakamisilawo khuukhakakho khuwoyawoya Yobu, khulwekhuuba abe niye umweene weyokesanisile nga umuundu ukhalikho ni kumusaango ta.

²Lwanyuma umusaani umuhele abe uwaba nga weemikhile aambi, liirima lyaamuwaamba waalekha khunyalisa khukhwiloosela khukhwikhalilikha khuurekeeresa ta. Liirima lyaamuwaambila Yobu, khulwekhuuba niye aabona nga Yobu eyila nga ukhalikho ni kumusaango ta, naluundi nga abiiyisa Wele. Umuhele uyo abe bamulaanga bari Elihu, nga abe ali umwaana uwa Barakeli, khukhwaama i Buzi. Abe bali be shikuuka sha Ramu.

³Liirima lyamuwaambila ni basaale ba Yobu baataru abo, khulwekhuuba abe sibamuyeetile mu byeesi alimo ta, akhali indi abe balikho bamwikiitsa busa.

⁴Elihu aanyoowa waaliinda khukhwoolisa nga buli mutweela waakanikhile, khulwekhuubeela abe baaramire boosi bamuminya niye mu kimiiko kye buukhulu.

⁵Lwanyuma Elihu n'abona nga basaani bataru bano sibaayeetile Yobu mu buhangafu bweesi aaba nga alimo ta, liirima lyaamuwaamba.

⁶Nashiryo Elihu waakanikha nga aloma ari: Ise ishiili umusoleeli, inywe mweesi muuminyisa ise buukhulu; nashiryo imbeelamo ni khukhwikhwekhweesa ni khuurya, naalekha khubeelamo wangu sheesi ise nambaasa ta.

⁷Ise niyambaasile naaloma indi, khayo baakhulu banyoowe bakanikhe, indi khayo abo babaali ni kimiiko kimikali banyoowe bakanikhe bye kamakhula.

⁸Ne ilala ali umwoyo uwa Wele, niye uwiikha mu baandu waakila baafuna khuumanya.

⁹Akhuba bari be kimiiko kimikali nibo babaali bakesi ta, namwe bari babafuura bukhulu nibo babaamanyile khuukhala kimisaango ta.

¹⁰Ni nashiryo, ari ingana inywe murekeerese bibyase; murekeerese nga ise n'iinganikha byeesi ise nambaasa.

¹¹Mwaboone, ise naarekeeresire buulayi naabi tsinganikha tsyeenywe, ise imbeele nareekire khukhuru khwase nga inywe ni mubeele muwayo bibyambaaso byeenywe.

¹²Ise imbeele narekeeresire buulayi bubweene, ne ise nabona nga mbaawo namutweela khus'iinywe unyalisile khukhaandisa Yobu mu byeesi alomile, namwe umwiililemo buulayi taawe.

¹³Muli ni khukhwitsiiliilisa mulekhe khuloma muri muli ni kamakhula ta; nga mwambaasa Wele niye uli ni khukhwiilamo Yobu, bari khulwekhuuba babaandu bakhaasikhaane.

¹⁴Bibiindu byeesi Yobu abeele akanikha, abeele abakanikhila inywe, akhuba ise ta; ne ise sinyala namwiilamo isaambo isi inywe mumwiililemo ta.

¹⁵Yobu, baataru bano byeesi baloma byaabaweelekho, ni aluno ari sibaamanyile ni sheesi banyala khukhwiilamo iwe ta.

¹⁶Ne ari ise kane niime ano iniinde khulwekhuuba byeesi baloma byaabaweelekho. Khulwekhuuba nga beemikhile awo busa, nga sibali ni she khuuloma ta.

¹⁷Ari, khayo nase imbekho ni sheesi ikwiilamo; khayo nase ikhuboolele iwe sheesi ise nambaasa.

¹⁸Khulwekhuuba ise ndi ni bibiindu biikali bye khuukanikha, ise siinyala neelosela khuusila busa ni tsilomo tsino taawe.

¹⁹Bona, shifuba shase shetsuule tsilomo tsyeesi indi ni natsyo; shiifuba shikana khukhwaatikha nga busela ni bubiimba bwaara inyuungu khulwe tsilomo tsyeesi ise ndi ni natsyo.

²⁰Ise ndi ni khuukanikha manya nio naafuna lukoosi; ise ndi ni khukhwiilamo iwe nga inganikha tsilomo tsino.

²¹Mu khukanikha khwase siingane niikhupile luubeka lwoositsana ta, namwe ise intsililile khuruuya umuundu yeesi mu biikhalimo ta.

²²Ise sinaamanya khuruuya umuundu yeesi mu biikhalimo ta, naluundi n'iikhola isho, Wele anyala waamba shitaambiso mu khaangu naabi.