Read lumasaaba Yobu 33 Bible Online

Yobu 33 - lumasaaba bible

Yobu 33

¹Ne ari, Yobu iwe reka kamaru, urekeerese byeesi ise inoma; urekeerese byoosi byeesi ise intsya khuloma.

²Bona, ari ise ndi khuutsya khukanikha; indi khuutsya khukhuboolela iwe tsilomo tsitsiili mukhanwa mwase.

³Kumwooyo kwase kwaamanyile buulayi kuli ise inganikha byeesi imanyile, naluundi ise byeesi inganikha bili bya ŋali.

⁴Umwoyo uwa Wele niye uwamuumba ise, naluundi umwoyo uyo uw'Omunyali uwa byoosi, niye uwuumba ise buulamu.

⁵Nga abe iwe waanyalile, n'untsilemo; yiirekekha buulayi, ube umunyindaalifu wiwotsekho.

⁶Bona, iwe ni nase mu moni tsya Wele khuli shitweela busa; ise nase nabuumbibwa khukhwaama mu liloba nga iwe.

⁷Ni nashiryo iwe s'uunyala waabakho ni khuurya isi ise ta; ise siingane imbe ni kamaani kamakali khuukhuminyisa iwe taawe.

⁸Ilala, ise naawuliile ibyo byeesi iwe ukanikhile, ise naawuliile tsilomo tsyeesi iwe ulomile.

⁹Iwe uloma uri, “Ise siindikho ni kumusaango ta; mbaawo shiibi shoosi sheesi ise nakhola ta.

¹⁰Ne Wele aweentsa she khukhwihambilisakho bari nio antsibwakale ise, ambirisa ise nga umusiku weewe.

¹¹Awaamba bikele byaase wabibowa ni kiminyololo, naluundi emenielesa buli sheesi ise ikhola.”

¹²Ne khayo ise ikhuboolele: Yobu, mushino iwe s'uuli uwa ŋali ta; Wele ali uwe angaaki khuuminyisakho umuundu yeesi.

¹³Khulwashiina kila iwe ukhaandisana ni Wele, khulwekhuuba bari sewakhwiililemo byeesi iwe uloma ta?

¹⁴Khulwekhuuba Wele akanikha tsifuunda tsiingali busa, ikhaba nga mbaawo umuundu yeesi uwinaanayo byeesi aloma ta.

¹⁵Akanikhila mu marooro, mu bye khuubonekhelwa mu shilo, waakanikhila mu baandu nga bali mu lilo lye kamaani, naluundi waakanikha nga bali khu bulili bawungukhila.

¹⁶Musaambo itsyo akila babaandu baamanya sheesi aloma, musaambo itsyo khuureewura khuno khwabareerera nibo khuurya.

¹⁷Wele aabakanikhayo ari nio baakamise bibyoonako byaabwe, naluundi ari bakhekyela babaali ni khukhwiniinisa angaaki ta.

¹⁸Aryo, aba alikho awonesa umuundu khukhwaama imakoombe, waakila umuundu uyo waalekha khuufwa ta.

¹⁹Luukana Wele aleekela babaandu nga abirira mu butsiina bweesi baba ni nabwo, bubuukila kimibili kyaabwe kyaaba nga kitsiinikha.

²⁰Shikila ni kumwooyo kwaaloba bye khuulya, abe byaakhaba biilayi birye, kumwooyo kubiwayo.

²¹Kimibili kyaabwe kiwetsekhelela busa kyaawawo, waakila kamakuumba kaabwe abe kaakhabonekha ta, keereka busa.

²²Buulamu bw'omuundu lukanile buutsya bwoolela ilala imakoombe, woolela ilala aambi ni khuufwa.

²³Luukana inyala yaabayo malayika, nga ali mutweela khu baakaanisi ba Wele, unyala waatimiilila umutsiina khuumuyeeta, waamushebusa bibiindu ibyo byeesi ali ni khuukhola.

²⁴Khulwe shiisa, malayika uyo anyala waaloma, umuundu uyo baamukaangulula. Shino shiba shiwonesa umuundu uyo khuulekha khukhwiikha imakoombe ta. Khulwekhuuba malayika waamusikuule khukhwaama mu byeesi alimo.

²⁵Kumubili kw'omuundu uyo kwiilayo bushaakha kwaaba nga kw'omusoleeli, weelayo wekela nga n'aaba nga ashiili umuhele.

²⁶Nio lwanyuma uli umuundu uyo aloomba isi Wele, Wele waakaanila khuuloomba khweewe. Khulwekhuuba Wele eyakhila babaandu bibyoonako, khulwe buwonesi bwaabwe.

²⁷Shino shikila umuundu weekhoya nga ali mu lituuli lye babaandu, nga aloma ari: “Ise naba umwoonaki, naakhola bibikhali biilayi taawe, ne bona ari Wele waayintsiyakhila.

²⁸Wele wambonesile ise khuutsya i makoombe, ise naaramire nga ishiili umulamu.”

²⁹Bona tsifuunda tsiingali, Wele akholela babaandu bibiindu biikali naabi.

³⁰Awonesa buulamu bw'omuundu khuulekha khutsya i makoombe ta, aryo waamuwa kumwikhoyo kwe khuuramawo nga ashiili umulamu.

³¹Yobu, ari iwe rekeeresa byeesi ise ndikho inoma; iwe sila busa, urekeerese byeesi ise inganikha.

³²Noola uliyo ni she khuukanikha, n'untsilemo; iwe kanikha, khulwekhuuba ise ingana imbone indi, iwe s'uulikho ni kumusaango ta.

³³Ne nga ta, iwe rekeeresa byeesi ise inoma; iwe sila busa urekeerese ise ikhuleekele iwe bibiindu bye kamakhula.