Read lumasaaba Yobu 34 Bible Online

Yobu 34 - lumasaaba bible

Yobu 34

¹Kila Elihu eloosela nga aloma ari:

²Inywe muli basaani be kamakhula, ni murekeerese tsilomo tsyase; ni mumbuliilise buulayi, inywe mumuuli ni khuumanya.

³Khulwekhuuba khukhuru khuliwo khulwe khurekeeresa tsiinganikha, mu saambo niyo indweela, luulimi lwaamanya shishiindu nga shiilayi namwe ta.

⁴Khayo ifwe fwabeene khukhalewo shiina nisho sha ŋali; khayo musiifwe fwabeene khukhalewo shiilayi nisho shili.

⁵Khulwekhuuba Yobu alikho aloma ari niye s'aalikho ni kumusaango ta; aloma ari Wele siwamwokesanisile bwa ŋali taawe.

⁶Niye abona nga kumusaango kweesi bamukhaliile sikuli kwa ŋali taawe; abona ari ikhaba nga s'aalikho ni shishoonako ta, ne bamukhupile liikuma lye kamaani naabi.

⁷Mwaabonatsakho umuundu uwibirisa nga umusaani yuno Yobu? Waawulusa khuulekelesa nga umuundu n'aanywa kameetsi.

⁸Abuya mu lituuli lye baboonaki, naluundi akeenda ni naabo babaakhola bibiindu biibi.

⁹Khulwekhuuba niye aloma ari abe umuundu akhaloondelela kamakaambila ka Wele, mbaawo sheesi afuunamo ta.

¹⁰Ni nashiryo, inywe basaani be kamakhula, ni murekeerese byeesi ise inoma; Wele s'aanyala wakhola bye bubwoonaki taawe. Ilala Umunyali uwa byoosi s'aanyala waakhola shishiindu shiibi ta.

¹¹Khulwekhuuba niye aliiha buli muundu khuuloondekhana ni biikholwa byeewe, aliiha buli mutweela khuuloondekhana ni saambo isi ebirisamo.

¹²Umunyali uwa byoosi s'aanyala waakhola bye bubwoonaki ta; Wele s'aanyala wabirisa umuundu mu saambo imbi ta.

¹³Naanu uwa Wele buunyala bweesi ali ni nabwo; naanu niye uwamuwa bunyala bweesi ali ni nabwo khu shibala?

¹⁴Siinga Wele arusa mu muundu kumwooyo kweewe, naluundi waamurusamo kumuuya kweesi ahela,

¹⁵babaandu boosi banyala baafwa, baryo shaakila beekela lifukhuulu luundi.

¹⁶Nga muli ni kamakhula, ni murekeerese bino; ni murekeerese byeesi ise ndikho inoma.

¹⁷Wele alekha khuba ukana bwa ŋali ta, khali ali umuwuli? Ari iwe unyala uryeena wekiitsa uyo uuli umukhosefu, naluundi uuli uwe kamaani ke angaaki?

¹⁸Wele niye uwikiitsa bayiinga babaakhola bibiindu biibi; naluundi ni baraangirisi baboonaki niye ubekiitsa.

¹⁹Wele s'aalikho ni khuuloma uri akana baraangirisi khuuminyisa babaandu babaandi ta; namwe bari akana bayiindifu khuuminyisa abo babaali bataambi ta, khulwekhuuba niye uwababuumba nibo boosi.

²⁰Babaandu baalala bafwa khaangu busa mu shilo; mu shilo akari baalala bafuna bihangafu baryo baafwa, ikhaba abo babaali be angaaki bafwa, akhuba bari khulwe kamaani ke babaandu babaandi ta, ne khulwe kamaani ka Wele.

²¹Khulwekhuuba niye abona buli sheesi umuundu akhola, naluundi abona buli esi atsya.

²²Mbaawo shishiilima namwe shiifwo shisheebisa, isi baboonaki banyala khukhwibisa babeene ta.

²³Khulwekhuuba niye siwaakhalilawo umuundu yeesi imbuka, isi ali ni khuutsiilamo isi Wele ari nio amukhalile kumusaango ta.

²⁴Seshimwikoombesa niye khuunyoowa khuwentselesa, bari nio arusewo umuraangirisi mutweela arewo ukuundi ta.

²⁵Ni nashiryo, khulwekhuuba niye nga waamala khaale khuumanya biikholwa byaabwe, abarusa khu bunyala mu shilo, waabaminiaangula baawawo.

²⁶Aabakhupila abulafu nga buli mutweela abona waabamalila aasi khulwe bubwoonaki bwaabwe.

²⁷Aakhola shino khulwekhuuba baamwantsukha niye, naluundi sibaalondelela kamakaambila keewe ta.

²⁸Babirisa bataambi buubi shaakila bakuukuula isi Wele, bari abawe buyeeti; ilala Wele waawulila kamalilo kaabwe.

²⁹Siinga akhalawo waasila busa, naanu unyala khuumwikiitsa? Namwe waakhalawo webisa khukhwaama khu baandu, naanu unyala khumubonakho? Mbaawo unyala khuumubonakho, ikhaba umuundu namwe linaambo ta.

³⁰Mbaawo aba sheesi kamanaambo kanyala khuukhola, khukhwakamisa umuraangirisi yeesitsana khuubamiinikhilisa ta.

³¹Khulwekhuuba mbaawo uwaalomelakho Wele ari, Wele iwe wambeele ise shitaambiso shishiimala, siingane niileyo khuukhola bibyoonako luundi ta.

³²Iwe waalomelakho Wele ari, iwe n'uuntsokese bibyoonako byeesi ise ikhola? Naluundi waakhalawo uri singene wiileyo ukhole bye bubwoonaki luundi taawe?

³³Khukhwaama nga iwe n'uukhaandisa byeesi Wele akhola, iwe wambaasilisa uri niye anyala khuukhola byeesi iwe ukana? Khulwekhuuba iwe niye uli ni khuukhalawo, akhuba ise ta; iwe ari kanikha ukhuboolele ifwe byeesi wambaasa.

³⁴Uyo yeesi uuli ni kamakesi kane anomele ise, naluundi abo babaali be kamakhula babawulila byeesi ise inganikha kane balome bari:

³⁵“Yobu alikho akanikhila mu khulekha khumanya ta, ni tsiilomo tsyeesi aloma sitsilimo itsamu ta.”

³⁶Ise nikoomba indi khali Yobu bamuwotsesele khukhwoolisa kumusaango ni kwaakamayo, khali muboone muri akanikha nga umuundu uli umwoonaki.

³⁷Khulwekhuuba khu bumiinyi bweesi niye ali ni nabwo, alooselakho busa bibyoonako, naluundi eloosela busa khuukhaandisana ni nafwe. Afwotsola Wele naluundi s'akamisa khuukhaandisana ni naye ta.