Read lumasaaba Yobu 35 Bible Online

Yobu 35 - lumasaaba bible

Yobu 35

¹Kila Elihu eloosela aloma ari:

²Yobu, iwe wambaasa uri shili shituufu, iwe khuuloma uri iwe s'uuli ni kumusaango isi Wele ta?

³Namwe iwe khureeba Wele uri, “Bibyoonako byase iwe bikhuwaambakho? Shiina sheesi ise ifunilemo, mu khulekha khukhola bye bubwoonaki?”

⁴Yobu, ise inakhwiilamo isho, iwe atweela ni basaale boowo.

⁵Yiinyusa tsiimoni ulole mu ngaaki, ubone; ubone kamafuumbi nga ni keyiingile mu ngaaki, khuukhuminyisa iwe.

⁶Iwe waakhakhola bibyoonako, isho Wele shimukholakho shiina? Iwe waakhoonaka tsifuunda tsiingali, Wele shimukholakho shiina?

⁷Iwe waakhakhola bibiindu biilayi, mbaawo sheesi ulikho umuwa niye ta; mbaawo sheesi Wele ekoomba khukhwaama khus'iiwe ta.

⁸Bubwoonaki bwoowo bukila babaandu babaandi bataambisibwa; ni buulayi bweesi ukhola bubayeeta nibo.

⁹Nga iliwo uuli khuuminikhilisa babaandu, belootsa; belootsela uyo unyala khubatimiilila waabawonesa.

¹⁰Ne sebatimila isi Wele umubuumbi waabwe ta, naluundi ubawa kumwiyikino nga bali mu bihangafu ta.

¹¹Sebatimila isi Wele, ukhuwa ifwe kamakhula, shaakila khwaaba bakesi khuuminyisa tsiisolo namwe biinywiinywi ta.

¹²Balila nga bakana buyeeti, ne Wele s'abayeeta taawe, khulwekhuuba bali babeniinisa angaaki naluundi bali baboonaki.

¹³Ilala baakhalila, ne Wele s'aarekeeresa ta, namwe umunyali uwa byoosi s'abenanayo ta.

¹⁴Ne abe iwe Yobu uloma uri s'uubona ni Wele ta, aba kane shibe shiryeena? Kumusaango kwoowo kuli muumoni tsyeewe, nashiryo iwe liinda nga wiikhaliilikha.

¹⁵Iwe wambaasa uri Wele s'enaanayo khu byoonako ta; uri niye s'aawa shitaambiso isi baboonaki ta.

¹⁶Yobu, iwe seshikhuyeeta khukhwiloosela ni khuukanikha bibiikhalimo ta; khulwekhuuba shabonekhaane shili iwe ukanikha byeesi ukhamanyile ta.