Read lumasaaba Yobu 36 Bible Online

Yobu 36 - lumasaaba bible

Yobu 36

¹Kila Elihu eloosela aloma ari:

²Yobu, intsikhaliilikhekho khafwiiti, ise imbewo ni byeesi ikhwookesanisa; khulwekhuuba iliwo sheesi ise ingana khuukanikha mu lisina lya Wele.

³Kane ise ikhwookesanise iwe ndi indi ni kamakhula mu biindu biikali naabi, ikhwookesanise iwe indi, byeesi umubuumbi wase akhola bili bya ŋali.

⁴Mu ŋali tsilomo tsyeesi ise inoma setsili tsye bubeeyi ta; ise is'ubona ibweeni woowo indi umusaani uwe kamakhula ke angaaki.

⁵Bona, Wele ali uwe kamaani, naluundi s'aalekelesa umuundu yeesitsana ta; ali uwe angaaki mu maani ni mu khumanya.

⁶Niye s'aafukiilisa baboonaki khuuramawo nga bali baalamu ta, ne abo babaali bataambi niye ababirisa buulayi.

⁷Wele atseeta abo babaali baakhosefu; abalekha nibo baawula nga bayiinga naluundi waabafukiilisa khuuba ni shiriifwa biifukhu byoosi.

⁸Ne nga babaandu bali baabowe mu minyololo, bataambisibwa khulwe biikholwa byaabwe,

⁹Wele abokesanisa biikholwa byaabwe byeesi baamala khaale khuukhola, naluundi waaboolesanisa ari bibyoonako byaabwe byaatuumile buukali.

¹⁰Niye ekula kamaru kaabwe shaakila baarekeeresa byeesi niye aloma, naluundi waalakila ari baakamise bye bubwoonaki.

¹¹Ni baba bari baarekeeresire bya Wele naluundi baakhola byeesi niye aloma, bamenya buulamu bwaabwe nga bali mu buyiindifu, ni kimiiko kyaabwe kyoosi baba nga bali mu mwikhoyo.

¹²Ne nga sibaloondeleele byeesi niye aloma ta, bafwiila mu busoolo, baryo baafwa busa akhali kamakhula ta.

¹³Abo babaakhesaaya Wele ta, bamenya nga bali ni liirima mu myooyo kyaabwe; nashiryo abe Wele akhabawa shitaambiso, sibenaanayo khuumulilila bari abawe buyeeti ta.

¹⁴Bafwa nga bashiili bahele; ni buulamu bwabwe babumenya bwoosi nga bali mu khuswaala.

¹⁵Wele awonesa abo babaali mu mutaambo khukhwaama mu mutaambo kwaabwe, naluundi abaleekela nga eyetisa bihangafu bibikhali bitweela ta.

¹⁶Wele aakhuyeete iwe wakhurusa mu bihangafu byeesi wabamo, naluundi niye waakila iwe waamenya mu lukoosi; iwe wanyalisa khuulyatsaka bibiindu biinulu muungo mwoowo.

¹⁷Ne bona ari iwe ulikho ufuna shitaambiso shibuufu sheesi baboonaki bafuna; Wele waakhukhaliile iwe kumusaango kwe khutaambisibwa, naluundi uli ni khuukhola shitaambiso sheesi niye akhuwa.

¹⁸Iwe uli ni khukhwitsiiliilisa ubone uri buyiindifu sibukhukhoongelesa ta, naluundi abo babaalya iwoongo bakhakhuyiyanisa iwe ta.

¹⁹Buyiindifu bwoowo mbaawo sheesi bunakhuyeeta ta; ikhaba kamaani koowo ari sikalimo kumukaso ta.

²⁰Iwe ukhekoomba uri khali shiilo shoolile ta, mu mbuka isi kamanaambo kakhakoraanirewo busa mu khaangu.

²¹Yitsiiliilisa ubone uri siwihaambila mu byoonako ta; khulwekhuuba khutaambisibwa khwakhwitsila iwe, bari nio ulekhe khubiwaambilamo ta.

²²Iwe uli ni khuushiimanya uri Wele ali ni buunyali buukali naabi; mbaawo unyala waaba umuleekeli weewe ta.

²³Mbaawo unyala khumuboolela sheesi ali ni khuukhola ta, namwe waamulomela ari niye waakholile she bubwoonaki ta.

²⁴Ni nashiryo, busheele shebulila khuruuya byeesi Wele akhola; bibiikila babaandu babaandi baamuruuya.

²⁵Buli mutweela waamala khuubona sheesi Wele akhola; ne ifwe khunyala busa khubibonela khukhwaama aleeyi.

²⁶Iwe uli ni khuushimanya uri Wele ali uwe angaaki naabi, ifwe sikhunyala khwamumanyila ilala ta; namwe sekhunyala khwaamanya kimiiko kye buukhulu bweewe ta.

²⁷Khulwekhuuba Wele niye ubukula kameetsi khukhwaama khu shibala, waakila keekelamo ifula.

²⁸Niye ukila ifula yaakhupa khukhwaama mu mafuumbi, waakila yakhupila babaandu be khu shibala boositsana.

²⁹Mbaawo umuundu unyala khuumanya nga kamafuumbi ni kakeenda, namwe nga ifula n'ikuulila mu ngaaki isi Wele amenya ta.

³⁰Bona niye asalanisa luheni mu ngaaki mwoosi, ne mu lwaalo mwe inyaantsa murama nga muli mu shiilima.

³¹Khulwekhuuba Wele akhalila babaandu kimisaango nga abirira mu byeene bino; naluundi khubirira mu nibyo waabawa biilyo mu bukali.

³²Niye waakukhuulila luuheni mu makhono keewe koombi, naluundi niye ululakila shiifwo mweesi luli ni khukhwaatikhila.

³³Khukuula khwe ifula khumanyisa khuri ifula iye khuungu ilikho yiitsa, ikhaba tsiikhaafu natsyo tsyokesanisa tsili ifula iy'ekhuungu ilikho yiitsa.