Read lumasaaba Yobu 37 Bible Online

Yobu 37 - lumasaaba bible

Yobu 37

¹Khulwe ifula iye ikhuungu iyo, kumwooyo kwase kunikina kwayeŋaana busa.

²Inywe mweesi ni murekeerese liikono lya Wele nga ni likuulila angaaki, nga ni likuula khukhwaama mukhanwa mweewe.

³Wele aasiindikha luuheni lwamalatana mu ngaaki mwoosi, lwaamulikha shibala shoosi khukhwaama khu ndulo khukhwoolisa khuundulo.

⁴Lwanyuma lwayo khuukuula khwe liikono lyeewe khuwulilikhana, khuukuula khwe liikono lye shiriifwa, ni mu mbuka iyo yoosi luuheni luba lulikho lumulikha.

⁵Khuubirira mu likono lyeewe, Wele akuula ni kamaani naabi; naluundi niye akhola bibiindu bye kamaani byeesi ifwe khukhanyala khwaamanya ta.

⁶Khulwekhuuba niye alakila kamararara kaakwa aasi; ikhaba khaafula khakhamunyakala, n'iikufula kwe kamaani, byoosi niye ubilakila.

⁷Niye akila buraambi bwe babaandu bwaakama, khulwe ifula ni kamararara; nio waakila wakhwookesanisa ifwe byeesi niye anyala khuukhola.

⁸Nisho shikila ni tsisolo tsye mwirome tsyengila mu malowo mweesi tsikona, tsyarama ibweene iyo.

⁹Ikhuungu iye kamaani yaama isi imenya, n'iimbewo ireera bunyifu nayo yaama isi ikona.

¹⁰Nga Wele waahelele kumuukha kweewe, kameetsi keekyela kamararara; karyo waakila keekyelamo kubaale kwe kamararara.

¹¹Kamafuumbi Wele aketsusamo luuheni, waakila waalusiindikha khuumulikha buli aandu.

¹²Kamafuumbi kano katsya nga keebotokhelela nga umweene n'akaraangirira khuutsya khukhola khu shibala shoosi buraambi bweesi umweene aba waakanile.

¹³Wele aasiindikha bibiindu bino khu shibala, luukana nga akana khuuwa shiibala shiitaambiso, namwe nga akana khukhwookesanisa khuukana khweewe.

¹⁴Yobu, iwe reka khukhuru uwulile bibiindu bino; iwe silamo khakyeekhe wambaase khu biindu bye kamaani, byeesi Wele akhola.

¹⁵Iwe waamanya isaambo isi awa bibiindu byeewe kamakaambila, nio waakila luuheni lwaamulikha khukhwaama mu mafuumbi?

¹⁶Iwe waamanya isaambo isi kamafuumbi kakelakelamo mu ngaaki, nga buno ni buli buraambi bwa Wele bwe kamaani?

¹⁷Iwe siwaamanya ta: iwe uwulila busa buukhafu bwe imbewo imbile khukhwaama imwaalo we shiibala, nga bulikho bukhwookhelela mu shikwaaro shoowo.

¹⁸Iwe unyala khuuyeeta Wele khuubasa liikulu waalibambulula, lyafwaana busa nga shiibya sheesi bamiliisile ni kamafura?

¹⁹Ari iwe khuleekele ifwe byeesi khunyala khuuboolela Wele; ifwe sikhunyala khwakhaandisana ta, khulwekhuuba mbaawo sheesi khwamanya ta.

²⁰Ise singane niikoombe khuukanikha ni Wele ta; khulwekhuuba awo imba namuweele ikhabi iye khukhuuntsira ise.

²¹Ari buwaanga bwe mu ngaaki buli bwe kamaani naabi, mbaawo unyala waabulolayo ta; ikhuungu yawuutsile kamafuumbi koosi yaakamalilewo.

²²Wele eetsa khukhwaama ingaaki we shibala nga ali mu shiriifwa she zaabu; shiriifwa shishiili khu Wele shili she kamaani naabi.

²³Shiriifwa sha Wele shili she angaaki naabi, ifwe sekhunyala khwaashisyeenda aambi ta; ali umukhosefu naluundi araambisa bwa ŋali mu byoosi byeesi niye akhola.

²⁴Ni nashiryo babaandu bamuwa lukoosi lwe angaaki naabi; khulwekhuuba niye s'enaanayo isi abo babeyila nga baakesi, ikhaba nga sibali bakesi taawe.