Read lumasaaba Yobu 38 Bible Online

Yobu 38 - lumasaaba bible

Yobu 38

¹Lwanyuma Umukasya weetsila mu mbewo iye kamaani waakanikha isi Yobu nga aloma ari,

²Iwe niye naanu nio wikanakane kamakhula keesi ise ndi ni nako, nga uraambisa tsiilomo tsitsikhalimo ni kumukaso ta?

³Ari iwe yiimikha khu ngaaki ube umunyindaalifu nga umusaani; wiilemo bireebo byeesi ise intsya khukhureeba.

⁴Ise nga ni nabuumba shiibala, iwe wabayo? Nga iwe waamanya bibiindu biikali, imboolele khubone.

⁵Naanu uwakhalawo buubalaayi bwe shiibala? Naanu niye uwahaamba kumukosi kukwashipima? Iwe wiyila nga uwamanya, imboolele khubone!

⁶Kumusiingi kwe shiibala kwayima khu shiina? Namwe naanu niye uweemisa kuuyeko kwe musoonda?

⁷Iwe wabawo nga tsinieniesi ni tsyeemba kimyeenya, naluundi nga babaamenya mwikulu boosi ni beemba khulwe kumwiikhoyo?

⁸Naanu niye uwarawo litikiiyi lilikhaliilisa inyaantsa, nga ni yasaalikha khukhwaama mu liloba?

⁹Naanu niye uwakhola kamafuumbi keekela niko kakaabiimba khu nyaantsa, naluundi waakhola kamafuumbi kamamali kameene khuukibotookhelela?

¹⁰Naanu niye uwakiwa lulwaakha lweesi ili ni khuubirira, naluundi waakyokesa isi ili ni khukhwakama?

¹¹Naanu uwakilomela ari, uli ni khukhwaakama awo, ni khukhwilyebula khwe kameetsi khwoowo khuli ni khukhwakama awo?

¹²Khukhwaama nga usaalikha, iwe waalakilatsakakho shifukhu khuurakikha, namwe waalakila uri antsye bushe?

¹³Iwe waalakilatsakakho uri kumutishinyi kwibotokhelele shiibala shoosi, nio akile baboonaki batitukhe khukhwaama isi beebisile?

¹⁴Buwaanga bwe kumuusi bukila kamatila ni tsingiingi tsyerurukhilila busa, nga umuundu n'aabona khu ndulo khwe shikwaaro, yaaba busa nga umuundu n'aakhola khaabonelo mu liloba lye tsinyuungu.

¹⁵Uri busha kumuusi, sheesi umwoonaki alaanga ari buwaanga bweewe, buba bwaarusibwilewo, ishino shaabakhaangabisa nibo khuukhola biikholwa bye bisayuumba.

¹⁶Iwe waabonakho imoni yeesi inyaantsa itubukhamo? Namwe iwe watsyakho wakeenda mu lwaalo lwe inyaantsa?

¹⁷Iwe waabonakho shiilibwa shishiitsya imakoombe, namwe waabonakho shiilibwa shishiitsya isi shishiilima namukoto shili?

¹⁸Iwe waamanya buubalaayi bwe shibala nga ni buli? Iwe noola waamanya bibiindu bino byoosi, iwe imboolele.

¹⁹Iwe waamanya isi buwaanga bumenya, namwe isi shishiilima shaama?

²⁰Unyala wabyookesa buli shibira lulwaakha lwabyo, namwe wabyookesa buli shitweela intsila itsya iwasho?

²¹Ilala, iwe uli ni khuuba waamanya, khulwekhuuba byatsya khubawo abe iwe wasaalikha, naluundi iwe uli ni kimiiko kye buukhulu kimikali naabi.

²²Iwe waayiingilakho mu shirara shishibiikha buunyifu bwe kamaani, namwe waayiingilakho mu shirara she kamararara,

²³byeesi ise nabiikha naluundi naabireera mu mbuka iye bihangafu, mu bifukhu byeesi babaandu basoolanila mu busoolo.

²⁴Iwe waamanya intsila itsya isi luuheni lwaama, namwe intsila itsya isi imbewo iwuutsa khukhwaama ibwaamanyaanga yaama?

²⁵Naanu uwayaba kumukhoosi kweesi ifula iye kamaani yiitsilakho, naluundi kweesi ifula iye ikhuungu ingali yiitsilakho?

²⁶Naamu ureera ifula khuukhupa mu bifwo mweesi babaandu bakhamenya ta, ni mu mubiimbi mu mukhali babaandu ta?

²⁷Naanu usiindikha ifula mu liloba lilyoomu naluundi liliili lyonyene busa, nio shaakila bunyaasi bwaarura nga aasi anyiriire?

²⁸Ifula ili ni paapawe ukisaala, namwe naanu niye usaala liime?

²⁹Naanu niye uwasaala kamararara kakekela khaale kubaale, naluundi naanu niye uwasaala kamararara kakaalakala khukhwaama mu ngaaki?

³⁰Naanu ukila kameetsi kaakhuna kekela nga libaale, namwe inyaantsa yaakhuna khu ngaaki nga libaale?

³¹Iwe unyala waabusaasa tsinieniesi musaafu tseesi balaanga bari Puladesi, waatsibowa atweela ni kumukosi, namwe unyala waakaangulula kimikosi kikyabowa atweela tsinieniesi tsitaru tseesi balaanga bari Oryoni?

³²Iwe unyala waaraangilila tsinieniesi waabona uri tsili ni khuubonekha mu mbuka isi tsyakhiile khuubonekha, namwe waaraangirira kuusolo shiibulukhu ni tsiinyana tsyakwo?

³³Iwe waamanya kamakaambila kakaawula bibiindu bibiili mu ngaaki? Iwe unyala waakhola kamakaambila ako kaawula bibiili khu shibala?

³⁴Iwe unyala waraambisa liikono lyoowo khulakila kamafuumbi, nio waakila ifula yaakhupa kameetsi koola khusalasala kaakhumila iwe?

³⁵Iwe unyala khuulakila luuheni lwaamulikha, nio akile lwiitse isi iwe uli lulome luri, “Ise niy'ooyu”?

³⁶Naanu uwara kamakhula mu mafuumbi namwe ulakila ni namufweeli waaba ni khuumanya?

³⁷Naanu uli ni kamakhula kakaamunyalisa khuubala kamafuumbi? Namwe naanu unyala waakakhola kaakila ifula yaakhupa?

³⁸Naanu ukila lifukhuulu lyekelamo liiloba liliili atweela, namwe naanu ukila liiloba lye khu shibala lyarama nga lyawambaana atweela?

³⁹Iwe niye uweentsela tsitalanyi biilyo nio tsyaalya, namwe iwe niye uliisa tsitalanyi tsiinyana,

⁴⁰nga ni tsiba tsyebisile mu mafuluma kaatsyo, namwe nga tsebuliile isaanyi isi tsitsya khuwaamba?

⁴¹Naanu niye uwa biinywiinywi biilyo, nga bilikho biyiiya ni ntsala, nga kamaana kaabyo kalikho kaandilila ise khulwe ntsala?