Read lumasaaba Yobu 39 Bible Online

Yobu 39 - lumasaaba bible

Yobu 39

¹Iwe waamanya imbuka isi tsiimbusi tsye mwiirome tsisaalilamo? Namwe iwe waamanya waabonakho ikhisi nga isaala?

²Iwe waamanya imbuka isi bimala nga byeelukhile nio byasaala? Namwe iwe waamanya imbuka isi bisaalilamo tsiinyana tsyabyo?

³Iwe waamanya imbuka isi tsiinamilamo aasi khu liloba, nga tsitsya khuusala tsiinyana tsyatsyo?

⁴Nga tsili mwiirome umwo, tsiinyana tsyatsyo tsitsowa tsyaaba ni kamaani, tsyaatsya tsyaamenya khubwatsyo, tsyaalekha khuukobolayo isi maawaabwe ta.

⁵Naanu uwalekha tsisikilya tsye mwiirome ari tsikeende busa nga tsindekhuule? Naanu utsikaangulula nio waakila tsyamoola busa buli aandu?

⁶Ise natsiwa nitsyo kumubiimbi khuuba muungo mwatsyo, ise naatsilekha khuumenya mu liloba liliili busuumbu busa.

⁷Tsimenya aleeyi nashiryo setsiwulila liyoombo lye mu shiriimba ta; mbaawo unyala waatsibaya waakila waatsikhola khuuraamba buraambi ta.

⁸Kamaayilo kaatsyo kali mu bikoongo, iyo niyo isi tsyaayila khu bunyaasi ni bisaala bibiiliyo.

⁹Imoongo iwuunwa inyala yaakhuraambira iwe buuraambi? Iwe unyala waakibowa yaakona mu litaala iwoowo?

¹⁰Iwe unyala waakibowa ni kimikosi waanyalisa khukilimisa, namwe waakirakho shikyeenga yaakhweesa nga ikhabala kumukuunda?

¹¹Iwe unyala waakiyikina bari khulwekhuuba niyo ili ni kamaani kamakali, uri kane niyo ikhukholele iwe kimilimo kyoowo kimisiro?

¹²Iwe wambaasa uri niyo inyala yaakhukhweesela iwe bye likesa yaakhureerera ingo, naluundi uri kane ikhusutile bye likesa khukhwaama isi ubiwuulila?

¹³Tsindaaha tsye kunyoofwe tsikhupaka ni likono liikali busa, ne mbaawo inyoofwe inyala yaapamburukha nga likhuuyi ta.

¹⁴Khulwekhuuba inyoofwe ilekha kamaki kaayo khwiiloba, liiloba lyaaba nilyo lilikareerera buukhafu.

¹⁵Niye s'iimanya iri inyala yaabayo shishiinyala shakakhaandakilila aasi mu bikele, namwe bari isolo iye mwiirome inyala yaakaaraka ta.

¹⁶Inyoofwe yaantsukha busa kamaki kaayo, kaafwaana busa kakaakhali kakaayo ta; yafwaana busa nga ikhenaanayo khu byeesi iluyiilekho ta.

¹⁷Shili shiryo khulwekhuuba Wele s'aakiwa niyo kamakhula ta, niye aakikhola khuuba isilu.

¹⁸Ne nga yenyukhile khukhwiiyiinga mu byeesi ikhola, ikhaasisa iŋwaaŋwa ni nooyo uukitimilakho.

¹⁹Yobu, iwe niye ukila ne tsiŋwaaŋwa tsyaaba ni kamaani ke angaaki karyo? Namwe iwe niye uwatsiwa kamayeeye kakaali mu makosi kaatsyo?

²⁰Iwe niye ukila tsyatima nga tsisuna busa nga tsiisike, waakila khulwe khufuura ni kamaani tsyariisaka babaandu?

²¹Tsilima bibutusi byatso mu liloba aasi tsyokesanisa nga ni tsili ni kamaani; tsitsya mu busoolo ni kamaani kaatsyo koosi.

²²Nitsyo setsilikho ni khuurya khwoositsana ta, naluundi mbaawo shishinyala shaatsiriisariisa ta; ikhaba luurima seluriisariisa iŋwaaŋwa ta.

²³Bye busoolo byeesi babaatsiikhalakho basuta, kali kamafumo kakaamulikhamulikha mu buwaanga bwe nyaanga.

²⁴Khulwe bunyindaalifu ni kamaani, nitsyo tsitima busa nga tsitsya muumoni, ikhaba baakhafuura ifulumbeti, nitsyo setsiima ta.

²⁵Buli lweesi bafuurira ifulumbeti, nitsyo tsiheela nga tsifuura ni kamaani, tsyanyalisa khuuwunyila busoolo nga tsishiili ni khukhwoola aambi ta, naluundi tsyawulila nga baraangirisi be kamahe ni bakhookhela basilikhale baabwe.

²⁶Kamakhula ke khuupamburukha nga ikhosi n'ibayuula tsiindaha, yaapamburukha yeekha kwe imwaalo, yaakaamisa khuusi iwe?

²⁷Ikhosi iliinda iwe waanyoowa waakilakila, nio waakila yaatsya yoombakha shiiswi shayo mu ngiingi?

²⁸Kunywiinywi waasu kwoombakha shiiswi mu mabaale mu ngaaki, nio waakila kamabaale kakeyiinga ako kekyela luumako lwakwo.

²⁹Yiimikha ibweene iyo nio yaabona buulayi she khuulya; nio waakila imoni yayo yaabona nga she khuulya shili aleeyi.

³⁰Tsiikhosi tsibuusanila isi shishiindu shifwiliile, nio waakila kamaana kaatsyo kanuunamo kamalasile.