Read lumasaaba Yobu 4 Bible Online

Yobu 4 - lumasaaba bible

Yobu 4

¹Lwanyuma Elifasi abe uwaama i Temani, wenyusa mukhanwa waareeba ari:

²“Yobu, inakhukanikhayo khaalomo, kane ukhalale? Khulwekhuuba ise sinyala neloosela khuusila busa ta.

³Bona, iwe waleekela babaandu baakali, waayisamo kamaani mu baandu baakali.

⁴Bakali babaaba nga baawetsekheleele kamaani sibashinyalisa khukhwiima ta, ne iwe wabeesaatsakamo kamaani.

⁵Ne bona ari shakhwoolile khus'iwe, naluundi s'ulikho wokesanisa bubwikhaliilikhi ta; iwe waayeekhile, waaweelemo ni kamaani khaale.

⁶Iwe kamaani koowo koosi kaama mu khwisaaya Wele, ni nashiryo uli ni khuuba ni kamaani mu byeesi iwe wiyikina.

⁷Iwe yambaasa nga uloleelela bibiindu biikhale bye amataayi, ubone oba yaabatsakayo umuundu umukhosefu uwafunatsakakho bihangafu!

⁸Ise naabona ndi babaandu babaakhola bye bubwoonaki bye angaaki naabi, bareera bihangafu naluundi nabo babeene bafuna bihangafu.

⁹Wele abafuuwa busa kumuukha baafwa, niye abamalawo khulwe liirima lyeewe.

¹⁰Baboonaki babuutsa busa nga tsitalanyi, ne Wele amenyulaka kameeno kaabwe, waabakhola baayuna busa.

¹¹Bafwa busa nga tsitalanyi tsitsikhali ni she khukhwiira tsyaalya ta, ilala tsifwa waakila tsiinyana tsatsyo tsaasalanisibwa.

¹²Ari iliwo ilomo isi ise nawulila mu mbola busa, ise nakiwulila mu shimoonyo busa.

¹³Ise nakiwulila mu shilo nga indikho nambaasa khu bye khuubonekhelwa, mu mbuka isi babaandu baaba nga bali mu lilo lye kamaani.

¹⁴Ise naba ni khuurya khuukali ni khukhwiyembeelela, waakila kumubili kwase kwoosi kwanikina busa.

¹⁵Khaabewo khaanyifu khawuutsa nga khaambira ise mu moni, waakila ise buuri bwamaamba.

¹⁶Aabawo shishiindu nga sheemikhile awo shaasilile busa, ne nga s'enyala namanya nga oba nisho shiina ta. Aabawo khuuyuna khuukali, nio lwanyuma ise naawulila liikono nga liloma liri:

¹⁷Umuundu anyala khuuba umukhosefu mu moni tsya Wele? Umuundu anyala waaba nga s'alikho kumusaango mu moni tsy'omubuumbi weewe?

¹⁸Wele s'eyikina ikhaaba baraambi beewe be mwikulu ta; ikhaba baamalayika niye abona ari iliwo byeesi bakhoolelesa ta.

¹⁹Ari iwe wambaasa uri anyala weyikina umuundu uuli shibuumbe shishaama mwiiloba busa, uli busa nga isilili isi bakhaandakilila yaafwiila busa mu lifukhuulu?

²⁰Umuundu anyala khuuba umulamu kumutikhinyi, ne waafwa nga mbaawo ushimanyakho ta, nga ni angoloobe ashiili khukhwoola ta.

²¹Ibyo byoosi byeesi umuundu aba ni nabyo bimurusibwakho waarama busa, afwa, nga s'aali ni kamakhula ta.”