Read lumasaaba Yobu 40 Bible Online

Yobu 40 - lumasaaba bible

Yobu 40

¹Kila Umukasya eloosela areeba Yobu ari,

²Yobu, ari iwe unyala waakamisa khuukhaandisana ni nase, Wele, Umunyali uwa byoosi? Noola iwe ushiikana khuukhaandisana, ari intsilemo khubone!

³Kila Yobu elamo Umukasya, nga aloma ari:

⁴Ne bona ise ndi uwe kumukaso mukyeekhe naabi, ise inyala naakhwiilamo iwe, Wele, indishiina? Ise naakamisiile awo, singane inome luundi taawe.

⁵Ise naakanikhile luukali naabi, siingane inganikhe luundi taawe.

⁶Nio lwaanyuma Umukasya weetsila mu mbewo iye kamaani waakanikha isi Yobu nga aloma ari:

⁷Ari iwe yiima khu ngaaki ube umunyindaalifu nga umusaani; wiilemo bireebo byeesi ise intsya khukhureeba.

⁸Ari iwe ulikho uloma uri ise niye ulikho buwaangafu, nio umanyise uri iwe s'uulikho ni kumusaango kwoositsana ta?

⁹Iwe uli ni kamaani nga kakaase, Wele? Liikono lyoowo linyala lyaakuula nga lilyase?

¹⁰Noola shili shiryo, yiinyukha khu ngaaki wiimikhe mu lukoosi ni shiriifwa shoowo; wibowe shiriifwa ni khuukhuruuya.

¹¹Iwe eentsa abo babeniinisa angaaki; bookesanise liirima lyoowo lye kamaani, ukile beeleyo bekhuune basile busa.

¹²Iwe eentsa buli mutweela uwiniinisa angaaki, umwiise aasi eleyo ekhuune asile busa, naluundi ukhaandakilile baboonaki buli oosi isi bali.

¹³Basiikhe boosi ubakukhuulile aasi mwiiloba; ubabowe bamenye imakoombe.

¹⁴Nio lwanyuma nase kane ikhuruuye iwe, nase ifukiilise ndi iwe unyala waafuura mu khusoolana.

¹⁵Iwe loleelela kuusolo kwe kamaani kweesi balaanga bari Behemosi, kweesi ise nabuumba nga ni nakhubuumba iwe, nakwo kulya bunyaasi nga ikhaafu.

¹⁶Uli ni khuumanya uri kamaani kaakwo kanyoolikhana mu shisiintsa shangaaki, kamaani kaakwo kali mu mikotyo kikiibotokheleele iinda.

¹⁷Kwinyusa kumushiinga kwakwo kwoomaana busa nga kuusaala ku kedali, ni kimikotyo kye biikele byakwo kili kye kamaani naabi.

¹⁸Kuli ni kamakuumba kakaakhuna busa nga buroonzi, ni biikele byakwo bili busa nga kimitaliimbo kye biibya.

¹⁹Nikwo kuli kukuunyoowa mu bibuumbe byase byoosi! Uwakubuumba yenyene niye unyala wawaamba luurima khuukwiibwakala.

²⁰Buunyaasi bweesi nikwo kulya butsowa mu bikoongo, mweesi biisolo bibiindi bimenya.

²¹Nikwo kumenya aasi we kuusaala kwe kamawa, naluundi kweebisa mu makhalaamba kakaali mu shireende.

²²Kimisaala kye kamawa ni kimisaala kikiindi kikiitsowa aambi ni kameetsi, nimwo mweesi kwiikama kumuumu.

²³Abe luluutsi lwakheetsula, nikwo sikurya ta; abe luluutsi Yorudaani lwakhasalasala lwakwoola muumoni, nikwo kurama nga sikwiinaanayo ta.

²⁴Unyala khuuraambisa kumulobo waakuwaamba nga kwaboone? Namwe unyala khuukuwuna kumulobo mu moolu waakuwaamba?