Read lumasaaba Yobu 41 Bible Online

Yobu 41 - lumasaaba bible

Yobu 41

¹Iwe unyala khuuwaamba ikoonya nga uraambisa kumulobo kukuuwaamba tsinyeeni? Namwe unyala waabowa luulimi lwayo nga uraambisa kumukosi?

²Iwe unyala waakibowa kumukosi mu moolu kaayo, namwe waaruundura tsiisaya tsyayo nga uraambisa kumulobo?

³Iwe wambaasa uri niyo inyala yaakhwikoontselela iwe iri ukilekhe itsye? Inyala yaakhwikoontselela iwe iri ukiwaambile shiisa?

⁴Iwe wambaasa uri niyo inyala yaakhola ikwangwaani ni nawe, iri kane ibe umwakaanisi woowo buulamu bwayo bwoosi?

⁵Iwe unyala waakibowa waakinyaayisa nga uwinyaayisa khaanywiinywi? Namwe unyala waakibowa kumukosi waakikhweesa, uri nio babaakaanisi boowo b'ekhaana baloleelele?

⁶Babaaloba tsinyeeni banyala khukhaabisanila buukusi bweesi bakikula, namwe banyala bakireemakamo bakiikabanana?

⁷Iwe unyala khuuwuna lihaafu lyayo nga uraambisa kamafumo keesi baraambisa khukhwiira tsinyeeni, namwe waawuna kumurwe kwayo nga uraambisa liifumo ilyo?

⁸Ne waakitiilakho busa uri, s'uunyala waakhakakho weelakho luundi ta; naluundi s'uulibilila buusoolo bweesi ubiramo ta;

⁹Mbaawo umuundu yeesi uuli ni kumwiyikino kwe khuukiwaamba ta, khulwekhuuba buli ukibonakho akwa busa aasi khulwe buuri.

¹⁰Mbaawo umuundu uloma ari ali umurafu unyala khukisoyasoya ta; ne oba nga shili shiryo, naanu unyala wakhaandisa ise?

¹¹Buli umuundu yeesi uwuntsibwakala, ise imuwula mu busoolo ni kamaani ke angaaki naabi. Khulwekhuuba buli shishiindu shishiili khu shibala shili shishase.

¹²Khayo ise ikhuboolele iwe bibiwaamba khu bikele bye koonya, ni kamaani keesi ili ni nako, ni buboofu bwayo.

¹³Naanu unyala waakibaakakho liihaafu lyayo, namwe naanu unyala wengisa tsiintsala mweesi lihaafu lyefunyakila?

¹⁴Naanu uuli ni kamaani unyala wekulawo tsiisaya tsyayo? Kameeno kaayo konyene kakila umuundu waaba ni buuri.

¹⁵Kamakhakayu kakaali khu mukoongo khwayo niko kakaakila yeekana, khulwekhuuba kaayiwaamba atweela naluundi kaayoma nga libaale.

¹⁶Buli likhakayu lyaayiwaamba khu liindi, ikhaba imbewo yonyene senyala yengilamo ta.

¹⁷Buli lilibira lyaayihaamba khu liindi, koosi kali atweela busa nga mbaawo shishikawukhanisamo ta.

¹⁸Nga yaasimuule, kamame kalakala; naluundi tsiimoni tsyabesema nga inyaanga n'iirura khu lusike.

¹⁹Kumulilo kutindiima naluundi buunoro butamuukha khukhwaama mukhanwa mwayo.

²⁰Lisuusi liliili nga ilyo lilituukha nga boosha kamaandu, lituukha khukhwaama mukhanwa mwayo.

²¹Kumuukha kweesi niyo iheela kulimo bukhafu buunyala bwawaambisa kamaanda; ni kumulilo kutindiima khukhwaama mukhanwa mwayo.

²²Ili ni likosi lye kamaani naabi, waakila buli shishikibira ibweeni shititukha khulwe khuurya.

²³Tsinyama tsye kumubili kwayo tsyaakhuna, tsyahandalala busa nga shiibya, mbaawo unyala waatsikhala ta.

²⁴Niyo ili ni bunyindaalifu, mu mwooyo kwayo imbaamo buuri ta, yaakhuna ili busa nga luusisi.

²⁵Nga yeenyukhile khu ngaaki, ikhaaba abo babaali baanyindaalifu baterema: bakobolelayo kimikoongo khulwe khuurya.

²⁶Mbaawo she busoolo shishinyala sharaambisibwa khukiibwakala ta; khalube luurima, namwe liifumo, namwe kumusakhu, khwiibyo byoosi mbaawo shishiinyala shamukholakho shishiindu shoosi ta.

²⁷Abe shishiindu shaakhaba she shiibya, ne niyo ishiiyila busa khuuba nga liikhalaamba; ikhaba buroonzi ifuuntsakilila busa nga ufuuntsakilila shisaala shishabola khaale.

²⁸Abe waakhalasa bufumo bwe buyiingo sibunyala bwaakila niyo yaatitukha ta; abe waakhalasa kamabaale kafwaana busa nga ukholowa likhuutsi.

²⁹Imiimbo yakhaba imboofu irye, ili busa nga likhuutsi; waakhakholowa liifumo seshikiwambakho ta.

³⁰Kamakhakayu ke muunda aasi kaayokiya nga bikholoontsyo bye tsinyuungu; nga kwikhuruura kuŋuula aasi afwaana busa nga isi basiinyile ni kuusaala.

³¹Kushusaŋana kameetsi ke mu nyaantsa kafwaana busa nga kakaali khuututuba; kukila kameetsi kasaantsa nga kamafura ke tsiinyanyi khu mulilo.

³²Nga kutsya kulekha luufulo khu meetsi lulikho lumulikha busa, yafwaana uri inyaantsa yoosi ili iye liifulo liwaanga.

³³Mbaawo shibuumbe shoosi khu shibala sheesi unyala waakileekhaasakho ta; kuli shibuumbe shishikhali ni khuurya ta.

³⁴Biisolo bibiindi byoosi, mbaawo sheesi nikwo kubibalamo ta; nikwo kuli ni kamaani kwawula bisolo byoosi.