Read lumasaaba Yobu 42 Bible Online

Yobu 42 - lumasaaba bible

Yobu 42

¹Lwanyuma Yobu weelamo Umukasya nga aloma ari:

²Mukasya, ise naamanya indi iwe uli umunyali wa byoosi; iwe ukhola buli sheesi ukana khuukhola shoositsana.

³Iwe undeebire ise isi naamisa bunyala khukhwikanakana kamakhula koowo; Ilala, ise byeesi inganikhile, inganikhiile mu busilu, Ise inganikhile khu biindu byeesi ikhaamanya ta; khu biindu bibiili angaaki naabi byeesi ise ikhanyala naamanya ta.

⁴Iwe waanomela ise uri indekeerese nga ulikho ukanikha; uri niilemo bireebo byeesi ureebire.

⁵Makiboole abe ise byeesi namanya bibikhuwaamba khus'iiwe, abe bili ibyo byeesi ise nawulila busa khukhwaama khu baandu babaandi; ne ari ise samweene nakhuboone iwe ni tsiimoni tsyase.

⁶Ni nashiryo ise kamaŋaanyu kaamambile khulwe ibyo byeesi inomile, ari khayo niikhale mu lifukhuulu ni likoshe, khukhwookesanisa khukhwibiiyisa khwase.

⁷Lwanyuma nga Umukasya waamalile khuukanikha isi Yobu, kila alomela Elifasi ari: “Ise naakhukhalaliile iwe ni basaale boowo boombi. Khulwekhuuba inywe simunganikhilekho bibiindu bya ŋali, nga umwakaanisi wase Yobu naakholile ta.

⁸Nashiryo, ari muli khuubukula tsiyeeyi musaafu, ni kamamiiku musaafu mubiyilile Yobu, mubiwaaneyo nga isaayilo yeenywe intsoshe. Kane umwakaanisi wase Yobu abaloombele inywe, ni nase kane ifukiilise khuuloomba khweewe, nio akile ise indekhe khubawe inywe shitaambiso khulwe busilu bweenywe ta. Khulwekhuuba inywe simunganikhilekho bya ŋali nga umwakaanisi wase Yobu n'aakholele ta.”

⁹Ni nashiryo, Elifasi, nga abe uwaama i Tema, ni Bilidadi, nga abe uwaama i Shuwa, ni Zofari, nga abe uwaama i Namasi, baatsya baakhola nga Umukasya n'aabalomela. Shaakila Umukasya waafukiilisa khuuloomba khwa Yobu.

¹⁰Lwanyuma lwayo, nga Yobu waamalile khuuloombela basaale beewe batsana, Umukasya waamwiisilawo bye buyiindifu bweewe, nga byoolamo kimiluundi kibili khuuminyisa ni byeesi aaba ni nabyo amakiboole.

¹¹Lwanyuma lwayo, babandaaye ba Yobu besaani ni bekhaana, atweela ni basaale beewe beesi aaba ni nabo makiboole, baatsya isi ali, baliila atweela kamayiiya muntsu yeewe. Baamulila naluundi baamusaasila khulwe byo byoosi byeesi Umukasya aamukholakho. Buli mutweela waamuwa tsinusu ni intsiyi iy'ezaabu.

¹²Aryo Umukasya waawa tsiikhabi buulamu bwa Yobu bwaanyuma khuuminyisa ni bweesi aabamo makiboole. Waaba ni kamasheese kumukaanda mutweela ni bikana bine (14,000), ni tsiŋamiya bikana bisesaba (6,000), ni tsikhaafu bikana bibili (2,000), ni tsisikilya shikana shitweela (1,000).

¹³Wasaala babaana liikhumi: basooleli musaafu ni bakhaana bataru.

¹⁴Umukhaana umukiboole waamutwiikha ari Yemima, ukhola khabili ari Keziya, ukhola khataru ari Kereni Hapuki.

¹⁵Mu shibala mwoosi abe mbaawo bakhasi babaamiliha nga bakhaana ba Yobu ta. Paapa waabwe nabo waabawa kumukabo khu biindu byeesi aaba ni nabyo, mu saambo niyo indweela nga ni aawa babaandayaabwe basaani.

¹⁶Lwanyuma lweebyo, Yobu waamenya khuumala kimiiko shitoondo shitweela, ni kamakhumi kane (140), woola ni khuuwaamba khu beetsukhulu, biisoni, biimiila, ni bitsookhe.

¹⁷Yobu waamenya woola mu makheengo, waafwa nga ali umusaakhulu uwe kimiiko kimikali naabi.