Read lumasaaba Yobu 5 Bible Online

Yobu 5 - lumasaaba bible

Yobu 5

¹Elifasi weloosela waaloma ari: Yobu, iwe yikhuunga anariha, kane ibewo uyo yeesi ukane akhwiilemo? Iliyo ikhaba malayika mutweela isi iwe unyala weyikina?

²Ilala, ilala, khukhwiyembeelela khwonyene, khuukila umusilu waafwa, ni bataambi bafwa khulwe liibuba.

³Ise naabonakho baasilu babaabonekha nga bali buulayi, ne ise naasiindikha shiitsubo muungo tsyaabwe.

⁴Babaana baabwe sibalikho ni esi banyala khuumulila ta, naluundi baakhabayila isi baakayi be kamakaambila, mbaawo uwiinyukha khu ngaaki waabatseeta ta.

⁵Umusilu akhaalima biilimwa, abo babaamuminya kamaani nibo babaabilya; ikhaba ibyo byeesi amalilakho kamaani kamakali naabi khuukesa. Abo babaali buulesa bekhala baaliliilila buyiindifu bweewe.

⁶Khulwekhuuba bubwoonaki sibutsowa khukhwaama mwiloba ta, namwe buhangafu sibwaama aasi khwiloba ta.

⁷Ne akhali ndi babaandu basaaliikhila mu shibala shishitsuule buwaangafu, nga n'ubona umuundu n'awaambisa kumulilo tsimweemwe tsaaniina mu ngaaki.

⁸Imba nga ise niye iwe, khali niloseele khuuloondelela Wele, naluundi khali imulekhile aba niye ukhalawo kumusaango kwase.

⁹Ifwe sikhunyala khwamanya bibiindu bye kamaani byeesi niye akhola ta, naluundi bye kamakaanga byeewe sibyakama ta.

¹⁰Niye usiindikha ifula yaakhupa khu shibala, naluundi niye ukila kameetsi kaatsya mu mikuunda.

¹¹Niye abukula abo babaali bataambi wabaniinisa angaaki, ni naabo babaali mu mutaambo niye ubawa kumwikhoyo.

¹²Niye uwoonakisa tsinengekharengekha tsyaabo babaali ni kimikhono kimileeyi, waakila baamayo busa akhali khakhaandu ta.

¹³Ashuukhila abo babaali ni kimikhono kimileeyi, waakila byeesi bakhola byaabaluyisa busa.

¹⁴Abe antsye akhaba nga ali kumuusi, ne nibo babuukabuuka busa nga babaali mu shiilima.

¹⁵Ne Wele awonesa baafuubi khukhwaama mu meeno ke baboonaki, naluundi awonesa bataambi khukhwaama mu meeno ke babaamiinikhilisa.

¹⁶Ni nashiryo ekalawo abo babaamiinikhilisa bashaabwe, waakila bataambi baaba ni khukhwiyikina.

¹⁷Umuundu isi Wele ekiitsakho, nga aba ali n'iikhabi! Ni nashiryo ukhalekelesa khukhwikiitsa khukhwaama isi Umunyali uwa byoosi ta.

¹⁸Ikhaba nga Wele umweene niye ukila umuundu webeena khulwe kamakoontsyo, ne niye umweene niye usilikha kamakoontsyo ako.

¹⁹Buli ifuunda isi utsiila isi Umukasya kane akhuyeete, abe waakhatsyayo tsifuunda tsiinga, s'anyala wakhwantsukha iwe ta.

²⁰Intsala yaakhakwawo, kane akhuliinde ulekhe khuufwa ta, naluundi mu busoolo kane akhutseete iwe khukhwaama khu basiku boowo.

²¹Wele kane akhutseete iwe khukhwaama khu baandu babaakhulomakho tsilomo tsiimbi, naluundi kane akhutseete ulekhe khukhwoonakisibwa ta.

²²Mu khwoonakisibwa ni mu ntsala, iwe ukhaarame nga uli umusangaafu, naluundi s'ukhaabe ni khuurya khulwe tsisolo tsitsiilya babaandu ta.

²³Khulwekhuuba kimikuunda kyeesi iwe ulima sikikhaabemo kamabaale ta, ni tsiisolo tsye mwiiswa sitsikhaakhwiibwakale ta.

²⁴Iwe ukhaamanye uri muungo mwoowo mulimo lukoosi, naluundi mbaawo shishikhebwakale shilye kamasheese koowo ta.

²⁵Lisaaye lyoowo likhaabe liikali libalaahe, libe busa nga bunyaasi khu shibala.

²⁶Ukhaamenyewo luukali khukhwoolisa uwaangaalile ilala ube busa nga iŋaano isi bakesa nga yahangaliile ilala buulayi.

²⁷Yobu, bibiindu bino ifwe khwabihentseleselekho luukali, khwaamanyile nga bili bya ŋali, Nashiryo manya uri bili biilayi, ubitsiilekho.