Read lumasaaba Yobu 6 Bible Online

Yobu 6 - lumasaaba bible

Yobu 6

¹Lwanyuma Yobu welamo Elifasi nga aloma ari:

²Abe shiba shishinyalikha khali liirima lyase balipimile, khali kumutaambo kwase bakupimile khu shipimo!

³Khulwekhuuba khali byookesanisile khuuba bisiro khuuminyisakho kumuyeekhe kwe mu nyaantsa, ni nashiryo biilomo byaase byeesi intsya khuloma bikhakhwiyaangisa ta.

⁴Umunyali uwa byoosi waambunile ise ni buyiingo, bwaantsingiile mwibili mukari; ni buutsiba bwabwo bwaasalaniile mwibili mwase. Wele waasiindikhiile ise bibiindu bibiriisa nga biloondekhana busa.

⁵Nga isikilya ili ni bunyaasi bwe khuulya, s'ibuutsa ta, naluundi nga ikhaafu ili ni bunyaasi bweesi ilya mu likhoŋolo, shimoloola ta.

⁶Naanu unyala khuulya shishiindu shishikhalimo kumuunyu kukushiŋaayisa ta? Namwe naanu unyala khuulya liiki liwaanga lilikhalimo kumuunyu ta?

⁷Ise kumwooyo kwase sikwikoomba khuutiila khu bilyo nga ibyo ta; ibyo bili busa nga biilyo byeesi kumwooyo kwabiyila.

⁸Ise nikoomba ndi khali Wele ambeele ise sheesi inoomba, nikoomba ndi khali ambeele ise sheesi kumwooyo kwase kukana.

⁹Ise nikoomba ndi khali aminianguule indurawo, khali ekhisile kumukhono kweewe antsira ifwa.

¹⁰Isho shaandimbolelesile ise naabi, khaba khali ise imbeele ni kumwikhoyo, abe ikhaba butsiina buli buukali naabi. Khulwekhubeela ise sinaminyaalilakho kamakaambila ka Wele ta.

¹¹Ne ise ndi n'amaani shiina nio neloosela khuuba umulamu? Shiina kila niloosela khuuba umulamu nga mbaawo sheesi niyikina khufuna ta?

¹²Ise ndi nga libaale, namwe ise ndi ni kumubili kwe shishuuma?

¹³Khulwekhuuba ise sishiilimo ni kamaani koositsana ta, naluundi mbaawo isi ise inyala natimila khuufuna buyeeti ta.

¹⁴Uyo ukhawaambila basheewe shiisa ta, aba s'ashiili mutweela khu baandu babesaaya Umukasya ta.

¹⁵Basaale baase bamoombesa ise busa, baaba nga tsintsitsi tsitsyooma mu muumu nga mbaawo ifula ta.

¹⁶Tsintsitsi tsino tsiba tsyetsuule kamararara, naluundi nga mulimo ni buunyifu buukali naabi.

¹⁷Mu mbuka iye kumuumu tsintsitsi tsino tsikoraanawo, tsyakama khukhwiikha tsyekela kamatila kamoomu busa.

¹⁸Kamatuuli ke tsiŋamila ni babaatsikeendisa bakoraana khukhwaama khu mikhoosi kyaabwe, bayiiyana busa khukhwoolisa ni bafwiila mu mubiimbi.

¹⁹Kamatuuli ke tsiŋamila khukhwaama i Tema katsya nga kaweentsa, ni kamatuuli kakaandi khukhwaama i Sheba katsya nga keyikina.

²⁰Sibanyoola isho abe sheesi beyikinile ta, ni nashiryo baarama nga baweelemo kamaani.

²¹Ari isi ise nanywe mwekelile busa nga tsintsitsi itsyo; khulwekhuuba bari mwaboone ise ndi mu mutaambo, mbaawo isaambo isi mulikho munjeetamo ta.

²²Manya ikhabawo uyo yeesi isi ise isabile indi ambe shiwaanwa? Namwe yeesi isi inomeele indi abukule khu buyiindifu bweewe, akulilile khukhuumbonisa ise?

²³Manya ikhabawo uyo isi ise inomeele ndi ambonese khukhwaama mu makhono k'omusiku? Namwe uyo isi ise inomeele indi ambonese khukhwaama khu bunyali bwooyo uwumiinikhilisa ise?

²⁴Mbaawo buubi ta! Nashiryo imboolele sheesi ise noonakile! Kane ise isile busa indekeerese.

²⁵Ilomo indayi s'itsiina umuundu yeesitsana ta! Ne iwe mbaawo shilayi sheesi ulikho uloma, namwe mbaawo sheesi ulikho uŋoonamo ta.

²⁶Iwe wambaasa uri unyala waaŋoona ise mu byeesi ise inoma? Namwe iwe wambaasa uri byeesi ise ndikho inoma sibilimo kumuŋaawo ta?

²⁷Inywe mubonekhana munyala mwakhupa ni khaakokha, khuukhalawo oba naanu niye utsya khuyila umufuubi abe umukulwa weewe. Naluundi munyala mwaakulisa n'umusaale weenywe umweene.

²⁸Ne ari inywe ni mundoleelele ise mu moni mwase; ni nase singane imbaboolele inywe shishiindu she bubeeyi nga ndi mu moni tsyeenywe ta.

²⁹Ise ndikho inoomba ndi inywe ni mwaakamise awo! Lekhela awo khukhuumbaatsilisa ise busa! Ise s'indikho ni kumusaango ta. Byeesi indikho inganikha bili bya ŋali.

³⁰Inywe mwambaasa muri ise inyala nakanikha bye bubeeyi? Ise s'inyala namanya oba iliwo kumutaambo namwe ta?