Read lumasaaba Yobu 7 Bible Online

Yobu 7 - lumasaaba bible

Yobu 7

¹Khu shibala khuno buli muundu bamuwaambila ni kamaani khuukhola buraambi ni kamaani. Bali busa nga umuundu isi bawandiikha khuraambira ukuundi khulwe kumukheemba.

²Bali busa nga baakulwa babekoomba bari khali beemikhilekho mu shisiisa, naluundi nga umuraambi w'omuundu n'aliindiilila kumukheemba kweewe.

³Ni nashiryo buli kumweesi kukuubira ise imenya busa awo nga mbaawo ni kumukaso ta, naluundi buli shiilo shishiitsa shindereera ise kumutaambo kwonyene.

⁴Buli lweesi ise intsya khukonela aasi, nireeba busa ndi busha liina? Ise inama nga ndi khushuukha busa mu bulili khukhwoolisa kumutishinyi.

⁵Kumubili kwase kwoosi kwabolile naluundi kwetsuule lifukhuulu. Niikhala kamayila karura khukhwaama mu makoontsyo kaase.

⁶Mu bulamu bwase buli shifukhu shiilukha mu khaangu busa, ni buulamu bwase bwakama nga mbaawo ni khuusuubila uri bunaba buulayikho ta.

⁷O Wele, iwe shebulila uri buulamu bwase buli busa kumuukha, mbaawo shishiindu shilayi sheesi ise isuubila khubonakho luundi ta.

⁸O Wele, iwe ubona uri ise ari ishiiliwo, ne s'ukheelemo umbonekho luundi ta. Iwe ukhaakelesewo umeentse, ne ise ikhaabe naatsiile.

⁹Umuundu ufwa waatsya imakoombe s'akobola ta; ali busa nga lifuumbi ni liweelela lyakoraanawo.

¹⁰Umuundu ufwa s'akobola luundi muungo mweewe ta, naluundi abe abo boosi babaamumanya bamwiibilila.

¹¹Ni nashiryo ise singane isile busa ta; kane ise inganikhe ni liirima liikali liliili mu mwooyo kwase; kane ise niŋuluŋuunye khulwe butsiina bubuuli mu mwooyo kwase.

¹²Shiina kila iwe undakho ise umuliindi khukhuuniinda imbuka yoosi? Ise ndi inyaantsa namwe indi kuuremu kuboofu kwe mumeetsi kila?

¹³Ise intsya khuukona aasi nga inoma ndi kane ifune lukoosi lwe khuuwolakho, nga namanyile ndi buulili bunawosawosa khukhwiŋuluŋuunya khwase.

¹⁴Ne iwe usiindikhila ise kimirooro kikindereera khukhwiyembeelela khuukali, iwe waasiindikhila ise bye khubonekhelwa ni kimirooro kikiriisa.

¹⁵Nashiryo waakila nekoomba ndi khali bangokile ifwa indurawo, khufuurisa buulamu bwase ni buba mu khutaambisibwa khuno.

¹⁶Ari ise naabiyiile buulamu bwase; senikoomba ni khukhwiloosela khuuba umulamu ta. Indekhe ise imbe, khulwekhuuba buulamu bwase buli busa nga kumuukha kukukoraanawo khaangu busa.

¹⁷Umuundu ali nisho shiina nio akile iwe wiile khumwiinaanakho, namwe nio iwe winaaneyo khu byeesi niye akhola?

¹⁸Iwe ulambuulakho babaandu buli kumutishinyi, naluundi iwe umukhakilisa buli imbuka yoosi.

¹⁹Khulwashiina undoleelela ise naabi waalekha khuloleelelakho ahaandi ta, namwe shiina kila ukhaandekha nase naamilakho kamare?

²⁰Iwe uwomisiile tsimoni khu baandu, ise ni noonaka isi iwe, imba naakhukholelekho shiina? Shiina kila ise nikyelile shisutwa shisiro mu buulamu bwoowo?

²¹Shiina kila iwe ukhaantsiyakhila ise bibyoonako byase, undusekho ise buubi bweesi ise nakhola. Khulwekhuuba ise ndi aambi ingana khuutsya mu ŋani, naluundi ukhaameentse ise, ne s'ukhanyoole ta.