Read lumasaaba Yobu 8 Bible Online

Yobu 8 - lumasaaba bible

Yobu 8

¹Lwanyuma lwa Yobu khuukanikha, umusaani isi balaanga bari Bilidadi, khukhwaama i Shuwa naye waaloma ari:

²Iwe unaloma bibiindu bino khukhwoolisa liina, ate nga tsilomo tsyeesi iwe uloma tsitamuukha busa nga ikhuungu iye kamaani?

³Iwe wambaasa uri Wele anyala wawaamba shishiindu she bwaŋali waashishuusaaŋanamo? Namwe niye anyala waashuusaaŋanamo isho shishiili shituufu?

⁴Babaana boowo bali ni khuuba nga baakhola bye bubwoonaki isi Wele, nga isho nisho shishakila niye waabawa nibo shitaambiso shishibaakhila.

⁵Ne siinga iwe wiyikina Wele, siinga iwe wiilayo wekoontselela Umunyali uwa byoosi,

⁶siinga ukholela bibiindu byoosi abulafu naluundi iwe waaba umukhosefu, Wele kane eetse akhuyeete iwe akhwiisilewo ibyo byoosi byeesi iwe wafiilwa, shibe nga shiwaanwa shoowo.

⁷Ikhaba nga iwe warakikhila afwiiti ari ne waakelawo waaba umuyiindifu, Wele akhaakhuwe iwe bibiindu biikali uyiindile khuuminyisakho amataayi.

⁸Iwe yambaasa khu biindu bibyakholikha khukhwaama khaalekho, ushebulile bye kamakhula byeesi bakuuka beefwe baafuumbula.

⁹Khulwekhuuba buulamu bweefwe buli bubuumbi buri, naluundi mbaawo sheesi ifwe khwamanya ta; buulamu bweefwe bukoraanawo khukhwaama khu shibala khaangu busa nga shishiniini.

¹⁰Iwe fukiilisa kamakhula khukhwaama isi bakuuka beefwe kabe niko kakaakhuleekela iwe; Rekeeresa byeesi bakuuka beefwe baaloma, nga baloma bari:

¹¹Kamakhalaamba kanyala kaatsowa mu shifwo shishikhalimo shireende ta? Namwe kanyala kaatsowa mu shifwo shikhalimo kameetsi ta?

¹²Nga kameetsi komeleele, niko kakaanyoowa khuuniaala, ikhaba nga kashiili khukhwoola khuraambisibwa mu shiindu shoosi ta.

¹³Abo boosi babaakhesaaya Wele ta, bahela busa nga kamakhalaamba ako; byeesi beyikina byoosi sibyaamamo khakhaandu khoosi ta.

¹⁴Khukhwiyikina khwaabwe khuli khukyeekhe naabi, khuli busa nga khawuutsi khe lububi.

¹⁵Umusilu eyikina buyiindifu bweewe nga ambaasa ari kane bumuyeete, ne sibumuyeeta ta. Ikhaba nga eyomiisilakho, ne sibumuyeeta ta.

¹⁶Bali busa nga biilimwa byeesi umweene uwe kumukuunda atsukhiilila ni kameetsi nga inyaanga ishiili khurura ta; waakila byasaalana byamalaatana kumukuunda kwoosi.

¹⁷Kimili kyeewe kitsowa kyamalatana buli aandu oosi, kyatsya kyewaamba khu lwaanda kyeyomiisila ilala.

¹⁸Ne lwanyuma nga baakhuulile shiilimwa shino khukhwaama mu mukuunda, mbaawo na mutweela ukhaamanyekho ari shabatsakawo ta.

¹⁹Ukwo nikwo kumwiikhoyo kwonyene kweesi baboonaki bali ni nakwo; naluundi ibawo babaandi babeetsa beela mu shifwo shaabwe.

²⁰Ne shimanye uri Wele s'anyala waantsukha abo babaamwiyikina niye ta, namwe s'anyala waayeeta abo babaali baboonaki taawe.

²¹Umukasya akhaakhunyalise iwe khukhwiilamo khuuba umusangaafu luundi, naluundi umenye buulamu bwe kumwiikhoyo.

²²Niye akhaakile kamaŋaanyu kawaambe abo babaakhakhukana iwe ta, ni tsiingo tsye baboonaki tsikhaakoraanewo.