Read lumasaaba Yobu 9 Bible Online

Yobu 9 - lumasaaba bible

Yobu 9

¹Kila lwanyuma Yobu elamo. Waaloma ari:

²Ilala, ise naamanyile ndi shili shiryo: Indi umuundu s'anyala waafuura kumusaango isi Wele ta!

³Abe akhabawo uyo uwikhupa khu Wele ari bawotse kumusaango, Wele anyala waamureeba bireebo shiikana shitweela (1,000) yaataambayo n'umuundu unyala khuubiilamo.

⁴Wele ali ni kamakhula kamakali mu mwooyo, naluundi ali ni kamaani kamakali; Naanu unyala waamwiilekhaasakho naluundi waarama nga ashiili umulamu?

⁵Niye asyeenda tsingiingi nga sitsyaashimanyilekho na khumanya ta; Naluundi atsishuusa waatsifumalikha khulwe liirima lyeewe.

⁶Wele aasiindikha musisi waatengaasa shiibala shaanikina, naluundi asisiikha kimisiindi kye shiibala.

⁷Niye alakila inyaanga yaalekha khurura ta, waabiimba ni khu nienieesi tsyaalekha khumulikha ta.

⁸Niye khu bweewe yenyene busa aabaamba likulu nga mbaawo umuyeetakho ta, naluundi waakhaandakilila kuusolo kuuboofu kwe mu meetsi.

⁹Wele niye uwabuumba kukhululuumbi kwe tsinieniesi kukuuli angaaki we likulu, ni kukhululuumbi kukuuli akari we likulu.

¹⁰Aakhola bibiindu bye kamaani bibikhanyala byaamanyikhana ta, ni bye kamakaanga bibikhabalikha taawe.

¹¹Wele abirira aambi isi ise ndi, ne ise sinyala naamubona ta; ambirirakho busa ne ise siinyala nashimanya na khushimanya ta.

¹²Wele ayutula buli shoosi sheesi akana, naanu unyala waamwakamisa? Naanu unyala waamureeba ari, “Ulikho ukhola shiina?”

¹³Niye nga wakhalaale, liirima lyeewe siliwawo ta; Niye uwakhaandakilila bayeeti be kuusolo Rahabu.

¹⁴Ise inyala ndyeena naamwiilamo nga niye waalomile, namwe naamisa waheena tsilomo tsye khuukhaandisana ni naye?

¹⁵Ikhaba nga ise naamanyile ndi siindi ni kumusaango kwoosi ta, ne ise s'inyala naamwiilamo nga niye waakanikhile taawe; ne akhali indi ise nikoontselela Wele, umukayi wase, indi amaambile shiisa.

¹⁶Abe ikhaba bari ise naamulaangile mu musaango ne weetsa, ise sinambaasa ndi anyala waarekeeresa byeesi ise inooma ta.

¹⁷Khulwekhuuba niye aasiindikha ikhuungu khukhuufuntsakila ise, khukhwoolisa ise naanubukha, akhali ilomo yoosi ta.

¹⁸S'andekha nase naafunakho imbuka iye khuuheela ta, akhali indi niye waayitsusa buulamu bwase ni kumutaambo.

¹⁹N'iiba bari khuli khuusiindana khwe khukhwookesanisa kamaani, niye ali uwe kamaani naabi. N'iiba bari kuli kumusaango kwe khuumuyila isi baakayi, naanu unyala waamuwaamba waamureerayo?

²⁰Abe ise naakhaba nga s'iindikho ni kumusaango ta, ne tsilomo tsyeesi ise inoma sitsili tsindayi ta; abe ise naakhaba nga s'iindikho buubi bwoosi ta, ne niye kane akhalile ise kumusaango.

²¹Ise s'indikho kumusaango ta; ise samweene naamanya buulamu bwase; ise noola ni khuubiyila buulamu bwase.

²²Ni nashiryo ise inoma ndi bibiindu byoosi bili busa shitweela; khulwekhuuba Wele onakisa abo babaakhalikho ni kimisaango ta, atweela ni naabo babaali baboonaki.

²³Nga umuundu ukhalikho ni kumusaango ta waakhalikhile busa waafwiile, Wele amutsekhelela.

²⁴Wele wawaanayo shiibala mu makhono ke baboonaki, naluundi waabiimbilila tsimoni tsye babaakhala kimisaango. Ne abe akhali niye, naanu ukuundi uwashikhola?

²⁵Biifukhu bye buulamu bwase biilukha busa nga uwe kamasindano; biilukha busa nga ise s'imbonamo ikhaba kumwikhoyo ta.

²⁶Buulamu bwase buwetsekhelela busa nga likhoŋolo liliyubakilisa khu meetsi, buyuutukha busa nga waasu n'ayutula khaasolo khukhwaama aasi.

²⁷Abe ise naakhaloma ndi, “Kane nibilile khukhwilootsa khwase, Indekhe kumutaambo kwase, nambaase khu biindu biilayi byoonyene.”

²⁸Ise inama nga ndi mu khutaambisibwa khwase; khulwekhuuba ise naamanyile ndi iwe ushindolelela ise nga umuundu uuli ni kumusaango.

²⁹Ise naamanyile ndi kumusaango kukhaafuure, ni nashiryo khulwashiina ikhalaabana naamala busa kamaani kaase?

³⁰Abe ise nakhesiinga ni kameetsi kamamiliwu karyeena, naluundi abe nakhasaaba kamakhono kaase ni sabuuni ufuurisayo buulayi,

³¹ne shitweela busa kane Wele amwaate ise mu lilowo, ni bikwaaro byase bibyeene biindurekho.

³²Ise s'inyala namwiilamo niye ta, khulwekhuuba niye s'aali umuundu busa nga ise n'iindi, nio uri manya khutsye khwiimikhe mu moni tsye baakayi fweembi ta.

³³Akari aase ni naye mbaawo umuundu uliwo khuukhalawo ta; unyala waakhalawo akari aase ni Wele ta.

³⁴Khali Wele andusilekho ise shiitaambiso sheesi indimo, nio akile ise indekhe khuuba ni khuurya khuukali taawe.

³⁵Awo nio nase inyalise khuukanikha akhali khuumurya niye ta, khulwekhuuba ise nayimanya samweene ndi s'indimo buuri ta.