Read lumasaaba Tsizabuli 10 Bible Online

Tsizabuli 10 - lumasaaba bible

Tsizabuli 10

¹O Umukasya, lwashiina wiimikha aleeyi? Lwashiina wiibisa nga ifwe khuli mu mbuka iye bikosi?

²Babaandu baabi beyiinga bakubyeenga bataambi; khali baaba babeene bawaambibwiile mu mireko kyaabwe kyeesi baba baarekile.

³Baboonaki bebuyila lwe khukhwiwuuma khwaabwe khuubi, n'umuundu we kumuluungo atyaaba luundi wekaana Umukasya.

⁴Babaandu baboonaki mu khwiyiinga khwaawe sibenaanayo khuuweentsa Wele ta; nibo mu byambaaso byaabwe baloma busa bari, “Wele s'aliwo ta.”

⁵Baboonaki mu buli byeesi bakhola bibatsiila buulayi. Ne isaambo isi Wele akhalamo kimisaango, nibo sibakimanya ta. Nibo balekelesa baasiku baabwe boosi.

⁶Mu myoyo kyaabwe bambaasa bari “Mbaawo shishinyala shaabakhaasa ta,” naluundi bari “Mbaawo bukosi bwoosi biilo ni biilo ta.”

⁷Mu bilomo byeesi bakanikha byetsuulemo khuutsuba, ni buwombesi, ni khuumiinikhilisa; baanguyilisa naabi khuukanikha bilomo bibiikhalasa ni bye tsimbomelo.

⁸Nibo beebisa, beereka mu byaalo, nga baliindilila khukhwiira babaandu babaakhalikho ni kumusaango ta. Bekhala bebuula babone abo babaakhenyala ta,

⁹beebisa beereka busa nga italanyi niyibisa mwifuluma. Beebisa banyale khufwakhila bataambi, babayile nga babaakhweeselesa mu mireko kyaabwe.

¹⁰Basaambakilila aasi abo babaakhali ni kamaani ta, baraambisa kamaani kaabwe khuurekula batoro babaakhupa aasi.

¹¹Baboonaki bambaasa mu myoyo kyaabwe bari, “Wele waayibilila! Webiimbiliile mu moni, s'atsya khukhubona ta!”

¹²O Umukasya, yinyukha! O Wele yinyusa kumukhono kwoowo, uyeete abo babaakholaka shiisa.

¹³Lwashiina baboonaki balekelesa Wele? Mu myoyo kyaabwe baloma bari, “Wele s'akhuwa ifwe shitaambiso ta.”

¹⁴Ne iwe Wele ubona, waalolelela kumutaambo kuno ni khuutaambisibwa khuno. Iwe busheele uli mwirekefu khuuyeeta. Umuundu ukhenyala ta ewaanayo mu makhono koowo, lwekhuuba iwe busheele uli umuyeeti we baafuubi.

¹⁵Funiaaka kamaani ke babaandu baboonaki ni baabi; n'ubawe shitaambiso lwe buubi bwaabwe bweesi bakholele khukhwoolesa ni kane baweelewo ilala.

¹⁶Umukasya niye Umuyiinga biilo ni biilo; kamanaambo kakaakhamwisaaya ta kaliihela, kakoraane karurewo mu shibala sheewe.

¹⁷O Umukasya, iwe uwulila babaandu boowo be aasi byeesi baloomba, kane winaaneyo isi bali ubeesemo kamaani.

¹⁸Iwe uwulila khuulila khwaabo babaamiinilisibwa ni khwaabo babaali baafuubi; iwe kane ukhalewo nga umanya uri nibo sibali ni kumusaango ta, nio babaandu buundu be mu shibala balekhe khubariisariisa ta.