Read lumasaaba Tsizabuli 102 Bible Online

Tsizabuli 102 - lumasaaba bible

Tsizabuli 102

¹Wuliilisa khuuloomba khwase, O Umukasya, uwulile khuulila khwase lwe buyeeti.

²Niimba nga ndi mutaambo, ukhaantsibisakho ta, mbuliilise khuuloomba khwase, ungobolemo khaangu nga naakhwilootseele.

³Bulamu buwawo khaangu nga lisuusi, ni kamakuumba kaase koshelela nga kumulilo.

⁴Kumwoyo kwase kwaakhupibwile busa, kwoomile nga bunyaasi, ni kumwoyo kwe khuulya biilyo kwaamaliyile.

⁵Khukhwilootsa khwase khuukali sikhwakama ta, ari naayomelela busa, naarama kamakuumba ni lihaafu busa.

⁶Ise ndi senyene busa nga ikhosi iye mu mubiimbi, ndi busa nga kutsikhiikhi kukuuli kwonyene mu makubili.

⁷Ise ngona meeso, ari nayikyela busa nga khanywiinywi khakhekhala khu shisuli she ntsu khonyene.

⁸Baasiku baase bantsonela busa paka antsye khukhwilabula, naluundi abo babandyaabila baraambisa lisiina lyase mu khutsuba.

⁹Ari ise indya likokhe busa nga uulya biilyo, ni kamasika kaase kaatubaanile ni she khuunywa shase,

¹⁰lwe buurafu bwoowo buukali. Iwe waayinduuma ise, waayintsisa andulo.

¹¹Buulamu bwase butsya buweelela busa nga shishiniini she angoloobe, naluundi iniaala busa nga bunyaasi.

¹²Ne iwe, O Umukasya, uli Umuyiinga uwe biifukhu byoosi, naluundi kane umanyikhanatsake naabi mu miboolo kyoosi.

¹³Iwe ulinyukha aasi uwaambile Sayuuni shiisa, lwekhuuba imbuka inyene yoolele iye bubweela bwoowo; imbuka yino niyo inyene.

¹⁴Lwekhuuba ifwe babaakaanisi boowo khukana buli libaale liliili mu shiriimba, ni kumutaambo kukhuwaamba lwe khukhwoonakisibwa khwasho.

¹⁵Kamanaambo koosi kaliiba ni khuurya lisiina ly'Omukasya, ni bayiinga boosi be shibala baliiba ni khuurya shiriifwa sheewe.

¹⁶Iwe Umukasya, wamweene ulyombekha shiriimba Sayuuni. Shiriifwa shoowo shilibonekhana.

¹⁷Niye alikobolamo khuuloomba khwe babaandu beewe babaakhalikho ni buyeeti ta, aliwuliilisa khukhwilootsa khwaabwe.

¹⁸Khayo bino byeesi Umukasya akholele bironebwe lwe kimiboolo kikiitsa mu moni, nio nabo banyale khuuruuya Umukasya.

¹⁹Umukasya alolelela aasi khu shibala, nga emikha mu shifwo sheewe shikhosefu she mu ngaaki.

²⁰Arekeeresa khukhwilootsa khwe baabowe, aryo waakaangulula boosi babaaba batsya khuhela.

²¹Liryo lisiina lyeewe likanikhibwekho mu Sayuuni, ni mu Yerusalemu ibewo khuumuruuya,

²²nga babaandu khukhwaama mu buli linaambo, na buli buyiinga beetsile atweela khuumwisaaya.

²³Umukasya waantsikyelisa ise khuuba mutoro, yakhaba nga ishiili mwaana, waboombeselekho biifukhu bye buulamu bwase.

²⁴O Wele wase, ukhaandusawo ise ari, nga ishiili khusaakhuliwa ta. Iwe ubawo biilo ni biilo.

²⁵Khukhwaama makiboole, iwe niye uwarawo kumusiinji kwe shibala, wabuumba likulu ni kamakhono koowo.

²⁶Nibyo biliwawo, ne iwe uliramawo. Nibyo bilikora byonuukhake nga shikwaaro. Iwe ulibishuusakho nga shikwaaro, ubituume.

²⁷Ne iwe urama nga uli shitweela busa busheele, ni kimiiko kyoowo sikilyakama ta.

²⁸Babaana be babaakaanisi boowo balimenya mu lukoosi babe balayi, ni babetsukhulu baabwe balimenya mu buliindi bwoowo.