Read lumasaaba Tsizabuli 103 Bible Online

Tsizabuli 103 - lumasaaba bible

Tsizabuli 103

¹Ruuya Umukasya, iwe mwoyo kwase, ni neebyo byoosi bibiili musiise biruuye lisiina lyeewe likhosefu.

²Ruuya Umukasya, iwe mwoyo kwase! Ukhebilila uri niye ali uwe shiisa ta.

³Umukasya eyakhila bibyoonako byase byoosi, naluundi ambonesa ise tsindwaale tsase tsoosi.

⁴Ambonesa ise buulamu bwase khukhwaama mu khufwa, naluundi angwaarisa ise tsikhabi nga ikuutwa lwe khuukana khweewe khuukali ni shiisa sheewe.

⁵Niye antsitsusa ise buulamu bwase ni bibiindu biilayi, nio nase neloosela ni khuuba ni kamaani ke busooleli, ni khuuba ni kamaani nga ka waasu.

⁶Umukasya niye ukhala kumusaango, ni naabo babaamiinilisibwa bakufuura, naluundi waabawa ibyo bibibaakhila.

⁷Niye okesanisa Musa tsintsila tseewe, naluundi wokesanisa babaana ba Isiraeli buraambi bweewe.

⁸Umukasya ali uwe shiisa ni khuukana khuukali, niye s'akhalalaka khaangu ta, naluundi waayitsula khuukana khukhuukhawawo ta.

⁹Niye s'ekiitsa waalobelakho ta, naluundi niye s'abiikha lirima khu mwoyo kweewe imbuka yoosi ta.

¹⁰Niye s'akhuwa ifwe shitaambiso nga ni shikhwaakhila ta, namwe s'akhuliyila nga bibyoonako byeefwe ni bili ta.

¹¹Nga likulu ni lili angaaki khufuura shibala, ni khuukana khweewe khuryo khuli khuukali isi abo babaamurya niye.

¹²Nga ibwaamanyaanga n'ili aleeyi ni bukwanyaanga, naye aryo akhurusakho bibyoonako byeefwe byaakhubeela aleeyi naabi ni nafwe.

¹³Nga paapa we babaana n'ali uwe shiisa isi babaana beewe, n'Umukasya aryo naye ali ni shiisa isi abo babaamurya niye.

¹⁴Niye waamanya isaambo isi ifwe khwabuumbibwamo, ashebulila ari ifwe khuli lifukhuulu busa.

¹⁵Isi ifwe babaandu, imbuka yeefwe ili busa nga bunyaasi, khutsowa, khwaamulisa nga n'ubona shimuli she mwirome.

¹⁶Ne imbewo imbile ni shiwuutsakho, shiwawo, mbaawo umuundu ushibonakho luundi ta.

¹⁷Ne isi abo babeesamo Umukasya shiriifwa, khuukana khweewe khuukali khumenyawo biilo ni biilo, ni buulayi bweewe abwokesanisa kimiboolo ni kimiboolo,

¹⁸kyaabo babaaliinda indakaano yeewe, abo babaali babeyikinwa khuukhola byeesi niye akana.

¹⁹Umukasya waahangasa shitsoloŋo sheewe mwikulu, niye ali Umuyiinga we bibuumbe byoosi.

²⁰Ni muruuye Umukasya, inywe bamalayika beewe be kamaani, inywe babaaloondelela biilakilo byeewe, luundi babaawuliilisa byeesi aloma.

²¹Nimuruuye Umukasya, inywe mweesi babaali mwiihe lyeewe, inywe babaakaanisi beewe babaakhola byeesi akana.

²²Nimuruuye Umukasya, inywe mweesi bibuumbe byeewe, mu buli bifwo byoosi mweesi awula. Ruuya Umukasya, iwe kumwoyo kwase.