Read lumasaaba Tsizabuli 104 Bible Online

Tsizabuli 104 - lumasaaba bible

Tsizabuli 104

¹Ruuya Umukasya, iwe kumwoyo kwase. O Umukasya Wele wase, nga uli umukhulu naabi, iwe waakwaara shiriifwa ni bukhulu.

²Iwe waayibiimba buwaanga nga uwebiimba shikwaaro, wabaambalisa likulu lyafwaana nga iweema,

³naluundi waayombekha tsiingo tsoowo khu ngaaki khwe nyaantsa imboofu. Uraambisa namufweeli khuuba busa nga shikaali shoowo, naluundi upaamburukhila khu ndaha tse mbewo.

⁴Uraambisa imbewo busa nga baarume boowo, ni khuutindiima khwe kumulilo nga babaakaanisi boowo.

⁵Iwe waayombekha shibala khu musiingi kumuhangafu, shiryo sishiliyeŋaanakho na khakyeekhe khoosi ta.

⁶Iwe wabiimba inyaantsa khu shibala yafwaana busa nga shikwaaro, ni kameetsi kamakali kaniina kabira tsinjiinji.

⁷Ne iwe ni wakhookha, kameetsi kaatitukha, kaatitukhila ilala nikaawulila shilakilo shoowo.

⁸Kaasalasala keekha khu njiinji, ni khuubirira mu matila, kaatsya khukhwoola mu shifwo mweesi wakaŋoonaŋoonela.

⁹Wakareerawo lulwaakha lweesi kakhanyala khuutuuma ta, nio kalekhe khunyalisa khuukhalisa khukhwiitsa khuusalasala khu shibala ta.

¹⁰Iwe ukhola tsintsitsi tse kameetsi khukhwiikhila mu matila, khukhwikhila akari e tsingoongo,

¹¹nio kaaba she khuunywa isi tsisolo tse mwirome, nibweene iyo tsisikilya tsiwona buulesa.

¹²Binywiinywi byoombekha biiswi byabyo mu misaala kikiili aambi ni kameetsi keene, biryo byeembela musakya tsakyo.

¹³Khukhwaama muungo mwoowo mumuuli angaaki iyo, iwe ukwiisa ifula khu njiinji, ni shibala shoosi shetsusibwa ni tsikhabi tse kamakhono koowo.

¹⁴Iwe ukila shibala shaatsowesa bunyaasi lwe tsikhaafu, ni bimiitswa lw'omuundu khuubilima, nio anyale khuufuna biilyo khukhwaama mwiloba,

¹⁵ni khuufunamwo iviini lwe khuumwikhoyesa, ni kamafura ke khukhwiyakha lwe khuumumiliisa, ni kumukaati lwe khuumuwa kamaani.

¹⁶Kimisaala ky'Omukasya kifuna kameetsi mu bukali, nikyo kimisaala kya Lebanooni kyeesi aabyaala.

¹⁷Mu misaala ikyo, binywiinywi byoombekhamwo biiswi byabyo, nakaaka ombekha biiswi byeewe mu misaala kimiberoosi.

¹⁸Tsimbusi tse mwirome tsimenya khu njiinji tsindeeyi naabi, ni buusolo bukyeekhe bwibisa akari mu mabaale.

¹⁹Iwe warawo kumweesi khuukhumanyisa biilo, ni nyaanga yaamanya imbuka yayo iye khuukwa.

²⁰Iwe warawo shiilo, ni mushiilima isho nimwo mweesi tsisolo tse mwirome tsirurira ibulafu.

²¹Tsitalanyi tsinyana tsibuutsa nga tsiyiima she khuulya, nga tsiweentsa biilyo byeesi Wele anyala waatsifunila.

²²Ne nga inyaanga irura, tsiilayo khuukona mu mafuluma kaatso.

²³Ulwo nio babaandu baatsya khuraamba kimilimo kyaabwe shifukhu shoosi khukhwoolesa angoloobe.

²⁴O Umukasya, nga buraambi bwoowo bukali naabi! Mu makyesi koowo, iwe wabuumba bibiindu byoosi. Shibala shoosi shaayitsulamo bibuumbe byoowo.

²⁵Iliwo inyaantsa, ili imboofu luundi imbalaayi luukali. Yaayitsulamo bibuumbe bibikhabalikha ta, bibiili biboofu ni bikyeekhe atweela.

²⁶Khu bweene ukhwo, khulikho tsimeeri tsitsikyeendelakho, ni Leviyatani[4], kuusolo kweesi wabuumba mweesi kwinyayila.

²⁷Bino byoosi bikhuliindilila iwe khuubiwa biilyo khu mbuka iyaakhila.

²⁸Nga waabiweele biilyo, bibibuusa byaabilya, nga waabalaayisile kamakhono koowo, ubiwa byaalya byekura buulayi.

²⁹Iwe n'ubilekha waabirurayo, biyembelela; iwe n'ubirusamo kumuukha kwabyo, bifwa byelayo mwiloba mweesi byaama.

³⁰Iwe n'ubirumanila Umwoyo woowo, bibuumbibwa; waabiwa buulamu bushaakha khu shibala.

³¹O Umukasya, khuloomba khuri shiriifwa shoowo shibewo biilo ni biilo, lekha Umukasya ekhoye lweebyo byeesi akholile.

³²Niye nga waaloleleele shibala, shinikina busa. Nga waatiilile khu njiinji, tsituukha lisuusi.

³³Ise kane niimbatsakile Umukasya kimyeenya nga ishiili umulamu, kane niimbatsakile Wele wase nga ishiiliwo.

³⁴Niye khali ekhoyeele khukhwaambaasa khwase, lwekhuuba khukhwikhoya khwase khwaama isi ali.

³⁵Khali baboonaki baheleele ilala khurura khu shibala, khayo baabi balekhe khubonekhakho luundi ta. Ruuya Umukasya, O iwe mwoyo kwase! N'uruuye Umukasya!