Read lumasaaba Tsizabuli 105 Bible Online

Tsizabuli 105 - lumasaaba bible

Tsizabuli 105

¹Nimusiime Umukasya, muloombe mu lisiina lyeewe! Ni muboolele kamanaambo koosi byeesi akholile.

²Nimwiimbe kimyeenya khuumuruuya niye; mukanikhe khu biindu bye kamakaanga byeesi akholile.

³Nimwikhoye mumwisaaye lisiina lyeewe, lekha abo boosi babaamuweentsa niye bekhoye.

⁴Nimutsye isi Umukasya lwe buyeeti, mumwisaayatsake busheele.

⁵Ni mushebulile buraambi bweewe bwe kamakaanga, ni bye khukhwiyaangisa byeesi akholile, atweela ni bukayi bweewe buulayi.

⁶O inywe babetsukhulu ba Iburayimu, umwakaanisi weewe, inywe babaana ba Yakobo umurobole weewe.

⁷Umukasya niye Wele weefwe, bukayi bweewe bumalatana khu shibala shoosi.

⁸Niye aliinda indakaano yeewe biilo ni biilo, ni bisuubiso byeewe mu miboolo shikana shitweela.

⁹Niye indakaano iyo aakikhola ni Iburayimu khukiliindatsaka, ni shilayilo sheesi aakhola ni Isaaka.

¹⁰Indakaano iyo, Umukasya aakikumisa isi Yakobo khuuba nga shilakilo, isi Isiraeli khuuba indakaano iye biilo ni biilo:

¹¹isi aalomela ari, “Indikhuwa iwe shibala sha Kanani khuuba shiifwo she buusikha bwoowo.”

¹²Khu mbuka isi baabeela nga bali bakyeekhe bari, baaba bakyeendaani busa luundi bakyeni mu shibala sheene isho.

¹³Baaba bakyeendaanaka busa khukhwaama mu linaambo litweela khukhwoola mu liindi, khukhwaama mu buyiinga butweela khukhwoola mu buundi.

¹⁴Wele s'afukiililakho ni linaambo na litweela khuubabirisaka buubi ta, aryo aabaliinda buulayi, ni khulwaabwe, waarafuyila bayiinga,

¹⁵nga abalomela ari, “Mukhatiilakho khu baandu baase barobole ta, mukhakholakho buubi khu baŋoosi baase ta!”

¹⁶Wele n'alekhuula intsala khukhwiitsa khu shibala, biilyo byaweelawo ilala khu shibala,

¹⁷aaba waarumana umuundu mutweela khu nibo, nga niye Yusufu isi baakulisa nga umukulwa.

¹⁸Bikyele byeewe byatsiinisibwa lwe khuubowebwa kiminyololo, ni mumilo mweewe lwe khuubowebwamo shikyuuma.

¹⁹Yusufu aarama nga ali umukulwa khukhwoolesa sheesi aloma ni shoolelela, ni khukhwoolesa ilomo y'Omukasya ni yamala khuumuŋaŋasa nga niye uwelala.

²⁰Umuyiinga we Misiri waamukaangulula, umuwuli we babaandu waamulekhuula.

²¹Aryo waamukalusa niye khuuba ukhulila bye muungo mweewe byoosi, naluundi waamukhola khuuba umukhulu we shibala shoosi.

²²Yusufu aaba ni bunyala khuulakila baakhulu babaandi b'omuyiinga boosi nga n'akana, naluundi waaleekela baawi be kamakyesi, isaambo iye khuraambisa kamakhula.

²³Lwanyuma Isiraeli waatsya wenjila mu Misiri, Yakobo waatsya waamenya nga umukyeni busa mu shibala sha Hamu.

²⁴Umukasya waayeeta babaandu beewe baasaalana naabi, waabakhola baaba be kamaani naabi khuufuura ni baasiku baabwe.

²⁵Waakalusa babaandu be Misiri khuubiiyila babaandu beewe, baryo baabirisaka buubi babaakaanisi b'Omukasya.

²⁶Lwanyuma Wele waarumana Musa umwakaanisi weewe, ni Aroni isi aarobola.

²⁷Baakhola buraambi bubwiyaangisa naabi, bokyesanisa bye kamakaanga biikali mu shibala sha Hamu.

²⁸Wele waasiindikha shishiilima khu shibala she Misiri, ne nibo baaminyaalila shilakilo sheewe.

²⁹Wele wekyelisa tsintsitsi tsaabwe tse kameetsi khuuba nga kamafuki, shaakila tsinyeeni tsamwo tsoosi tsaahela.

³⁰Shibala shaabwe shoosi shetsulamo tsikhele, tsitsatsya tsoola ni mu biseenge bye baawuli baabwe.

³¹Wele waalakila, ni tsisame tsa buli saambo yoosi tseetsa, ni tsiinda, byeetsula mu shibala shoosi.

³²Wele waabakaanisa kamararara ni khuumulikha khuukali mu shifwo she fula khu shibala shaabwe shoosi.

³³Aryo waahesa kimikuunda kyaabwe kye kimisabibu ni kimitiini kyoosi, naluundi waafuniaakaka kimisaala kikiindi kyoosi.

³⁴Ndi nga Wele waalakiile luundi, tsisikye tseetsa abe tsitsikhabalikha bukali ta;

³⁵tsaalya buli shiindu shoosi shishitsowa khu shibala, tsaalya ni bilime byaabwe byeene byoosi.

³⁶Lwanyuma weeraka babaana besiinde baakiboole boosi mu shibala she Misiri.

³⁷Aryo lwanyuma Wele waarusa ba Isiraeli khukhwaama mu Misiri, nga bekokomeele ifeeza ni zaabu, ni mu baandu baabwe boosi, mbaawo namutweela uwaramakho inyuma ta.

³⁸Ba Misiri baaba baariire naabi, nashiryo bekhoya naabi nga ba Isiraeli baatsiile.

³⁹Wele aabiimba khu baandu beewe namufweeli, aryo waabaraangirira ni kumulilo khuubamulikhila shiilo.

⁴⁰Ni baaloomba bye khuulya, aabasiindikhila binywiinywi tsisiindo, waabawa ni biilyo khukhwaama mwikulu waabekusila ilala.

⁴¹Aryo waabakubulila lulwaanda lwaamamwo kameetsi keekha mu bifwo bye mu mubiimbi nga luluutsi.

⁴²Wele aashebulila shisuubiso sheewe shikhosefu sheesi aakhola ni Iburayimu umwakaanisi weewe.

⁴³Umukasya aarusa babaandu beewe khukhwaama mu Misiri nga bali ni kumwikhoyo kumukali, baarobole beewe bano beemba kimyeenya lwe sangaalo ngali.

⁴⁴Aryo waabawa shibala she babaandu babaandi, baryo nibo bekyela babeene mikuunda kyeesi bakhaaraambilila ta.

⁴⁵Shino aashikhola ari nio babaandu beewe banyale khukhwiliinda kamakaambila keewe, ni khuuloondelela bilakilo byeewe. Nimuruuye Umukasya!