Read lumasaaba Tsizabuli 106 Bible Online

Tsizabuli 106 - lumasaaba bible

Tsizabuli 106

¹Ni muruuye Umukasya! Ni mumusiime Umukasya, lwekhuuba ali umulayi; khuukana khweewe khuli khwe biilo ni biilo.

²Naanu unyala khuuruumbula buraambi bw'Omukasya bwe kamaani bweesi akhola? Namwe naanu unyala khuumuruuya nga ni shimwaakhila?

³Bali ni tsikhabi abo babaakhola bye bwaŋali, abo babaakhola bye bukwalaafu buli busheele.

⁴N'ushebulile ise, O Umukasya, iwe n'uba nga wokyesanisa shiisa shoowo isi babaandu boowo, ise imbe mutweela khuubo beesi uwonesa.

⁵Nase imbe mutweela uwikhoyela mu khutsowatsowana khwe baarobole boowo; nase ingabanane khu mwikhoyo kwe linaambo lyoowo, indyo indubaanile atweela mu khukhuruuya iwe atweela ni naabo babaali baboowo.

⁶Ifwe khwayoneka atweela ni bakuuka beefwe, khwakhola bibikhali bye bukwalaafu ta luundi biibi naabi.

⁷Bakuuka beefwe ni baaba nga bali i Misiri, sibenaanayo khu bye kamakaanga byeesi wakhola ta, sibaashebulilakho bye khuukana khuukali khweesi wabokyesanisa ta. Baakhuminyaalila iwe, Umunyali wa byoosi, nga bali khu nyaantsa imanyikhaane nga Imbesemu.

⁸Ne iwe wabawonesa lwe buulayi bwe lisiina lyoowo, lwe khukhwokyesanisa bunyala bwoowo bukali.

⁹Walakila inyaantsa Imbesemu yoomelela, lwanyuma waaraangirira babaandu boowo baabiramo busa nga babaabirira khu lwoomu lwe mu mubiimbi.

¹⁰Wabawonesa khukhwaama mu mukhono kw'omusiku, waabawonesa khukhwaama mu bunyala bwabwo babaababiyila.

¹¹Ni kameetsi kaamila baasiku beene boosi, mbaawo na mutweela khu nibo uwaramawo ta.

¹²Ni abweene awo, babaandu baafukiilila byeesi wabalomela, baarakikha khukhweemba kimyeenya lwe khuukhuruuya iwe.

¹³Ne mu mbuka ifwiiti iri, baaba beebiliile byeesi wabakholela, bekaana khuuloondelela bye kamakyesi koowo.

¹⁴Baaba ni kumuluungo kwe khuulya kumukali mu mubiimbi, ibweene iyo bakhukhakilisa iwe Wele.

¹⁵Iwe wabawa buli shiindu shoosi sheesi baaloomba, ne lwanyuma wabasiindikhila buulwaale buubi naabi mu nibo.

¹⁶Iyo mu mubiimbi, babaandu bawaambila Musa libuba atweela ni Aroni, abo babaaba baarobole b'Omukasya.

¹⁷Shibala shaasama shaamila Dasani, shasiikha Abiramu ni be mu ntsu yeewe boosi.

¹⁸Kumulilo kweekha khu baloondeleli baabwe boosi, kwoosha abo boosi babaaba baboonaki.

¹⁹Nga bali i Horebu, bekholela imoosi, besaaya shifwaani shishaama mu shiibya.

²⁰Baayuusaŋana shiriifwa sha Wele, baashiwa shifwaani she khaafu iilya bunyaasi.

²¹Nibo beebilila Wele uwabawonesa, uwakhola bye kamakaanga biikali mu Misiri,

²²ni bibiyaangisa biikali mu shibala sha Hamu, ni bibiyaangisa bibiindi khu nyaantsa Imbesemu.

²³Wele waaloma ari atsya khubahesa, ne Musa Umwakaanisi weewe umurobole wemikha akari khuumukhaandisa, wekoontselela ari Wele alekhe khubahesa ta.

²⁴Lwanyuma baalekelesa shibala shilayi isho, nga sibafukiilila sheesi Wele abalomela ta.

²⁵Baarama mu bisari byaabwe nga beŋuluŋuunya, baalekha khuwuliilisa Umukasya ta.

²⁶Shishakila abetsubila nga abalomela ari abe anyala khuubahesela boosi mu mubiimbi,

²⁷ni khuusalanisa babetsukhulu baabwe boosi akari mu manaambo, khuubasalanisila mu bibala bye aleeyi.

²⁸Babaandu beewe betubaasa mu khwisaaya Bayaali i Peyoli, baalya ni tsisaayilo tsitsawongebwayo isi baafu.

²⁹Baakhola bibiindu biibi biryo byaakila Umukasya waakhalala, aryo waabasiindikhila buulwaale bwaabakwamo.

³⁰Ne Fenekasi[5] weemikhawo akari, waareerawo she khukhwiyakhila, ni buulwaale bwaakama.

³¹Shino shikila niye baamushebulila lwe bukwalaafu, ate kane shibatsake shiryo ni mu miboolo kikiitsa mu moni.

³²Babaandu baakhalasa naabi Umukasya khu luutsi lwe kameetsi i Meriba, ni kumutaambo kwawaamba Musa khulwaabwe.

³³Isho shaakila Musa naye waakhalala naabi, waakanikha bilomo bye buurafu akhali khukhwaambaasamo ta.

³⁴Nibo sibaahesa babaandu be kamanaambo kakaandi nga Umukasya n'abalakila ta,

³⁵ne baatsya betubaasa busa ni bareende abo, baaloondelela tsisaambo tsaabwe tse buukafwiili.

³⁶Babaandu ba Wele bano besaaya bifwaani, shishiindu shishekyela kumureko kumukali naabi isi bali.

³⁷Baawaanayo babaana baabwe basooleli ni bakhaana nga tsisaayilo isi bisaambwa.

³⁸Beeraka babaana baabwe basooleli ni bakhaana babaakhaabakho ni kumusaango kwoosi ta, baabawaanayo isi bifwaani bye mu Kanani, ni shibala shoosi shoonakisibwa lwe kamafuki ako.

³⁹Nibo beyonakisa lweebyo byeesi baakhola, lwe buuraambi buno benyaalutaka mu moni tsa Wele.

⁴⁰Ibyo byaakila Umukasya waakhalalila naabi babaandu beewe, waasinyana khulwaabwe.

⁴¹Aryo waabawaanayo mu bunyala bwe kamanaambo, nio abo babaaba baasiku baaba baawuli baabwe.

⁴²Baasiku baabwe baabamiinilisa naabi, naluundi baabakhola khuubeela ilala aasi aabwe.

⁴³Ni tsifuunda ngali nga Umukasya abawonesa, ne nibo baaba baarobolelawo ilala khuumiinyaala, ni bibyoonako byaabwe byaabareerera khuukwa.

⁴⁴Ne Umukasya waamanya kumutaambo kwaabwe, waawuliilisa khuulila khwaabwe.

⁴⁵Khu lwe buulayi bwaabwe, waashebulila indakaano, ni khulwe khuukana khweewe khuukali, waashuusakho bibyambaaso.

⁴⁶Waakalusa abo babaabamiinilisa khuubawaambila shiisa.

⁴⁷N'ukhuwonese ifwe, O Umukasya Wele weefwe, ukhukobose khukhwaama mu manaambo. Khuryo nafwe khunyale khuureera khuusiima khweefwe isi lisiina lyoowo likhosefu, khunyale khuukhuruuya.

⁴⁸Ruuya naabi Umukasya Wele wa Isiraeli! Mumuruuye biilo ni biilo! Lekha buli mutweela alome ari, “Amiina!” Ni muruuye Umukasya!