Read lumasaaba Tsizabuli 107 Bible Online

Tsizabuli 107 - lumasaaba bible

Tsizabuli 107

¹Ruuya Umukasya, khulwekhuuba ali umulayi; khulwekhuuba khuukana khweewe khuukali, khuli khwe biilo ni biilo.

²Khayo baarobore beewe bamuruuye, abo beesi Umukasya aawonesa khukhwaama mu biwaangafu.

³Abo beesi niye abusaasa waabakobosa khukhwaama isi baba nga bali baamuli, khukhwaama ingaaki ni mwaalo.

⁴Babaandu baalala bayiyana busa mu mubiimbi, mu shifwo shishoomu busa boolisa ni khuukoraana, nga sibabonakho ni shiifwo mweesi banyala baamenya ta.

⁵Intsala ni bulesa bya balya, ni kamaani kaabawamo.

⁶Nga bali mu bihangafu byaabwe, baalilila Umukasya, ni naye waabamusa khukhwaama mu bihangafu ibyo.

⁷Umukasya waabokesanisa kumukhoosi kumurereefu, khukhwoolisa ni boola mu shiriimba mweesi baamenya.

⁸Khayo baruuye Umukasya khulwe khuukana khweewe khukhuukhakama ta, khulwe bikholwa bibiyaangisa byeesi niye akholela babaandu.

⁹Khulwekhuuba babaali bulesa, niye abawa she khuunywa, ni nabo babaali intsala, abawa bye khuulya biikali.

¹⁰Babaandu baalala abe bamenya mu shifwo she shishiilima shiibiririfu; abe bali baabowe beesi baabowela kiminyololo.

¹¹Khulwekhuuba abe baaminyaalila ilomo ya Wele, naluundi abe baaloba khuuloondelela kamakhula ka Wele, umunyali wa byoosi.

¹²Umukasya aabalekha baabira mu bihangafu, baryo baarusayo kimyoyo kyaabwe baakwa aasi, nga mbaawo ubayeeta ta.

¹³Nga bali mu bihangafu baalilila Umukasya, naye waabawonesa khukhwaama mu bihangafu byaabwe.

¹⁴Waabareera khukhwaama mu shilima she kamaani, waafuniaaka kiminyololo kikyababowa waakirusawo.

¹⁵Khayo baruuye Umukasya khulwe khuukana khweewe khuukali, khulwe khuukholela babaandu bikholwa biibiyaangisa.

¹⁶Khulwekhuuba aamenyula bilibwa bye bibya, na buli shiibya aashimenyulamo khabili.

¹⁷Iliwo batweela, khu lwe kimikhoosi kyaabwe kye bubwoonaki, baataambisibwa; ni khulwe bibyoonako byaabwe, baafuna kumutaambo.

¹⁸Kimyoyo kyaabwe kyabiyila biilyo bya buli shikuuka, boolela ilala imakoombe.

¹⁹Nga bali mu butsiina bwaabwe baalilila Umukasya, ni naye waabawonesa khukhwaama mu mitaambo kyaabwe.

²⁰Aaloma bulomi ilomo, yaabawonesa; waabawonesa baalekha khukhwiiribwa ta.

²¹Khayo baruuye Umukasya khulwe khuukana khweewe khuukali, khulwe bikholwa byeewe biibiyaangisa byeesi niye akholela babaandu.

²²Khayo bawaaneyo tsisaayilo tsye khuusiima, baruuye bikholwa byeewe nga beemba kumweenya kwe kumwikhoyo.

²³Balala nga nio banyalise khuufuna she khuulya, abe bakyeendela mu meeli khu nyaantsa tsimboofu, nga bakhola bye khuukulaana khu nyaantsa.

²⁴Abo baabona byeesi Umukasya akhola, bikholwa byeewe biibiyaangisa mu meetsi aasi.

²⁵Umukasya waalakila, ikhuungu iye kamaani yenyukha yaawuutsa, yaakila inyaantsa yelyebula.

²⁶Khukhwilyebula khwaakila tsimeeli tsyayeŋaana khu meetsi, kumutaambo kuno kwaakila kimyoyo kyaabwe kyesuunga.

²⁷Belunguusa baatalatala nga babaameelile, ni abe byeesi baamanya byaalekha khubayeeta ta.

²⁸Nga bali mu mutaambo kuno baalilila Umukasya, aryo waabawonesa khukhwaama mu bihangafu byaabwe.

²⁹Aryo waasilisa ikhuungu, ni khukhwilyebula khwe nyaantsa khwaakama.

³⁰Ni baabona byoosi byaakwaalalile bekhoya, aryo waabayila waaboolesa mu shifwo sheesi abe bekoomba khuutsyamo.

³¹Khayo baruuye Umukasya khulwe khuukana khweewe khukhuukhawawo ta, khulwe bye kamakaanga byeesi aakholela babaandu.

³²Khayo bamuruuyile angaaki mu lituuli lye babesaaya, khayo bamuruuyile mu lituuli lye basaakhulu.

³³Aakalusa tsintsitsi tsye kameetsi tsyekela kumubiimbi, tsisebele tsyekela liloba lilyoomu lilyeene.

³⁴Liloba liilayi lilyaama biilyo biikali, aalikalusa lyeekela busuumbu, khulwe bibyoonako bye babaandu babaamenyamo.

³⁵Umukasya aakalusa kumubiimbi kwekela kamatibo ke kameetsi, liloba lilyoomu busa lyekela liitubukhamo tsisebele tsye kameetsi.

³⁶Ibweene iyo niyo waarayo babaali intsala khuumenyayo, baryo bombakha shifwo she khuumenyamo.

³⁷Babyaala kimisabibu kyaamamo iviini, baryo baakyesa likyesa liikali.

³⁸Aabawa tsikhabi baryo basaalana baabalaaha naabi; naluundi s'afukiilila bibyaayo byaabwe byasheendeela mu bukali ta.

³⁹Abo babaali baasiku ba Wele baabamiinikhilisa, baabareerera kumutaambo, baryo baawaambisibwa kamaŋaanyu,

⁴⁰Wele waawaamba be angaaki waabekhisa aasi, waakila baataangataanga busa mu mubiimbi.

⁴¹Ne aatimiilila abo babaali bataambi, aryo waabalaayisa lisaaye lyaabwe, baaba busa nga bibyaayo.

⁴²Bakhosefu nga baaboone shino bekhoya, ne baboonaki boosi basila beelaliila busa.

⁴³Umuundu uuli ni kamakhula kane awaambe bibiindu bino, kane ambaase naabi khu khukana khw'Omukasya khukhuukhawawo ta.