Read lumasaaba Tsizabuli 108 Bible Online

Tsizabuli 108 - lumasaaba bible

Tsizabuli 108

¹Wele, kumwoyo kwase kwiyikamilila khusi iwe, kumwoyo kwase kwiyikamilila khusi iwe. Ari kane ise ikhwiimbile iwe kumweenya.

²Ise kane isisimukhe ikhupe lituungu ni shiyilili! Kane ise isisimukhe mamilimili, nga inyaanga ishili khurura ta.

³Ise nga ndi akari mu lituuli lye babaandu, kane ise ikhusiime iwe, O Umukasya. Kane intsye mu manaambo niimbe kimyeenya nga ikhuruuya iwe.

⁴Khuukana khwoowo khukhuukhawawo ta, khuli khuukali naabi khwoolela ilala ni mwikulu mu ngaaki, buulayi bwoowo bwoola ni mu mafuumbi.

⁵Wele wase, iwe ni wokesele bukhulu bwoowo angaaki mwikulu! Khayo shiriifwa shoowo shibalaahe shimalatane mu shibala shoosi!

⁶Nio akile iwe uwonese umukanwa woowo, raambisa kamaani koowo, wilemo khuuloomba khwase.

⁷Wele waamala khusuubisila mu shifwo sheewe shikhosefu nga aloma ari, “Shibala shishilaangibwa Sekemu kane ishikabananisemo ni kumwikhoyo mukali, ikhaba litila lya Sukosi kane indikhalakemo bisiintsa.

⁸Gileyadi ni Manase byoosi bili bibyase, Efurayimu nisho shisiintsa sheesi ise imiimba khu murwe kwase. Yuda niyo imiimbo yase isi ise inaambisa mu khuwula kamanaambo.

⁹Shibala Mowabu shili shishase. Ise ndi umuwuli wa Edomu. Nga naamalile khuuwaamba liloba lye ba Firisitiya, kane ise ikhupe liyoombo.”

¹⁰Naanu ukane anaangirire ise khukhwingila mu shiriimba shishiili mu kumako? Naanu ukane anaangirire ise khuutsya mu Edomu?

¹¹O Wele, khulwashiina kila iwe ukhwaantsukhile ifwe? Iwe s'ukana waatsya ni kamaye keefwe mu busoolo ta.

¹²Iwe n'ukhuwe ifwe buyeeti bwoowo nga khusoolanisa baasiku, khulwekhuuba buyeeti bubwaama isi babaandu busa sibulimo lisuno ta.

¹³Wele nga ali khu luwaande lweefwe, kane ifwe khufuure mu busoolo; kane akhaandakilile baasiku beefwe.